FILIPENSES 4 - Quichua Imbabura Bible

Apunchi Jesushuan tucui causaipi cushijuichi nishcami

1Cunanga, ñuca juyashca huauquicuna, panicuna, cangunata ricungapajmi ninanda munani. Cangunaca, ñucata ninanda cushichijcunami canguichi. Cangunamandami, coronaguta japigrinataca charini. Juyashca crijcuna, Apunchi Jesustaca shinllipacha tucushpa catipanguichi ninimi.

2Evodia shuti, Síntique shuti panicuna. Cangunataca, Apunchi Jesusmanda shujlla cashcata yarishpa causapaichi ninimi.

3Ñucahuan Diospajta ruraj can huauquitaca, caitapashmi nini: Chai panicunaca, Clemente shuti huauquihuan, shuj huauquicunandimi, ali villaita ñuca villajujpica, na manllashpa aligutapacha ñucata ayudahuarca. Chaimandami, paicunataca ayudapai nini. Paicunapaj shuticunataca, causaita causagrinata ricuchijuj libropimi, escribishca tiajun.

4Apunchi Jesushuan shujlla tucushcamandaca, tucui causaipi cushijupaichi. Cutimbash: ¡Cushijupaichi! ninimi.

5Canguna llaquishpa causanajujtaca, tucui gentecuna yachachunmi munani. Apunchi Jesús shamunaca, ñami chayamujun.

6Ima illajpipash, na chaitalla yariashpa llaquilla causanachu canguichi. Ashtahuangarin Taita Diosmanmi, imatapash villashpa ninanda mañana canguichi. Tucui imamandapash pashi nishpa mañaichilla.

7Casilla ali causaitaca, Taita Diosmi caramunga. Chashna aliguta causanataca, pipash na yachajui ushanalla cajpimi, cangunapaj shungutapash, yuyaicunatapash, Cristo Jesushuan shujlla tucushcamanda huacaichijunga.

Caitallami yarina canguichi

8Huauquicuna, panicuna, caitallami ningapaj munani: Imapipash na llullashpa, maipipash aliguta causashpa, imatapash cashcatapacha rurashpa, tucuipi mapa illaj canata, tucuicunata juyaj canata, tucuipi ali canata, tucuicuna juyashca canata, alicachishca canata munashpaca, caitallami yarina canguichi.

9Ñuca yachachijpi yachajushcata chasquishpami, catina canguichi. Ñuca imata rurashpa ricushcatapash, uyashcatapashmi catishpa rurana canguichi. Shina causajpimi, casilla ali causaita caraj Taita Diosca, cangunahuan canga.

Filipos pueblopi causaj crijcunami, Pabloman culquita carashca

10Ñucata cutin yarishpa canguna caramujpimi, Apunchi Jesusmandaca ninandapacha cushijuni. Ñucata cungashcataca, na ninichu. Ashtahuangarin ñucata yarishpapash, cachamuitallami na usharcanguichi.

11Imapash illaimandaca, na cashna nijunichu. Imata charishpapash, chaigullahuan cushijushpa causanatami yachajurcani.

12Charishpapash, na charishpapash, imashna causanatapash, tucuipi imashna causanatapash yachanimi. Micushpa causanatapash, na micushpa causanatapash yachanimi. Charij causanatapash, imapash illaj causanatapash yachanimi.

13Cristo shinllipacha ushaita carajpimi, tucuita rurai ushani.

14Shina cajpipash, ñuca jatun llaquipi cajta ricushpami cangunaca, ñucataca cushichingapaj carahuarcanguichi.

15Filipos pueblopi causanajuj crijcuna, cangunallata ñami yachanguichi. Ali villaita villai callarijushpa, Macedonia shuti llactamanda ñuca rijujpica, tandanajuj chaishuj crijcunaca, imagutapash na carahuarcachu. Ashtahuangarin cangunallami, ñuca villajujta uyashcamanda, culquiguta cararcanguichi.

16Ñucaca, Tesalónica pueblopi cashpa, imagupaj na charijpipash, cangunami cutin cutin carashpa cachamurcanguichi.

17Imatapash carahuachun yachashpaca, na chashna nijunichu. Ashtahuangarin Diospaj ñaupajpi, cangunapajllata ashtahuan japigrina mirachunmi, cashnaca nijuni.

18Canguna caramushcagutaca, tucuita japishpami, cunanga ashtacata charini. Epafrodito shuti huauquiman mingashpa cachamushcahuangarin, ashtahuanmi charini. Canguna cachamushcami, Diosman carashpa rupachijpi, mishquillagu ashnajunshna tucushca. Chaitaca, Taita Diosmi cushijushpa chasquijun.

19Ñuca Taita Diosca, imagutapash ninandami juyailla charin. Chaitami, canguna imaguta charichumbash, Cristo Jesusmanda caramunga.

20Shina cashcamandaca ñucanchi Taita Diostami, causaita causaicaman punchapambagumi cangui nina canchi. Shina cachun.

Aliguta causapanguichi nishpami tucuchishca

21Cristo Jesusmanda Diospajlla causajcunataca, tucuicunata alillachu capanguichi nijunmi nipanguichi. Ñucahuan purinajuj huauquicunapashmi, cangunataca alillachu capanguichi ninajun.

22Diospajlla causajcunapash, tucuicunami cangunataca alillachu capanguichi ninajun. Cesarpaj huasipi causanajuj crijcunacarin, ninandapachami cangunataca alillachu capanguichi ninajun.

23Ñucanchi Apunchi Jesucristopaj ninan juyaica, tucui cangunahuan cachunmi munani. Shina cachun.