Psalms 32 - Quichua Imbabura Bible

Nalita rurashcata Dios cungajpimi, ninanda cushijunYachachingapaj David rurashca Salmomi.

1Diosta na cazushpa, juchata rurashcatapash

quilpanshna Dios cungajpica,

maijan cashpapash ninandami cushijun.

2Ima nalimandapash, Mandaj Dios na juchachijpi

causaj runaca, ninandami cushijun.

Paipaj shungupipash, umachina yuyaica na tianllu.

3Ñuca juchata Diosman na villajpimi,

ñuca tullucunaca rucuyarca.

Tucui punllami, aij nijurcanilla.

4Punllandi, tutandimi cambaj maquica

ashtahuan ashtahuan llaquichihuarca.

Verdella jihuashna cashpapash, rupai punllacunapi

chaquishca jihuashnami tucurcani. Selah

5Ñuca juchataca canmanmi villarcani.

Ima nalita rurashcatapash na pacarcanichu.

Ñucaca cashnami nircani: “Canda na cazushcacunataca,

Mandaj Dios canmanllatami villasha” nircanimi.

Canga, ñuca nalita rurashca juchataca

cungahuarcanguimi. Selah

6Chaimandami, cambajlla causajcunaca, canda

tarina punllacunapica tucuicuna mañanajunga.

Jatun yacucuna jundanshna shamushpapash,

paicunataca napacha japingachu.

7Canga, ñuca pacajuna cashpami,

ima llaquimandapash huacaichihuangui.

Llaquipi cajta llujchishcamanda candajcunatami,

ñuca muyundipica churapangui. Selah

8Ñucami canda yachachishpa,

can purina ñandapash ricuchisha.

Candami, ñuca ñavihuanga ricuriasha.

9Na entendij caballoshna, mulashnaca ama caichu.

Chaicunataca huascahuan huatashpami,

jirruta amulichishpa cazuchina.

Na chashna rurajpica, na cambaj

ladoman quimirinmanllu.

10Diosta na manllaj runapaca, ashtaca nanaicunami tianga.

Ashtahuangarin Mandaj Diosta shuyajtaca,

paipaj llaquinami muyujun.

11Mandaj Diospi cushijuichi.

Imatapash cashcatapacha rurajcunapash,

ninanda cushijuichi.

Alitalla shungupi tucui yarijcunapash,

ninanda cushijushpa candaichi.