COLOSENSES 3 - Quichua Imbabura Bible

1Cangunaca, Cristohuan causarishcamandaca, jahua pachapi tiajtallami mascana canguichi. Chaipica Cristomi, Taita Diospaj ali ladoman tiajun.

2Cai pachapi ima tiajtapash na yarishpami, jahua pachapi tiajtalla yarishpa causana canguichi.

3Cangunaca, ñamari huañushcashna canguichi. Cangunapaj causaica, Cristohuanmi Taita Diospi pacajushca tiajun.

4Cangunaman causaita caraj Cristo ricurimujpimi, cangunapash paipaj punchapamba llactagupi ricuringuichi.

Mauca causaimanda, mushuj causaimandapash villashcami

5Cai pachapajta rurachun yarichijuj munaicunataca, tucuitami huañuchinshna saquina canguichi: Huainayanata, Diospaj ñaupajpi mapayanata, nalita rurana yuyaicunata, nali munaicunata, charijyanataca na munanachu canguichi. Chaita munanaca, rurashcalla dioscunata mañanajunshnallatami.

6Taita Diosca, paita na cazushpa chashna nalita rurajcunatami, ninanda fiñashpa llaquichinga.

7Cangunapash, chashnallata nalita rurashpami pundaca causarcanguichi.

8Ashtahuangarin cunanga, ninanda fiñarinata, shungu ucupilla fiñarinata, nalicachishpa parlanata, nali shimicunata rimanataca, tucuitami nali causashcataca saquina canguichi.

9Imatapash nalita rurashpa punda causashcataca, cacharirinshna ña saquishca cashpami, caishujmanda chaishujmanda na llullarishpa causana canguichi.

10Cangunaca, ñami mushujta causangapaj callarishca canguichi. Diosmi, cangunataca paishnalla tucushpa, paita alipacha rijsingacaman mushujyachijun.

11Shinamandami cunanga, griego cashpa, Judá llactamanda cashpa, circuncisión nishcata rurashca cashpa, chaita na rurashca cashpa, shuj llactamanda shamushca cashpa, maipi causaj cashpapash, servishpa causaj cashpa, na servishpa causaj cashpapash, chashnallata canguichi. Ashtahuangarin Cristoca tucuicunapajmi, tucuicunahuanmi causajun.

12Cangunataca, mushujta churachinshnami Taita Diosca juyashpa, paipajlla causachun agllarca. Shinamandami, tucui shunguhuan pitapash llaquishpa, juyashpa, ali shunguhuan na jariyashpa, pihuambash aligutapacha causana canguichi.

13Caishujhuan chaishujhuan cazurishpa, shinallata caishujhuan chaishujhuan llaquichirishca cashpapash, perdonarishpami causana canguichi. Cristo cangunapaj juchata perdonashcashnallatami, cangunapash perdonarina canguichi.

14Ashtahuangarin Tucui caicunapaj jahuaca, juyarishpa causanatami churajunshna yariajlla causana canguichi. Shina juyarishpami, tucuicuna imapipash na pandashpa aliguta causanguichi.

15Casilla ali causaita Taita Dios carashpa, cangunapaj shungupi yarichijuchunmi munani. Paillatami cangunataca, shujlla cuerpo tucushpa, casilla aliguta causachun agllarca. Shinamandami paitaca, pashi ninajuna canguichi.

16Cristo villashca shimicuna cangunapaj shungupi ninanda mirachunmi munani. Canguna purami caishujhuan, chaishujhuan chai yachajunataca yarichirishpa, tucuicuna yachajuna canguichi. Salmocunata, Diospaj Espíritu yachachishca juyailla candanacunatapash, Apunchi Jesusta pashi nishpami, tucui shunguhuan candana canguichi.

17Tucui imata rurashpapash, imata parlashpapash, Apunchi Jesuspaj shutipi alicachishpa, tucuita ruranguichi. Paimandallami Taita Diostaca, pashi nina canguichi.

Crij puracunaca, aligutami causana

18Huarmicuna, cangunapaj cusacunataca, Apunchi Jesusta crij cashcamandami, aliguta cazuna canguichi.

19Cusacunapash, cangunapaj huarmicunataca juyanami canguichi. Paicunahuanga, na millaicuna canachu canguichi.

20Huahuacunapash, taita mama mandashcata, tucuipi aligutapacha cazuichi. Shina aliguta cazuchunmi, Apunchi Jesuspash munan.

21Taita mamacunapash, cangunapaj huahuacunataca, na yapata llaquichishpa fiñachinachu canguichi.

22Servijcunapash, cai pachapi cangunapaj amocunataca, tucuipi cazunami canguichi. Na paicunapaj ñavipi alipi ricuringapajlla ruranachu canguichi. Ashtahuangarin Taita Diosta manllashpa, tucui shunguhuan cushijushpami rurana canguichi.

23Imata rurashpapash, gentecunapajta ruranshnaca, na ruranachu canguichi. Ashtahuangarin Apunchi Jesuspajta rurajunshnami, tucui shunguhuan aliguta pactachina canguichi.

24Canguna chashna aliguta rurashcamanda, Apunchi Jesús carajpi japigrinata alimi yachanguichi. Cangunapaj Amoca Cristomi, paitami servinajunguichi.

25Ashtahuangarin imatapash cashcatapacha na ruraj cashpaca, nalita rurashcamandami, nalitallata japinga. Diosca, na ñavita ricushpalla chasquijunllu.