ISAÍAS 66 - Quichua Imbabura Bible

Mandaj Diosca, Sion shuti pueblota llaquichishca jipaca cutin alichingami

1Mandaj Diosca, cashnami nin: “Jahua pachaca, ñuca mandashpa tianami. Cai pachaca, ñuca chaqui sarunami. ¿Maipishi ñuca huasitaca shayachinguichi? ¿Maipishi ñuca samanataca ruranguichi?” ninmi.

2Mandaj Diosca, cashnatapashmi nin: “Tucui caicunataca, ñuca maquihuanmi rurarcani. Chaimandami, tucui caicunaca tian. Ashtahuangarin ñucaca imagutapash na charijta, shungupi na jariyajta, ñuca mandashcata manllaihuan cazujtami cuidasha.

3Huagrata huañuchishpa ñucaman cushcapash, shuj runata huañuchishpa cushcashnami. Llamata huañuchishpa cushcapash, alcuta huañuchishpa cushcashnami. Imaguta ñucaman cushcapash, cuchi yahuarta cushpa talishcashnami. Inciensota rupachishcapash, yanga diosta mañashcashnami. Paicuna munashcata agllashpa catishpami, millanayaicunata ruranatara tucui shunguhuan juyanajurca.

4Chaimandami ñucapash paicunataca, nalicachi tucuchun agllasha. Paicuna manllashca jatun llaquitami cachamusha. Paicunaca ñuca cayajpipash, pipash na tigrachircachu. Ñuca rimajpipash, na uyarcachu. Ashtahuangarin ñuca na munashcacunata agllashpami, ñuca ñaupajpillata nalita ruranajurca” ninmi.

5Mandaj Dios mandashcata manllaihuan cazujcuna, pai rimashcata uyaichiyari. Paica, cashnami nin: “Cangunata na ricunayachijcunara, ñuca shutipi mañajpi, llujchishpa cachaj cangunapaj huauquicunarami cashna ninajun: ‘Mandaj Diosca, pai punchapamba cajta ricuchishpami ali canman’ ninajunmi. Ashtahuangarin Diosca, cangunata cushichingapajmi ricuringa, paicunaca pingai tucungami.

6Jerusalén pueblopica, jatun caparinajuimi uyarijun, Diospaj huasipi rimashcami uyarijun. Paita fiñajcunata, Mandaj Dios rimashpa llaquichijujmi uyarijun.

7Nara unguna punlla pactajpillatami ungurca. Unguna nanai nara japijpillatami, jari huahuata ungurca.

8¿Maijanshi chashna tucunataca uyarca? ¿Maijanshi chashna tucunataca ricurca? ¿Shuj punllapillachu, cai pachaca ungushca? ¿Shuj viajepillachu, shuj llactaca ungushca? Sion shuti urcupi causajcunaca, unguna nanai japijpimi, huahuacunata ungurca.

9Ñucallata unguchij cashpaca, ¿nachu unguchinalla cani? Pai huacharinataca, ¿imapajta jarcana cani? Cangunata Mandaj Taita Dios ñucami, chashna nini.

10Jerusalenda juyajcunaca, tucuicuna paihuan ninanda cushijuichiyari. Paimanda yanata churajushpa llaquirijcunaca, tucuicuna cushijuihuan junda caichiyari.

11Llaquimanda paita samachijpica, paipaj chuchuta na munajta chuchushpami cushijunguichi. Pai juyailla punchapamba cajpimi, paipaj lecheta ufiashpa cushijunguichi” ninmi.

12Mandaj Diosca, cashnami nin: “Ricuichi, ñucaca paipica casilla ali causaitami, jatun yacutashna churani. Llactacunapi causajcuna imaguta charishcacunapash, tucuilla t'unishpa yacu shamunshnami shamunga. Paicunami, cangunataca chuchuchinga, rigrapi marcashpami pushamunga, cunguri jahuapi churashpami juyanajunga.

