MATEO 10 - Quichua Imbabura Bible

Chunga ishcai apostolcunatami Jesusca agllashca(Mar. 3:13-19; Luc. 6:12-16)

1Chai jipallami Jesusca, paipaj chunga ishcai yachajujcunata cayashpaca, mapata rurachij ayacuna jundashca causanajuj gentecunamanda ayacunata llujchi ushachun, paicunaman ushaita curca. Shinallata tucui nanaihuan, tucui ung:uicunahuan huañujujcunata alichi ushachumbashmi, ushaita curca.

2Chai chunga ishcai apostolcunapaj shuticunaca, caicunami: Tucuicunapaj pundami, Pedro nishca Simón carca. Paipaj huauqui Andrespashmi carca. Shinallata Zebedeo shuti runapaj churicunapashmi carca. Paicunaca, Jacobo shuti, Juan shutimi carca.

3Shinallata Felipe, Bartolomé, Tomás shuti runacunapashmi carca. Impuestota japij Mateopashmi carca. Alfeo shuti runapaj churi Jacobopash, Tadeo nishca Lebeo shuti runapashmi carca.

4Cananita nishca Simón runapash, Jesusta japichij Judas Iscariote shuti runapashmi carca.

Chunga ishcai yachajujcunatami, villachun cachashca(Mar. 6:7-13; Luc. 9:1-6)

5Chai chunga ishcai purata cachajushpami Jesusca, cashna nishpa yachachijurca: “Na israelcuna causanajuj llactacunataca, na rinachu canguichi. Samaria llactapi tiaj pueblocunamambash, na yaicunachu canguichi.

6Ashtahuangarin chingashca llamacunashna causanajuj israelcunapajmanmi rina canguichi.

7ña rinajushpaca, cashna nishpa villashpandi ringuichi: ‘Jahua pachamanda Dios mandanaca, ñami chayamushca’ ninguichi.

8Huañujujcunatapash, lepra ung:uihuan ungushcacunatapash alichinguichi. Huañushcacunatapash causachinguichi. Ayacunatapash, gentecunamanda llujchinguichi. Chai ushaitaca, juyaihuan cangunaman carajpimi japircanguichi. Shinallatami, juyaihuan chashna rurana canguichi.

9Canguna chumbilishcacunapica orotapash, culquitapash na apanachu canguichi.

10Ñambi micungapaj, cucavi muchilatapash na apanachu canguichi. Túnica nishca churajunatapash, ishcaitaca na apanachu canguichi. Chaquipi churajunatapash, tauna caspitapash, na apanachu canguichi. Imaguta rurajcunapash, paicuna micungapaca chaimandallatami japinata charin.

11Ashtahuangarin maijan puebloman, maijan uchilla llactaman yaicushpapash, cangunata cushilla mingachina runagutami, tapushpa mascana canguichi. Chaipimi, shuj llactaman yalingacaman mingarina canguichi.

12ña huasiman yaicushpaca: ‘¿Alillachu capanguichi?’ ninami canguichi.

13Chai huasipi mingachij ali cajpica, paicunapaca casilla ali causaigumi tianga. Ashtahuangarin nalicuna cajpica, casilla ali causaiguca cangunamanllatami tigranga.

14Maijan huasipi cashpa, pueblopi cashpapash, cangunata na chasquishpa canguna villajujtapash na uyangapaj munajpica, llujshishpa ringuichilla. Chaimandaca, cangunapaj chaquipi churajushcapi catijuj alpatapash chafsishpa ringuichi.

15Na llullashpami, cangunataca cashna nini: Imatalla rurashcata Dios ricuchijui punllapica, Sodoma shuti, Gomorra shuti pueblocunapi causashca gentecunata llaquichishcatapash ashtahuan yalitami, chai pueblopi causajcunataca ninanda llaquichinga.

Gentecuna catiriashpa llaquichinaca chayamujunmi

16Ricuichi, ñucami cangunataca atujcunapaj chaupipi, llamacunata cacharinshna cachajuni. Shinamandami, cangunaca culebrashna aligutapacha yarishpa purina canguichi. Shinallata palomagushna, ali shunguhuanmi purina canguichi.

17Aligutapacha yariashpa puringuichi. Cangunata japishpaca, mandajcunapaj maquipimi churanajunga. Shinallata tandanajuna huasicunapimi astinajunga.

18Ñucata catinajushcamandaca, llactata mandajcunapaj ñaupajman, jatun mandajcunapaj ñaupajmanmi apai tucunguichi. Paicunamambash, na israelcunamambash, ñucamandaca villangapajmi chashna apai tucunguichi.

19Ashtahuangarin chashna apai tucushpaca: ‘¿Imashnata rimasha, imatata nisha?’ nishpaca, na manllanachu canguichi. Canguna rimajui horaspica, imata rimachumbash Dios cujpimi rimanguichi.

20Chaipica, na cangunapaj munai rimanguichichu. Ashtahuangarin, cangunapaj Taitapaj Espíritu cangunapaj shungupi yarichijpimi, rimanguichi.

