MARCOS 5 - Quichua Imbabura Bible

1Paicuna chai cuchata ña chimbashpaca, Gadara shuti llactamanmi shamurca.

2Canoamanda llujshijhuanmi, mapata rurachij aya jundashca shuj runaca, pambana utujumanda llujshishpa Jesustaca tuparimurca.

3Chai runaca, pambana utujupillami causajurca. Paitaca, cadenahuanllapash pipash na huatai ushanllu carca.

4Chai runaca, cutin cutinmi grillocunahuan, cadenacunahuan huatai tucushpa causarca. Ashtahuangarin paita huatashca cadenacunataca, fiti fitita rurashpami shitan carca. Shina cajpimi paita charitacarin, pipash na ushan carca.

5Chai runaca tutapash, punllapash urcucunapi, pambana utujucunapi ninanda caparishpalla purijmi carca. Paillata rumicunahuan huactarishpami, chugririn carca.

6Chai runaca, Jesusta carumanda ricushpa calpamushpami, Jesuspaj ñaupajpi cungurirca.

7Shina cungurishpami, cashna nishpa ninanda caparirca:

—Jahua pachapi tiajuj Taita Diospaj Churi Jesús, canga ñucahuanga, ¿imatata ricunata charingui? Taita Diospaj shutipimi, ama llaquichihuaichu nishpa juramentuchini— nircami.

8—Mapata rurachij aya, cai runamanda llujshi ninimi— nishpa Jesús mandajpimi, chashna caparijurca.

9Jesusca, chashna nishpallami:

—¿Ima shutita cangui?— nishpa tapurca.

Shina tapujpimi chai runaca, cashna nirca:

—Huaranga Huaranga shutimi cani. Ñucanchica, ashtaca ashtacacunamari canchi— nircami.

10Shina nishpami cai llactamandaca, ama caruman llujchishpa cachahuaichu— nishpa, Jesustaca mañajurca.

11Chai urcu ladollapimi, ashtaca ashtaca cuchicuna micushpa purinajurca.

12Shina cajpimi, chai ayacunaca:

—Chai cuchicunapi yaicuchun, ñucanchitaca cachahuai— nishpa, Jesustaca mañanajurca.

13Shina nijpimi, chai cuchicunapi yaicuchun saquirca. Mapacunata rurachij chai ayacuna chai runamanda llujshishpaca, cuchicunapi yaicujhuanmi chai cuchicunaca, jaca jahua patamanda cuchaman huashajushpa huañurca. Chai cuchicunaca, ishcai huarangashnami carca.

14Cuchicunata michijcunaca, paicuna causanajuj pueblopipash, llactacunapipash villangapajmi ninanda calpanajurca. Shina villajpimi, ima tucushcatapash ricungapaj, tucuilla gentecuna shamunajurca.

15Jesuspajman chayamushpaca, ashtaca ashtaca aya jundashpa llaquichijpi causajuj runa ali tucushca tiajujtami ricunajurca. Chai runaca, churajunatapash aliguta churajushca, ali juizupimi tiajurca. Shinata ricushpami gentecunaca, ninanda manllarinajurca.

16Chai gentecunamanmi, aya jundashca runa imashna ali tucushcatapash, cuchicuna imalla tucushcatapash ricushcacunaca villanajurca.

17Chaimandami Jesustaca:

—Cai ñucanchi llactamandaca ripailla— ninajurca.

18Shina nijpimi Jesusca, canoapi tiarirca. Shina tiarijpimi, ayacunata llujchi tucushca runaca:

—Ñucatapash pushahuayari— nijurca.

19Ashtahuangarin Jesusca, chai runataca na paihuan richun saquishpami, cashna nirca:

—Cambaj huasiman rilla. Cambaj familiapajman rishpa, canman Jatun Dios cai jatun alita rurashcata villagri— nircami.

20Shina nijpi chai runa rishpaca, paiman Jesús imashna chai jatun alita rurashcatami, tucuilla Decápolis shuti pueblocunapi villai callarirca. Shina villajpimi, tucuicuna ninanda manllarinajurca.

Jairo shuti runapaj ushimandapash, Jesuspaj jahualla churajushcapi tacarishca huarmimandapashmi villajun(Mat. 9:18-26; Luc. 8:40-56)

21Jesusca, canoapi tiarishpami, cutin chai cuchataca chimbarca. Chai cucha manñapi shayajujpimi, ashtaca ashtaca gentecuna paipajman tandanajumurca.

22Chaimanmi, tandanajuna huasipi mandaj puramanda Jairo shuti runapash shamurca. Jesusta chai runa ricushpaca, ñapashmi paipaj ñaupajpi cungurirca.

