1Tucui israelcunami, Roboam shuti runata jatun mandaj cachun churangapaj, Siquem shuti puebloman tandanajushca carca. Chaimandami Roboam shuti runapash, chai Siquem shuti puebloman rirca.
2Nabat shuti runapaj churi Jeroboam shuti runaca, Egiptopi cashpa chaita yachashpami, Egiptomanda tigramurca. Paica, jatun mandaj Salomonda pacajushpami, chai llactapi causajurca.
3Chaipi causajujtami, cayachun cacharca. Shina cayajpi shamushpami, Jeroboam runapash tucuilla israelcunapash, Roboam runataca cashna ninajurca:
4—Yugota aparishcashna llaquita apanajujpipash, cambaj taitataca ashtahuanmi ñucanchitaca llaquichirca. Cunanga, llasha yugota apachinshna, cambaj taita shinllita servichishpa charishcamandaca, canga ashallatapash fangallayachiyari. Chashna rurajpica, canda servishpami causashun— ninajurcami.
5Shina ninajujpimi, Roboam runaca:
—Cunanmanda quimsa punllacaman, ñucapajman tigramunguichi— nirca.
Shina nijpica, gentecunaca rircallami.
6Chai jipami, jatun mandaj Roboam runaca, paipaj taita Salomón causajujpi, servishpa causanajushca mandaj rucucunataca, ali yuyaita cuchun mañashpa cashna nirca:
—Cai gentecunataca, ¿ima nishpa tigrachishpata ali canman, cangunaca ima yuyaitata cuhuanguichi?— nircami.
7Shina tapujpimi paicunaca, cashna nishpa tigrachinajurca:
—Cai gentecunahuan ali cashpa, juyailla shimicunata parlashpa paicunata cushichijpica, paicunapash paicunapaj tucui causaipimi, canda servishpa causanajunga— ninajurcami.
8Ashtahuangarin paica, chai mandaj rucucuna cushca yuyaitaca saquishpami, paihuanllata viñashca, paita servij chairalla runacunatara yuyaita cuhuaichi nishpa mañarca.
9Paicunataca cashnami nirca:
—Ñucataca cashnami ninajuhuarca: ‘Cambaj taita ñucanchiman llasha yugota apachinshna, shinllita servichishpa charishcamandaca, ashallatapash fangallayachiyari’ ninajurcami. Shina ningapaj shamuj gentecunataca, ¿ima nishpa tigrachishpata ali canman, cangunaca ima yuyaitata cuhuanguichi?— nircami.
10Shina nijpimi Roboam runahuan viñashca, chairalla runacunaca, cashna nishpa tigrachinajurca:
—‘Yugota aparishcashna llaquita apanajujpipash, cambaj taitataca ashtahuanmi ñucanchitaca llaquichijurca. Ashtahuangarin canga, ashallatapash fangallayachaiyari’ ningapaj shamuj gentecunataca, cai shimicunata cashna ningui: ‘Ñucapaj uchilla dedoca, ñuca taitapaj huasha lomotapash yali racumi.
11Ñuca taitaca, cangunaman llasha yugota apachinshnami llaquichijurca. Ñucacarin ashtahuanmi chai yugotaca llashayachisha. Ñuca taitaca, azialcunahuan astishpami llaquichijurca. Ñucacarin, alacrangunahuan llaquichisha’ ningui— ninajurcami.
12Jatun mandaj Roboam runaca: “Caimanda quimsa punllacaman ñucapajman tigramunguichi” nishcami carca. Shina nishcashnallatami, ña quimsa punlla tucujpica Jeroboam runaca, tucui gentecunandi Roboam runapajman shamurca.
13Shina shamujpimi jatun mandaj Roboam runaca, mandaj rucucuna ali yuyaita cushcataca yangapi churashpa, shinllitapacha rimarca.
14Chairalla runacuna yuyaita cushcashnallatami, cashna nishpa rimarca: “Ñuca taitaca, llasha yugota apachinshnami llaquichirca. Ashtahuangarin ñucaca, chai yugotaca ashtahuanmi llashayachisha. Ñuca taitaca, azialcunahuan astishpami llaquichirca. Ñucacarin alacrangunahuanmi llaquichisha” nircami.
15Jatun mandajca, israelcuna mañanajujtaca na uyanayachircachu. Taita Diosllatami, chashna rurarca. Mandaj Diosca, Silo shuti pueblopi causajuj Ahías shuti runaguhuan, Nabat shuti runapaj churi Jeroboam runaman villachishca pactachunmi, chashna rurarca.
16Tucui israelcunaca, paicuna mañashcata jatun mandaj na uyanayachijpimi, jatun mandajtaca cashna tigrachinajurca: “Davidmandaca, ¿imatallapash japinachu canchi? Isaí runapaj churimandaca, imata japinatapash na charishpami causanchi. ¡Israelcuna, tucuicuna cangunapaj carpacunaman richilla! ¡David cunanga, cambaj familiacunataca ricunguilla!” ninajurcami.
Shina nishpami tucuilla israelcunaca, paicunapaj carpacunaman rinajurca.
17Ashtahuangarin Roboam runaca, Judá llactapi tiaj pueblocunapi causanajuj israelcunatallami mandajurca.
18Shina mandajushpami jatun mandaj Roboam runaca, impuestota japij Adoram shuti runataca, israelcunapajman cacharca. Ashtahuangarin paica, israelcuna rumicunahuan pegajpimi huañurca. Chaimandami jatun mandaj Roboam runaca, paipaj carretapi ucha vitsiashpa, Jerusalenman pacajushpa rirca.
19Chashnami israelcunaca, Davidpaj huasi ucu puramandaca cunangaman shicanyarishca causanajun.
Who We AreWhat We EelieveWhat We Do
2025 by iamachristian.org,Inc All rights reserved.
