JEREMÍAS 39 - Quichua Imbabura Bible

Jerusalenbi causajcunatami mishashca(2 Rey. 24:20—25:21; 2 Crón. 36:17-21; Jer. 52:3-30)

1Judá llactata jatun mandaj Sedequías shuti runaca, ñami iscun huatata mandajurca. Chai huatapaj chunga quillapimi, Babilonia llactata jatun mandaj Nabucodonosor runaca, paipaj tucui soldadocunahuan shamushpa, Jerusalendaca chaupipi churarca.

2Chai punllacunami, Sedequías runa mandajushcapash, chunga shuj huata tucurca. Chai huatapaj chuscu quilla iscun punllapimi, Jerusalén pueblo muyundi jatun pircata utujunajurca.

3Shina utujushpami, Babilonia llactata jatun mandaj churashca mandajcunaca, tucuicuna Jerusalenman yaicunajurca. Chashna yaicushpaca, chaupipi shayajuj pungu ladocunapimi, carpacunata shayachishpa tianajurca. Chai mandajcunaca: Nergal-sarezer shuti, Samgar-nebo shuti mandajcunapash, Rabsaris nishca Sarsequim shuti mandajpashmi carca. Shinallata Rabmag nishca Nergal-sarezer shuti mandajpash, shinallata Babilonia llactata jatun mandaj churashca tucuilla mandajcunapashmi carca.

4Chaita ricushpami, Judá llactata jatun mandaj Sedequías runapash, macanajuj paipaj tucui soldadocunapash, pueblomanda tuta llujshishpa pacajushpa rinajurca. Jatun mandajpaj huerta chaupita yalishpami, ishcai jatun pirca chaupipi tiaj punguta llujshinajurca. Chaita llujshishpaca, Arabá nishca jatun pambamanmi, jatun mandajca rijurca.

5Ashtahuangarin caldeo soldadocuna catishpaca, Sedequías runataca, Jericó shuti jatun pambapimi japirca. Chaipi japishpaca, Hamat shuti llactapi tiaj Ribla shuti pueblomanmi, Babilonia llactata jatun mandaj Nabucodonosor runapajman vichai pushanajurca. Chaipimi, paita llaquichingapaj churarca.

6Babilonia llactata jatun mandajca, Sedequías runapaj churicunataca, pai ricujujpillatami cungata fitichirca. Shinallata Judá llactapi alicachi tucushcacunatapash, tucuicunatami Babilonia llactata jatun mandajca, cungata muchurca.

7Jatun mandaj Sedequías shuti runataca, ishcandi ñavita llujchishpami, Babilonia llactaman apangapaj, grillo nishcacunahuan chaquipi, maquipi huatanajurca.

8Caldeo soldadocunaca, mandana huasitapash, Jerusalén pueblopi tiaj huasicunatapashmi rupachirca. Muyundi jatun pircacunatapashmi urmachinajurca.

9Cuidaj soldadocunata mandaj Nabuzaradán shuti runaca, Jerusalenbi huaquin puchushcacunatapash, paipaj maquipi paicunallata japi tucushcacunatapash, chaipi puchushcacunahuan tucuillata tandachishpami, Babilonia llactaman aparca.

10Shina cashpapash, cuidaj soldadocunata mandaj Nabuzaradán shuti runaca, imagutapash na charijcunataca, Judá llactapillatami saquirca. Paicunamanga alpacunata, uvas chagracunatami paicunapaj cachun carashpa saquirca.

Nabucodonosor shuti runami, Jeremiasta cuidashca

11Nabucodonosor runaca, cuidaj soldadocunata mandaj Nabuzaradán shuti runataca, Jeremiasta ricuchun nishpami, cashna mandashca carca:

12“Jeremiastaca, can japishpa cuidangui. Paitaca, imatapash nalita rurashpara llaquichinguiman. Ashtahuangarin imata mañashcata ruranguilla” nishcami carca.

13Shinamandami, cuidaj soldadocunata mandaj Nabuzaradán shuti runaca, cai runacunata cacharca: Rabsaris nishca Nabusazbán shuti mandajta, Rabmag nishca Nergal-sarezer shuti mandajta, Babilonia llactata jatun mandaj churashca tucui mandajcunatami,

14prezuna huasi patiomanda Jeremiasta llujchinajuchun cacharca. Chaimanda llujchishpaca, Ahicam shuti runapaj churi Gedalías shuti runamanmi cunajurca. Ahicam shuti runaca, Safán shuti runapaj churimi. Jeremiastaca, Gedalías shuti runapaj huasipi causachun pushachunmi, paiman cunajurca. Shinami Jeremiasca, Judá llacta gentecunapaj chaupipi causajurca.

Taita Diosca, Ebed-melec shuti runataca cacharichishami nishcami

15Prezuna huasi patiopi prezu tiajujpimi, Mandaj Diosca Jeremiastaca, cashna nishpa mandarca:

16“Ebed-melec shuti runapajman rishpa, cashna nigri: Tucuita Mandaj, israelcunapaj Taita Diosca, cashnami nin: ‘Ricuichi, ñucaca cai pueblopaj jahuapica, ima alitapash na rurashachu. Ashtahuangarin tucui llaquicunata cachamushami nishpa, ñuca villashcatami pactachigrini. Chai llaqui punllacuna chayamujtaca, cambaj ñavihuambachami ricugringui.

17Ashtahuangarin chai punllapica ñucami, candaca quishpichisha. Canga, can manllajushca runacunapaj maquipica, na churai tucunguichu’ ninmi Mandaj Diosca.

18Shinallata: ‘Candaca quishpichishapachami, napacha espadahuan huañuchi tucunguichu. Ashtahuangarin ñucallatami candaca, ima charishcacunata quichunshna quishpichisha. Ñucata yariajlla causajushcamandami, candaca quishpichisha’ ninmi Mandaj Diosca nigri” nijurcami.