ESDRAS 9 - Quichua Imbabura Bible

Juchacunata villashpami Esdrasca, Diosta mañashca

1Chai tucuicunata tucuchishca jipami, israelcunata mandajcunaca, ñucapajman shamushpa cashna nihuarca: “Israel gentecuna, curacuna, levitacunaca, cai llactapi causanajuj cananeo, heteo, ferezeo, jebuseo, amonita nishca gentecunamandaca na shicanyarishcachu. Moabitacunamanda, Egiptopi causajcunamanda, amorreocunamandapash na shicanyarishcachu. Chaimandami, paicunashnallata millanayaicunata rurashpa causanajun.

2Chashna causanajushpami paicunapajpash, paicunapaj churicunapajpash, chai gentecunapaj ushicunata japinajurca. Jucha illaj gentecunapaj miraicunami, shuj llacta gentecunahuan chapurishca. Shina juchata ruranataca, cati mandajcuna, llactata mandajcunarami callarishca” nishpami villanajuhuarca.

3Chashna nalita ruranajujta uyashpami, ñuca churajushcatapash, jahualla churajushcatapash liquircani. Ñuca uma ajchatapash, barbastapash anchurishpami, ninandapacha llaquirishpa tiarircani.

4Chashna tiajujpica, prezu apai tucushcacuna yachashpata na cazushcamandami, israelcunapaj Taita Dios villachishca shimicunata manllajcunaca, tucuicuna ñucahuan tandanajumurca. Ashtahuangarin ñucaca, animalta Diosman cushpa rupachina chishi horascamanmi, ninanda llaquirishpa tiajurcani.

5Animalta Diosman cushpa huañuchina chishi horasllatami, llaquilla tiajushcamandaca jatarircani. Ñuca churajushcatapash, jahualla churajushcatapash liquishca jipaca cungurishpami, ñucata Mandaj Taita Diospajman maquita vichai churashpa,

6cashna nishpa mañarcani: “Ñuca Taita Dioslla, ñuca ñavihuan canda vichai ricungapajpash manllanayanmi, pinganayanmi. Ñuca Taita Dioslla, ñucanchi nalita rurashcacunaca, umacaman quilpanshnami ninanda mirashca. Ñucanchi juchacunapash ninanda mirashpami, jahua pachacaman chayashca.

7Ñucanchi ñaupa taitacuna causanajui punllamandapacha cunan punllacunacamanmi, jatun juchacunata rurashpa causashcanchi. Chashna nalicunata ñucanchillata rurashcamandami, ñucanchipash ñucanchita jatun mandajcunapash, ñucanchi curacunapash, shuj llactacunata jatun mandajcunapaj maquipi churai tucushcanchi. Espadahuan huañuchi tucushpa, prezu apai tucushpa, imatalla charishcatapash quichui tucushpami, jatun pingaihuan ñavita quilpashcashna, cunan punllacaman causanchi.

8Shina cajpipash cunanga, huaquinllapash chai llaquicunamanda cacharichi tucuchunmi, ñucanchita Mandaj can Taita Diosca, asha punllatallapash llaquishcangui. Imatapash na manllashpa, cambaj huasipi aliguta causanata cungapajmi llaquishcangui. Ñucanchi Taita Dioslla, ñucanchitaca shujcunapaj gañan tucushpa causanajushcamanda ashatallapash samachishpa, ñucanchi ñavita punchayachingapajmi, chashna llaquishcangui.

9Ñucanchica gañangunami canchi. Ashtahuangarin gañanguna cajpipash, ñucanchi Taita Diosca na jichushpa ñucanchitalla saquishcanguichu. Ashtahuangarin Persia llactata jatun mandajcunapaj ñaupajpipash, ñucanchita llaquishpami, ñucanchita causaihuan saquina yuyaita cushcangui. Ñucanchi Taita Diospaj huasita urmachishcata cutin shayachinajuchunmi, canllata ñucanchita cuidangapaj, cai Judá llactapi tiajuj Jerusalenman pushamushcangui.

10Ashtahuangarin cunanga, ñucanchi Taita Dioslla, caita rurashca jipaca, ¿imatata ni ushapashunyari? Ñucanchillatami, can mandashcacunata saquishcanchi.

11Can Dios ima nishcata villaj canda servijcunahuanmi, cashna nishpa villachircangui: ‘Canguna yaicushpa, cangunapaj cachun japina llactaca, chai llactapi causaj gentecuna ninanda mapayachishcamanda ninan mapa llactami. Caishuj ladomanda, chaishuj ladocaman mapacunata rurashpa jundachishcamandami, chashna tucushca.

12Chaimandami cunanga, cangunapaj ushicunata, paicunapaj churicunahuan, paicunapaj ushicunatapash, cangunapaj churicunahuanga na cazarachina canguichi. Paicuna casilla aliguta causachumbash, paicuna tucuipi ali llujshichumbash, napacha munanachu canguichi. Canguna shinlli tucushpa causangapaj, chai llactapi fucushca ali micunacunata micushpa causangapaj, alpacunatapash, cangunapaj mirai huahuacunaman tucui causaipaj saquingapajmi, chaitaca na rurana canguichi’ nishpami villachircangui.

13Ashtahuangarin ñucanchi nalicunata rurashpa causashcamanda, ñucanchi jatun juchamandami, cai tucui llaquicunaca shamushca. Shina cajpipash ñucanchi Taita Dioslla, ñucanchi nalita rurashcashnaca na llaquichishpami, cai huaquinllatapash ñucanchihuan pushamushcangui.

14¿Ñucanchica, can mandashcacunata cutin na cazushpachu, chashna millanayaicunata ruranajujpipash, paicunahuan tandanajushpa causashun? Chashna rurajpica, ¿nachu ñucanchita ninanda fiñashpa, cai huaquinlla puchushcacunatapash shujllatapash na saquishpa, tucuillata tucuchinguiman?

15Israelcunata Mandaj Taita Dioslla. Canga, imatapash cashcatapacha ruraj Diosmi cangui. Ñucanchica pacajushpa, cai huaquingunalla puchushcacunami, cunan punllacaman causanajunchi. Ricui, cambaj ñaupajpimi ñucanchi juchacunapillata causanajunchi. Chaimandami ñucanchica, cambaj ñaupajpi ricuritaca na ushapanchi” nishpami, Diosta mañarcani.