GÉNESIS 48 - Quichua Imbabura Bible

Jacoboca, Efraindapash, Manasestapashmi bendiciashca

1Chai jipami, cashna tucurca: Josetaca: “Ricui, cambaj taitaca huañujunmi” ninajurcami. Shina nijpimi Joseca, Manasés shuti, Efraín shuti, paipaj ishcai churicunata pushashpa rirca.

2Jacobo yachachunmi: “Ricui, cambaj churi Joseca, cambajman shamujunmi” nishpa villarca. Shina villajpimi taita Israelca, shinlli tucushpalla jatarishpa camapi tiarirca.

3Shina tiarishpami Josetaca, cashna nijurca:

—Tucuita Rurai Ushaj Taita Diosmi, Canaán llactapi tiaj Luz shuti pueblopi ricurishpa bendiciashpa,

4cashna nihuarca: ‘Ricui, ñucami candaca mirachishpa, ashtacatapacha rurasha. Candaca, llactacunata callarichij cachunmi rurasha. Cai llactataca, cambaj cati mirai huahuacunamanmi, causaita causaicaman paicunapaj cachun carasha’ nihuarcami.

5Cunanga, Egipto llactaman cambajman ñuca nara shamujpillata, Egipto llactapi can charishca Efraín shuti, Manasés shuti cambaj ishcai huahuacunaca ñucapajmi. Paicunaca, Rubén shuti, Simeón shuti ñuca churicunashnallatami ñucapaj canga.

6Paicunapaj cati charishca huahuacunami cambaj canga. Paicunaca, paicunaman carashca llactapica, paicunapaj huauquicunapaj shutipimi rijsishca canga.

7Padan-aram shuti llactamanda ñuca shamujujpimi, Raquel shuti cambaj mamaca, Canaán llactapi huañuparca. Efrata shuti puebloman chayangapaca, ashalla rina tiajpillatami ñambi huañuparca. Shina huañujpimi, Efrataman rina ñan ladopi pambarcani. Chai pushtuca, Belén shutimi— nijurcami.

8Taita Israelca, Josepaj churicunata ricushpaca:

—¿Caicunaca picunata?— nircami.

9Shina nijpimi Joseca, paipaj taitataca:

—Taita Dios ñucaman cai llactapi carashca churicunami— nirca.

Shina nijpimi Jacoboca, cashna nirca:

—Cunanga, paicunata bendiciangapaj ñuca ladoman quimichimupai— nircami.

10Taita Israelca, ña rucugu cashpa, paipaj ñavipash ashtahuan nali cashpami, na ricui ushajurca. Chaimandami paicunata, Jacobopajman quimichijpi Jacoboca, paicunata muchashpa ugllarca.

11Chai jipami taita Israelca, Josetaca cashna nirca:

—Cambaj ñavita ricunataca, na yarcanichu. Ricui, Taita Diosmi caipi cambaj miraicunatapash ricuchun saquihuashca— nircami.

12Shina nishca jipami Joseca, chai churicunataca Jacobopaj cunguri chaupimanda anchuchishpa, alpaman chayangacaman cumurirca.

13Joseca, ishcandi churicunatami, Efraindaca ali lado maquihuan, Manasestaca lluqui lado maquihuan japishpa, Jacobopajman quimichirca. Shina quimichijpimi Efrainga, taita Israelpaj lluqui ladoman, Manasesca ali ladoman quedarca.

14Shina cajpimi taita Israelca, paipaj ali lado maquita chutashpa, jipa churi Efrainbaj umapi churarca. Paipaj lluqui lado maquitaca, Manasespaj umapimi churarca. Shinami Manasesca, punda churi cajpipash, paipaj maquita cruzashpa chashna churajurca.

15Josetaca, cashna nishpami bendiciajurca: “Taita Abrahambash, ñuca taita Isaacpash, Taita Diospaj ñaupajpimi purinajurca. Ñuca tiashca punllamandapacha cunangamanmi, Taita Diosllata charijuhuan.

16Tucui nalimanda ñucata huacaichishpa charijuj Angelca, chairalla viñai cai huambragucunata bendiciapachun. Ñuca shutica, paicunapi causaita causaicaman tiapachun. Shinallata taita Abrahambaj shutipash, ñuca taita Isaacpaj shutipash, paicunapi causaita causaicaman tiapachun. Cai pachapipash, ninanda miranajupachun” nijurcami.

17Ashtahuangarin paipaj taitapaj ali lado maquita, Efrainbaj umapi churajta ricujushpami, Joseca nalicachirca. Shinamandami, paipaj taitapaj maquitaca, Efrainbaj umamanda Manasespaj umaman yalichingapaj japirca.

18Joseca, paipaj taitataca cashnami nirca:

—Ñuca taitalla, mana cashnachu. Caimari punda churi capan. Cambaj ali lado maquitaca, paipaj umapi churapai— nircami.

19Ashtahuangarin paipaj taitaca, na chashna rurangapaj munashpami, cashna nirca:

—Chaitaca yachanimari, ñuca huahualla, yachanimari. Manasespashmari, ashtaca gentecuna tucushpa, jatunyachi tucushca canga. Ashtahuangarin paipaj jipa huauquimi, paitaca yalishpa ashtahuan jatun canga. Paipaj mirai huahuacunami, ashtacapacha llactacuna tucunga— nircami.

20Chai punllami, cashna nishpa bendiciajurca:

—Canmandami israelcunaca, cashna nishpa bendicianajunga: ‘Taita Diosca Efrainda, Manasesta bendiciashcashnallata candapash bendiciachun’ ninajungami— nishpami bendiciarca.

Shina nishpami Efraindaca, Manasespaj pundapi churarca.

21Chai jipami taita Israelca, Josetaca cashna nirca:

—Ricui, ñucaca ñami huañugrini. Ashtahuangarin Taita Diosmi cangunahuan canga. Shinamandami cangunataca, cangunapaj taitacunapaj llactaman tigrachinga.

22Ñucaca canmanmi, cambaj huauquicunaman carashca alpatapash ashtahuan yalishpa cararcani. Chai llactataca, ñucami amorreocunapaj maquimanda ñuca espadahuan, ñuca arcohuan macanajushpa quichurcani— nircami.