1Nali pezaj balanzatami,
Mandaj Diosca millanayachin.
Ashtahuangarin ali pezashcataca cushijunmi.
2Jariyashpa jatun tucujcunaca, alicachi
tucushcatapash huaglichi tucunllami.
Ashtahuangarin ali yachaica,
na jariyashcacunahuanmi.
3Ima nalitapash na rurashpa, aligutalla
rurajcunataca, ali ñandami pushanga.
Ashtahuangarin juchata rurajcunataca,
paicuna jatun nalita rurashcallatami tucuchinga.
4Dios fiñashpa llaquichijui punllapica,
imata charishcapash yangallatami canga.
Ashtahuangarin imatapash cashcatapacha
rurashcami, huañuimanda cacharichinga.
5Ima pandatapash na ruraj runa imatapash
cashcatapacha rurashcami, pai purina
ñandaca derechanga.
Ashtahuangarin Diosta na manllaj runaca,
paillata na manllashcamandami urmanga.
6Aliguta rurajcunataca, imatapash cashcatapacha
rurashcallatami cacharichinga.
Ashtahuangarin juchata rurajcunaca,
paicunapaj juchapillatami japi tucunga.
7Diosta na manllaj runa huañujpica,
pai shuyajushcapash tucurinmi.
Nalita ruraj runacuna imatalla
yarinajushcapashmi tucuringa.
8Imatapash cashcatapacha ruraj runaca,
ninan llaquimandapash cacharichi tucunmi.
Ashtahuangarin paipaj randica, paita na
manllaj runatami llaquipi churan.
9Mishqui shimi jayaj shungu runaca,
paipaj shimi rimashcahuanmi,
cumba runaguta llaquipi churan.
Ashtahuangarin imatapash cashcatapacha rurajcunaca,
alipacha yachajushcahuanmi cacharichi tucun.
10Imatapash cashcatapacha rurajcuna ali
cajpica, pueblopi causajcunapash cushijunmi.
Ashtahuangarin Diosta na manllajcuna
huañujpica, fiestatami ruranajun.
11Aliguta rurajcunata bendiciajpimi,
pueblopash jatunyachi tucushca canga.
Ashtahuangarin Diosta na manllajcunapaj
shimica, chingachi tucungami.
12Ali yuyaita na charij runaca, paipaj
cumba runagutallata yangapi churanllami.
Ashtahuangarin aligutapacha yarishpa purij
runaca, jarcarishpa upalla quedanllami.
13Parlashpalla purij runaca, na
parlanallatapash parlanllami.
Ashtahuangarin ali yuyaita charij runaca,
tucuita pacalla alichinllami.
14Alipacha yachajushca mandaj na
tiajpica, llactapash llaquipimi urman.
Ashtahuangarin ali yuyaita cujcuna
taucacuna tiajpica, ima llaquipash na japinllu.
15Na rijsishca runapaj garante tucuj
runaca, ninan llaquipachami tucun.
Ashtahuangarin divi tucunata na ricunayachij
runaca, manllai illajmi causajunga.
16Aliguta yarij huarmica, alicachi tucushcami canga.
Shinllitapacha imatapash rurajcunaca, charijyangami.
17Pitapash llaquij runaca, paipaj
almapajmi alita ruran.
Ashtahuangarin pitapash na llaquishpa ninanda
llaquichij runaca, paillatami llaquipi yaicun.
18Diosta na manllaj runaca,
imapash umachinatallami ruran.
Ashtahuangarin tarpunshna imatapash
cashcatapacha ruraj runaca,
na tucurinalla alicunatami japinga.
19Imashnami imatapash cashcatapacha ruranaca
causaiman pushan, shinallatami nalita rurashpa
catijpash, paillata huañuiman ringapaj chashna rurajun.
20Mandaj Diosca, jatun nali shungu
runacunataca millanayachinmi.
Ashtahuangarin ima pandatapash na rurashpa
causajcunami, paipaj ñaupajpi juyaillagu ricurin.
21Nalita ruraj runaca cunan cashpa,
jipaman cashpapash llaquichi tucungapachami.
Ashtahuangarin imatapash cashcatapacha ruraj
runacunapaj miraicunaca, cacharichi tucungami.
22Juyailla ñavi cashpapash,
ali yuyaita na charij huarmica,
cuchipaj singapi oro sarcillota churachishcashnami.
23Imatapash cashcatapacha rurajcunaca,
alita ruranatallami munan.
Ashtahuangarin Diosta na manllajcunaca,
fiñanajuitallami shuyanajun.
24Imatapash na mitsashpa carajcunaca,
ashtahuanmi charijyanajun.
Huaquingunaca, paipajlla cachun ninandapacha
mitsashpa charishpami, imapash illaj tucunajun.
25Shujcunaman imagutapash carana yuyaita
charij runaca, tucuipimi ali llujshin.
Shujcunaman na munangacaman caraj runaca,
paipashmi na munangacaman micunga.
26Granocunata pacashpa ninanda alichij runataca,
tucui gentecunami ima llaquipash japishpami
ali canman ninajunga.
Ashtahuangarin na alichishpa jatuj
runapaj jahuapica, bendiciangami.
27Shujcunaman alita rurangapaj munaj
runaca, paitapash ayudachun munanmi.
Ashtahuangarin llaquichingapaj munaj
runataca, chai llaquillatami japinga.
28Ima charishcacunatalla yariashpa causaj runaca urmangami.
Ashtahuangarin imatapash cashcatapacha rurajcunaca,
quiru malquicuna verdeyanshnami canga.
29Paipaj huasi ucu puratapash na cuidaj runaca,
yanga huairatalla japinshnami japinga.
Shinlli shungu runaca, shungupi aliguta
yachajushca runata servishpami causanga.
30Imatapash cashcatapacha ruraj runa imaguta
rurashcapash, causaita cuj yurashnami.
Alma quishpirichun villaj runaca, alipacha yachajushcami.
31Imatapash cashcatapacha ruraj runapaca,
cai pachapi japina tiangapachami.
¡Diosta na manllashpa juchata ruraj runacarin, llaquita japingapachami!
Who We AreWhat We EelieveWhat We Do
2025 by iamachristian.org,Inc All rights reserved.