ISAÍAS 44 - Quichua Imbabura Bible

Mandaj Diosmi shujlla Taita Dios

1Cunanga, ñucata servij Jacobopaj mirai, ñuca agllashca israelcunalla uyahuaichi.

2Cangunata Ruraj, cangunapaj mamapaj vijsapi cajpi viñachij Mandaj Diosca, cangunataca ayudangami. Paica, cashnami nin: Ñucata servij Jacobopaj miraicunalla, na manllanachu canguichi. Jesurún, cambash na manllanachu cangui. Candapash ñucami agllarcani.

3Ñucami, yacu illaj pambapica yacuta talimusha. Chaquishca pambapica, jatun yacucunatami rurasha. Cangunapaj miraicunapimi, ñuca Espirituta cachamusha. Cangunapaj miraicunatami, chashna bendiciasha.

4Paicunaca, yacu manñapi jihua chaupipi, sauce yura viñanshnami llujshinga.

5Pai puramanda shujca: ‘Ñucaca, Mandaj Diospajmi cani’ ningami. Caishujca: ‘Jacobopaj miraimi cani’ nijungami. Shujca: ‘Mandaj Diospajllami cani’ nishpami, paipaj maquihuan shutita escribijunga. Cati shutitaca: ‘Israel’ nishpami escribijunga” ninmi.

6Israelcunata Jatun Mandajca, Mandaj Diosmi. Paicunata Quishpichijca, tucuita Mandaj Diosmi. Paica, cashnami nin: “Ñucami callaripash, tucuripash cani. Ñucamanda ashtahuan shuj Diosca, na tianllu.

7¿Maijanshi, jipa punlla ima tucunata villashpa, ñuca ñaupajpi callarishpa aliguta yachachinga? Punda gentecunata churai callarishcamandapacha ñuca villajunshnaca, ¿maijanshi villashpa catimun? Pipash shuj tiashpaca, ñalla ima tucugrijujtapash, jipa punllacuna ima tucunatapash villaichilla.

8Na manllanachu canguichi, chujchuitapash na chujchunachu canguichi. ¿Nachu pundallata cangunaman ña villarcani? Cangunami, ñucamanda villajcuna canguichi nircanimi. Ñucamanda ashtahuan shuj Taita Diosca na tianllu. Ñucallami Dios cani. Ñucashna ninan Ushaita Charij, shuj tiajtaca, na rijsinichu” ninmi.

Rurashcalla dioscunata mañajcunaca, juizu illajcunami

9Caspita imamambash rijchajta rurajcunaca, tucuilla paicunapash yangami. Paicuna rurashca chai dioscuna juyailla cashpapash, imapajpash na alichu. Chai yanga dioscuna na ricuj cajta, na yuyaita charij cajta, paicuna pingai tucungapajllata cajtaca paicunallata yachanmi.

10¿Pita shuj diosta rurarca? Na cashpaca imatapash yacuyachishpa, imamambash rijchajta rurashca, imapajpash na valij diostaca, ¿pita rurarca?

11Ricuichi, chaicunata catijcunaca, tucuicunami pingai tucunajunga. Chai dioscunata rurajcunaca, yanga runacunallami. Tucui paicuna tandanajushpa, Diospaj ñaupajpi ricurishpaca, manllarishpami pingai tucunajunga.

12Jirruta tacashpa trabajaj runaca, jirruta rupachishpa, tenazahuan japishpami, paipaj rigra ushaihuan juyaillata ruran. Chai jipaca, yarjachishpa ushai illaj tucushpa, yacuta na ufiashpaca, nimata na rurai ushanllu.

13Caspita imatapash ruraj runaca, caspi jahuapi shuj reglata churashpami, lapizhuan señalan. Chai jipaca, cepillohuan llagllashpa llambullata rurashpami, compasta japishpaca señalashpa, juyailla runaman rijchajta rurashpa huasipi churan.

14Bosquepi viñashca quirucunamandaca cedro, ciprés, encina nishca quirucunatami cuchun. Chai jipaca tamiahuan viñachunmi, pino yurata tarpun.

15Chai quirucunatallata, yamdata rurashpami rupachishpa cunun. Shinallata jornopi rupachishpami, tandata cusan. Chai caspitallatami, shuj diosta rurashpa alichin. Chashnami shuj yanga diosta rurashpa, paipaj ñaupajpi cungurishpa mañan.