21Huauquillatami, paipaj huauquitaca huañuchijcunaman japichinga. Taitallatami, paipaj huahuataca, huañuchijcunaman japichinga. Huahuacunapash taitata, mamata ninanda na ricunayachishpami, huañuchi tucuchun japichinga.

22Ñucata catinajushcamandami cangunataca, tucuilla gentecuna ninanda millanayachinga. Ashtahuangarin tucurimui punllacaman llaquicunata apajllami quishpiringa.

23Cangunata llaquichingapaj cai pueblopi callarijpica, shuj puebloman pajacushpa ringuichi. Na llullashpami, cangunataca cashna nini: Israel llactapi tiaj pueblocunapica, Runa Aichayu tucushca ñuca tigramungacamambash, nara tucui pueblocunapi villashcachu canguichi.

24Yachajujca, paita yachachijtaca na yalichu, servijpash paipaj amotaca na yalichu.

25Yachajujca, paita yachachinshnallata ali yachajushca cashpaca, alimi canga. Servijpash, paipaj amoshnalla tucushpaca, alimi canga. Familiata mandaj taitataca: ‘Ayacunata mandaj Beelzebú shuti diablomi cangui’ nishpacarin, huasi ucu purataca ashtahuanmi ninanda nalicachinajunga.

Maijanda manllanatami Jesusca yachachishca(Luc. 12:2-9)

26Chashna llaquichinata yachashpapash, na manllanachu canguichi. Imata pacalla ruranapash, chai rurashcacunaca ricuringapachami. Na yachai ushanalla ima pacallapash na tianllu.

27Ñuca cangunaman yana tutapi villashcataca, punllami villana canguichi. Ñuca cangunaman rinripilla yachachishcataca, huasi jahuamanda caparishpami villana canguichi.

28Cangunapaj cuerpota huañuchij gentecunataca, na manllanachu canguichi. Ashtahuangarin Diostallami manllana canguichi. Paimi, almatapash, cuerpotapash ucu pachapi tucuchingapaj ushaita charij Diostami manllana canguichi.

29¿Nachu ishcai gorrión nishca alasyu animaltaca, shuj uchilla culquipajlla jatun? Shina cashpapash chaicunaca, shujllapash cangunapaj Taita na cacharimujpica, na urmamunllu.

30Cangunapaj uma ajchatapash, tucuillata cuentashcallami.

31Shinamandami gentecunataca, na manllana canguichi. Cangunaca, ashtaca gorriongunatapash yali valishcami canguichi.

32Maijambash shujcunaman ñucamanda villajpica, ñucapash paicunataca jahua pachapi tiajuj ñuca Taitamanmi villasha.

33Ashtahuangarin gentecunapaj ñaupajpi: ‘Paitaca na rijsinichu’ nishpa ñucata nijpica, ñucapash jahua pachapi tiajuj ñuca Taitapaj ñaupajpimi: ‘Paitapash na rijsinichu’ nisha.

Ñucata crijpica, fiñangami nishpami Jesusca yachachishca(Luc. 12:49-53; 14:26-27)

34Cai pachapi causajcuna casilla ali causaita charichunmi, shamushca yahuanguichiman. Casilla ali causaita charichunga na shamurcanichu, ashtahuangarin macanajui tiachunmi shamurcani.

35Ashtahuangarin na shujlla yuyai tucushpa, churipash paipaj taitata, ushipash paipaj mamata, jachumbash paipaj suedrata fiñachunmi shamurcani.

36Chashna fiñajcunaca, quiquin huasi ucu purallatami canga.

37Ñucata na tucui shunguhuan juyashpa, paipaj taitata, mamatara ashtahuan juyajca, napacha ñucapajlla causaita ushanllu. Shinallata ñucata na tucui shunguhuan juyashpa, paipaj churita, paipaj ushitara ashtahuan juyajca, napacha ñucapajlla causaita ushanllu.

38Maijan cashpapash paipaj cruzta aparishpa ñucata na catijca, napacha ñucapajlla causaita ushanllu.

39Paipaj cai causaitara ashtahuan juyashpaca, chingaitami chingagringa. Ashtahuangarin ñucata catijushcamanda huañuchi tucushpaca, causaitami charigringa.

Alicunata japinatami villajun(Mar. 9:41)

40Cangunata chasquijcunaca, ñucatami chasquin. Ñucata chasquijcunaca, ñucata cachamuj Taitatami chasquin.

41Profeta runagu cajpi, Profeta chai runaguta maijambash chasquishpaca, chai chasquijcunapash villaj runagu japina cashcashnallatami, chasquij runapash japinga. Shinallata imatapash cashcatapacha ruraj runagu cajpi, imatapash cashcatapacha ruraj chai runaguta chasquishpaca, chai chasquijcunapash imatapash cashcatapacha ruraj chai runagu japina cashcashnallatami japinga.

42Na llullashpami, cangunataca cashna nini: Ñucata catinajujcuna cai uchillagucunashna causajcunaca, ñucapaj yachajujcunami. Shina cashcamanda maijan cashpapash paicunaman chiri yacugutallapash pilchipi carajcunaca, Dios carajpi japinataca napacha chingachingachu” nijurcami.