13Shuj mama paipaj huahuata cushichinshnami, ñucapash cangunataca cushichisha. Jerusalenbimi, cushijuita japinguichi” ninmi.

14Cangunaca chaita ricushpami, tucui shunguhuan cushijunguichi. Cangunapaj tullucunapash, jihua verdeyanshnami mushujyanga. Mandaj Diospaj maquica, paita servijcunapaca rijsishcami canga. Ashtahuangarin paita fiñajcunataca fiñangami.

15Ricuichi, Mandaj Diosca nina chaupipimi shamunga. Jatun acapanashna calpaj carretacunahuanmi chayamunga. Shina shamushpaca, pai ninandapacha fiñarishcata chaipi saquingapajmi, rupajuj ninahuan jarcashpa llaquichingapaj shamunga.

16Mandaj Diosca, tucui gentecunatami, ninahuan, paipaj espadahuan llaquichinga. Mandaj Dios huañuchishcacunaca, ashtacapachami canga.

17Mandaj Diosca, cashnami nin: “Ima mapa illaj cangapaj alichirijcunaca, huerta chaupicunaman huashan huashan rishpami, cuchi aichata, ucucha aichata, ima shuj millanayai animalcunapaj aichata micunajun. Chashnacunaca, tandachishpami tucuchi tucunga.

18Ñucaca, paicuna imata ruranajujtapash, imata yarinajujtapash yachanimi. Tucui llactacunamanda shican shican rimaita rimaj, tucui runacunata tandachina punllacunami chayamunga. Paicuna shamushpami, ñuca punchapamba cajtaca ricunajunga.

19Ñucaca paicuna purapica, shuj ricuchinatami churasha. Chai jipami, pacajushpa quishpirishcacunataca, shuj llactacunaman cachasha. Tarsis shuti puebloman, arcocunahuan macanajuj Fut shuti, Lud shuti llactacunaman, Tubal shuti, Javán shuti llactacunamanmi cachasha. Shinallata ñuca pi cajta nara uyaj, ñuca punchapamba cajta nara ricuj mama cucha manñapi tiaj caru llactacunamanmi cachasha. Paicunami, ñuca punchapamba cajtaca, shuj llactacunapi causajcunaman villanajunga.

20Paicunami tucui cangunapaj huauquicunataca, tucui llactacunapi causanajuj puramanda pushamunajunga. Mandaj Diosman cungapajmi caballocunapi, carretacunapi, toldushca huandunacunapi, mulacunapi, camellocunapi tiachishpa, ñucapajlla urcupi tiaj Jerusalenman pushamunajunga. Israelcuna ñucaman cuna cashcata, mapa illaj imapash charinacunapi, Mandaj Diospaj huasiman apamushpa cunshnami, ñuca ñaupajpi churanajunga. Caitaca, Mandaj Dios ñucami, chashna nini.

21Paicuna puramandaca curacuna cachun, levitacuna cachunmi, maijandapash agllasha” ninmi Mandaj Diosca.

22Mandaj Diosca, cashnatapashmi nin: “Ñuca rurashca mushuj jahua pachapash, mushuj cai pachapash, causaita causaicamanmi ñuca ñaupajpi canga. Shinallatami cangunapaj miraicunapash, causaita causaicaman causanga, cangunapaj shutipash causaita causaicaman na chingangachu.

23Cada quilla, cada samana punllapimi, tucuicuna ñuca ñaupajman shamushpa, ñucata ninanda alicachinajunga. Mandaj Dios ñucami, chashna nini.

24Ñuca ñaupajmanda llujshishpaca, ñucata na cazushpa jariyajcuna, huañushca sirinajujtami ricunga. Paicunata micuj jurucunaca, napacha huañuj jurucunami canga. Paicunata rupachij ninapash, napacha huañuj ninami canga. Paicunaca, tucui gentecunapaj ñaupajpimi, millanayachi tucushca canga” ninmi.