ISAÍAS 34 - Quichua Imbabura Bible

Llactacunapi causajcunahuanmi, Mandaj Diosca ninanda fiñarishca

1Tucui llactacunapi causajcuna, tandanajushpa uyangapaj quimirimuichiyari. Tucui gentecunapash, aliguta uyaichiyari. Alpa pachapash, chaipi imalla tiajcunapash, cai pachapash, chaipi imalla tiajcunapash, uyaichiyari.

2Mandaj Diosca, tucui llactacunapi causajcunahuan, chai llactapaj tucui soldadocunahuanmi, ninanda fiñarishca. Paicunataca, huañuchijpaj maquipi churashpami tucuchinga.

3Chai huañushcacunataca, shitashpami saquinga. Chai huañushca cuerpocunaca, ninandami ashnanga. Paicunapaj yahuarhuanmi, urcucunaca yacuyanga.

4Jahua pachapi tucui tiashcacunami, yacuyashpa tucuringa. Jahua pachaca, librota pillujpishnami pilluringa. Chaipi tucui punchayachijcunapash, uvas yuramanda, jigos yuramanda fangacuna urmanshnami urmamunga.

5Ñuca espadaca, jahua pachapimi yahuarsapa tucunga. Ricui chai jipaca, Edom llactata llaquichingapaj urai shamushpami, ñuca tucuchingapaj shicanyachishca gentecunatapash llaquichinga.

6Mandaj Diospaj espadaca, yahuarsapami. Maltun llamacunapaj, jari chivocunapaj virahuan, ninanda javirishcami. Maltun llamacunapaj riñon virapashmi javirishca. Mandaj Diosca, animalcunata cushpa huañuchinshna ninandapacha huañuchinatami, Bosra shuti pueblopipash, Edom shuti llactapipash charin.

7Paicunahuanga, búfalo nishca animalcunapash, huagracunapash, shicucunapashmi, huañuchi tucunajunga. Chaimandami paicunapaj llactaca, yahuarsapa tucunga. Paicunapaj ñutu alpapash, virahuanmi sanguringa.

8Mandaj Dios paicunata llaquichina punllami chayamugrin. Sionbi causajcunata llaquichishcamanda, paicunatapash chashnallata llaquichina huatami chayamugrin.

9Jatun larca yacucunapash, brea nishcamanmi tigranga. Ñutu alpaca, azufremanmi tigranga. Tucui alpami, ninayashca brea tucunga.

10Tutapash, punllapash na huañushpa rupajujpimi, cushnica causaita causaicaman vichai rijunga. Mirai miraicunacamanmi, jichushca siringa. Chaitaca, napacha pipash ashtahuan yalingachu.

11Pelícano, erizo nishca animalcunami, chai llactataca doñoyanga. Chushijpash, cuervo nishca animalpashmi chaipica causanga. Tucuchij cordelta, llaquinayaita tucuchij nivelcunata chutashpami, chai llactataca tucuchinga.

12Paicunata mandajcunatapash, mandana llacta illaj mandajcuna ninajungami. Jatungunapash, yangallami tucunga.

13Paicuna mandanajushca huasicunapipash, cashacunami jundanga. Torrecunapica tsinicuna, sacha jihuacunami viñanga. Chai ucucunaca, chacal nishca animalcuna causanami canga. Canlla patiocunaca, avestruz nishca animalcunapaj huahuacunapajmi canga.

14Jichushca pambacunapi causaj animalcunami, hiena shuti animalcunahuan chapurishca purinajunga. Sachapi causaj huarmi chivopash, paipaj cumbata cayashpami, huacashpa purijunga. Chushijpash, chaipillatami causajunga. Chaipica, casilla aligutami causanajunga.

15Chaipimi chushijpash tazinda rurashpa, lulunda huachashpa huahuacunata llujchinga. Chai huahuacunataca, alas ucupimi charinga. Cundurcunapash, chaipimi paicunapaj huarmi cundurcunahuan tucuilla causanajunga.

16Mandaj Diospaj librota ali ricuichi. ¿Chaipi imapash illanllu? Aliguta leyichi. Tucui animal puracunamandaca, shujllapash na illarcachu. Paipaj shimihuan rimashpami, paipaj Espirituhuanllata chaiman tandachirca.

17Paillatami, suertecunata rurashpa maipi churana cajpipash, cordelhuan medishpa paicunaman alpacunata curca. Chaipica, mirai miraicamanmi causanajungalla.