16Chai puchushca caspicunataca, rupachishpa aichata cusashpami, vijsa pactajta micun. Chai jipaca, chai ninapi cunushpami: “¡Aij cunushcanimari, ninata ricushcanimari!” nijun.

17Chai puchushca caspicunataca, yanga, rurashcalla paipaj shuj diosta rurashpami, chai ñaupajpi cungurishpa mañan. Chai jipaca: “Quishpichihuai nipanimi, canmari ñuca dios cangui” nishpami mañan.

18Chashna rurajcunaca, imatapash na yachanllu, yuyaitapash na japinllu. Imata ricungapajpash, ñavi vichashcacunami. Shungupash, yuyaita na japi ushajcunami.

19Chaimandami imata rurajushcatapash, na yuyaipi japin. Imata rurajushcatapash, ali yarishpacarin: “Cai caspimandaca, ashataca rupachishpami, chai carbón ninayashcapica tandata, aichata cusashpa micurcani. ¿Chai puchu caspitachu, millanayai shuj diosta rurasha? ¿Chai quiru putu ñaupajpichu cungurisha?” yanmanmi.

20Uchufata micunshnami, paipaj alma ama cachariri ushachunga, paipaj shungullata umachishpa pandachin. Ali yuyaita japishpacarin: “Ñuca ali lado maquipica, ¿nachu yanga caspitalla charijuni?” yanmanmi.

Israelcunataca, Mandaj Diosmi quishpichin

21“Jacobopaj mirai israelcunalla, tucui chaicunataca aliguta yarichiyari. Cangunaca, ñucata servijcunami canguichi. Cangunataca, ñucami rurarcani. Ñucata servijcunami canguichi. Israelcunalla, ñucataca na cunganachu canguichi.

22Ñucata na cazushpa nalita rurashcataca, fuyutashnami chingachircani. Cangunapaj juchacunataca, yuraj fuyutashnami anchuchircani. Ñucapajman tigrarimuichi, ñucami cangunataca quishpichircani” ninmi.

23Jahua pachapash, juyailla candanacunahuan candaichiyari. Mandaj Dios ñucami, tucuita rurarcani. Cai pacha alpa ucucunapash, cushijushpa caparichiyari. Lomacunapash, ninanda alicachichiyari. Bosquecunapash, chaipi tiaj tucui quirucunapash, alicachichiyari. Mandaj Dios ñucami, Jacobopaj miraicunataca quishpichircani. Chaimandami, israelcunapash ninanda alicachinajunga.

24Mamapaj vijsapillata cajpi cuidaj, cangunata Quishpichij, Mandaj Diosca cashnami nin: “Ñucami, tucuita ruraj Mandaj Dios cani. Ñucallami, jahua pachatapash, cai pachatapash telata mandanshna churarcani. Ñucallami rurarcani.

25Yachajcuna imata rurashpa ricuchishcatapash, ñucami yangapi churani. Brujocunatapash, ñucami muspachini. Alipacha yachajushca runacunatapash, paicuna imatalla yachajushcatapash, ñucami huashaman tigrachishpa, yangapi churani.

26Ñucata servijcuna villachunga, ñucami yarichini. Ñuca cachajpi villangapaj rijcuna villashca pactachunmi rurani. Jerusalendaca: ‘Cambi causajcunaca, cutinmi causaj shamunga’ ninimi. Judá llactapi tiaj pueblocunatapash, cashnami nini: ‘Cutinmi ali shayachi tucushca canguichi. Tucuilla urmashca sirijcunatapash, cutinmi shayachishpa alichisha’ ninimi.

27Ucu ucupi tiaj yacucunatapash: ‘Chaquirichi’ ninimi. Cambi tiaj jatun yacucunatapash: ‘Chaquichishami’ ninimi.

28Ciro shuti mandajmandapash, cashnami nini: ‘Paimi, ñuca llamacunata michij canga. Tucui imatalla ñuca rurachun munashcatami ruranga. Jerusalendaca cutin alichi tucunguimi nijpi, shinallata ñuca huasitapash, shayachi tucunguimi’ nijpimi, chashna canga” ninmi.