23Paica cashna nishpami, Jesustaca ninanda mañajurca:

—Ñuca ushigumi ña huañugrijupan. Paipaj umapi cambaj maquita churangapaj ripashunyari. Shina churajpica, quishpirishpa causangallami— nircami.

24Shina nijpimi, Jesusca chai runapaj huasiman rirca. Paitaca, ashtaca ashtaca gentecunami saruripi catishpa rinajurca.

25Chaipica, yahuar shamujuj ung:uihuan chunga ishcai huatata huañujujlla causajuj huarmipashmi rijushca carca.

26Chai huarmica, chashna nanaillahuan causajushpami, jambijcunapajman caita chaita rijun carca. Shina jambirijushpallami, imaguta charishcatapash tucuillata tucuchishca carca. Ima jambipash na chayajpimi, ashtahuan ashtahuan anllayajurca.

27Chai huarmica, Jesusmanda parlanajujta uyashpami, gentecunapaj chaupita yaicushpa, Jesús jahualla churajushcapica huashamanda tacarirca.

28Chai huarmica: “Jesús churajushcapi tacarishpalla ali tucushallami” yashpami tacarirca.

29Jesuspaj churajushcapi tacarijhuanga, yahuar shamujujca ñapash chaquircallami. Shina tucushpami chai huarmica, astinshna llaquichijuj chai nanaimanda ali tucushcata yacharca.

30Shina ali tucujpica, ñuca ushaihuan maijandachari ñami alichini yashpami, Jesusca tigrarishpa ricurca. Shina ricushpaca:

—¿Maijanda ñuca churajushcapi tacarircanguichi?— nishpami, chai tucui gentecunataca tapurca.

31Shina tapujpimi paipaj yachajujcunaca, cashna ninajurca:

—Cai tucui gentecunami, candaca saruripi catimunajun. ¿Chaitaca, na ricunshnachu: ‘¿Pita ñucapi tacarircanguichi?’ nishpa tapujungui?— ninajurcami.

32Ashtahuangarin maijan paita tacarishcatapash ricungapajmi, Jesusca muyundita ricujurca.

33Shina ricujujpimi chai huarmica, ñami ali tucurcani yashpa, ninanda manllarishpa chujchurirca. Shina ali tucushca cashpami, Jesuspaj ñaupajpi cungurishpaca, na llullashpa tucuita villajurca.

34Shina villajpimi Jesusca, cashna nirca:

—Ñuca huahualla, ñucata tucui shunguhuan crishpami quishpirishcangui. Cunanga, ninanda cushijushpa rilla. Astinshna llaquichijuj chai nanaica, cutinga na llaquichingachu— nircami.

35Shina nijujpillatami, tandanajuna huasipi mandaj Jairopaj huasimandaca, ñapash huaquin runacuna shamushpa, cashna ninajurca:

—Cai Yachachijtaca, ¿imapajta yanga yanga fiñachijungui? Cambaj ushiguca, ñamari huañurca— ninajurcami.

36Ashtahuangarin chashna ninajujta Jesús uyashpami, tandanajuna huasipi mandaj chai runataca:

—Ama manllaichu, ñucatalla ali crihuai— nirca.

37Jesusca, tucuicunata saquishpami Pedrota, Jacobota, chai Jacobopaj huauqui Juandalla pushashpa rirca.

38Tandanajuna huasipi mandaj runapaj huasiman Jesús chayashpaca, gentecuna ninanda caparishpa huacanajujta, llaqui llaqui tianajujtami ricurca.

39Huasi ucuman Jesús yaicushpaca, cashnami nirca:

—¿Imashpata cangunaca, cashna caparishpa huacanguichi? Cuitsaguca, na huañushcachu, puñuitallami puñujun— nircami.

40Shina nijpimi, Jesustaca asishpa ricunajurca. Ashtahuangarin Jesusca, tucuillata canllaman llujchishpami, chai cuitsagupaj taitata, mamata, chai quimsa yachajujcunatalla pushashpa, chai cuitsagu sirijuj ucuman yaicurca.

41Chaipica, chai cuitsagupaj maquita japishpami:

—Talita cumi— nirca.

Chashna nishpaca: “Cuitsagu, candaca jatari ninimi” nijunmi.

42Shina nijpica, chai chunga ishcai huatata charij cuitsaguca, jatarishpa puri callarircallami. Shina purijujta ricushpami, gentecunaca ninanda manllarirca.

43Ashtahuangarin Jesusca, pai chashna rurashcataca pimambash ama villachun nishpami, cutin cutin nijurca. Shina nishpallami:

—Cai cuitsaguman micunaguta carapaichi— nishpa mandarca.