JUECES 11 - Quichua Imbabura Bible

1Galaad shuti llactapi causajuj Jefté shuti runaca, macanajunata ali yachaj shinlli runami carca. Paipaj mamaca, culquimanda huainayaj huarmimi carca. Jefté runapaj taitaca, Galaad shutimi carca.

2Ashtahuangarin Galaad shuti runapaj huarmica, churicunatami paiman ungurca. Chai churicuna viñashpami Jefté runataca, cashna nishpa llujchishpa cacharca: “Canga, shuj huarmipaj churi cashcamandami, ñucanchi taitapaj huasi ucu purapica, imatapash na japina cangui” ninajurcami.

3Chaimandami Jefté runaca, paipaj huauquicunamanda pacajushpa rishpa, Tob shuti llactapi causajurca. Chaipica, imata rurangapajpash na munaj runacunahuan tandanajushpami, paicunahuan llujshin carca.

4Huaquin huatacuna yalishca jipami, cashna tucurca: Amonitacunami, israelcunahuan macanajunajurca.

5Amonitacuna israelcunahuan macanajuj shamujpimi, Galaad llactata mandaj rucucunaca, Tob shuti llactamanda Jefté runata pushamungapaj rinajurca.

6Chaipimi Jefté runataca, cashna ninajurca: —Amonitacunahuan macanajungapaj jacu. Canga, ñucanchita mandaj tucunguillami— ninajurcami.

7Shina nijpimi Jefté runaca, Galaad llactata mandaj rucucunaman, cashna nishpa tigrachirca: —¿Nachu ñucataca na ricunayachishpa, ñuca taitapaj huasimanda llujchishpa cachamuhuarcanguichi? ¿Imashpata cunanga llaqui japijpilla, ñucapajman shamunguichi?— nircami.

8Shina nijpimi, Galaad llactata mandaj rucucunaca, Jefté runaman cashna nishpa tigrachinajurca: —Ari, shinamandallatami cunanga cambajman cutin shamupanchi. Ñucanchihuan rishpa, amonitacunahuan macanajushpa, Galaad llactapi causanajuj tucui ñucanchita mandaj tucuchunmi, pushaj shamupanchi— ninajurcami.

9Shina nijpimi Jefté runaca, Galaad llactata mandaj rucucunataca, cashna nirca: —Amonitacunahuan macanajuchun, canguna ñucata tigrachijpi, chai runacunata ñuca maquipi Mandaj Dios churajpica, ¿cangunata mandaj tucushallachu?— nircami.

10Shina nijpimi, Galaad llactata mandaj rucucunaca, cashna nishpa tigrachinajurca: —Can nishcashna ñucanchi na rurajpica, Mandaj Diosllata candapash, ñucanchitapash ricupachun— ninajurcami.

11Shina nijpimi Jefté runaca, Galaad llactata mandaj rucucunahuan shamurca. Shina shamujpimi, chai llactapi causajcunaca juez tucushpa, paicunata mandaj cachun agllanajurca. Jefté runaca, Mandaj Diospaj ñaupajpi Mizpa shuti pueblopica, chai shimicunatami tucuita parlajurca.

12Jefté runaca villaj runacunatami, amonitacunata jatun mandajman cashna nichun cacharca: “Canga, ¿imamandata ñucata fiñashpa, ñuca llactapi causajcunahuan macanajungapaj shamungui?” nichunmi cacharca.

13Shina nijpimi, amonitacunata jatun mandajca, Jefté runa cachashca villaj runacunataca, cashna nishpa tigrachirca: “Israelcuna Egiptomanda vichai shamunajushpami, Arnón shuti jatun yacumanda callarishpa, Jaboc shuti yacucaman, Jordán yacucamambash, ñuca llactata quichurca. Cunanga, na macanajushpallata chai llactataca tigrachihuachunlla” nircami.

14Shina nijpimi Jefté runaca, cutin shuj villaj runacunata, amonitacunata jatun mandajpajman cacharca.

15Paicunataca, cashna nichunmi cacharca: “Jefté runaca, cashnami nin: ‘Israelcunaca, Moab shuti llacta alpataca na quichushcachu. Amonitacunapaj alpatapash na quichushcachu.

16Israelcunaca, Egiptomanda vichai shamushpami, jichushca pambata purishpa, Puca Cuchacaman chayamushca. Chaimandaca, Cades shuti pueblomanmi chayamushca.

17Chaiman chayashpami, Edom shuti llactata jatun mandajtaca: Ñucami, cambaj llactata yalingapaj ñanda mañachi nipani nichunmi, villaj runacunata cachashca. Ashtahuangarin Edom llactata jatun mandajca, na uyashcachu. Shinallata Moab llactata jatun mandajpajmambashmi cachashca. Paipash, na uyangapaj munashcachu. Chaimandami israelcunaca, Cades shuti pueblopillata quedashca.

18Chai jipaca, jichushca pambata rishpami, Edom llactata, Moab llactata muyushca. Moab llactamandaca, indi llujshimuj ladota shamushpami, Arnón shuti jatun yacu chimba ladopi carpacunata shayachishpa tianajushca. Arnón shuti yacuca, Moab llactapaj cajpimi, Moab llactaman yaicuitaca na ushashca.

19Chaipi cashpami israelcunaca, amorreocunata jatun mandaj Sehón shuti runapajman, villaj runacunata cachashca. Paica, Hesbón shuti pueblopimi jatun mandaj carca. Paicunataca: Ñucanchi llactaman chayangapaj, cambaj llacta ñanda mañachi nipanimi nichunmi cachashca.

20Ashtahuangarin Sehón shuti runaca, israelcunataca na crishpami, paipaj llactata yalichunga na saquishca. Ashtahuangarin Sehón shuti runaca, tucuilla paipaj soldadocunata tandachishpami, Jahaza shuti pueblopi carpacunata shayachishpa tianajurca. Shina tandachishpami, israelcunahuan macanajushca.

21Shina cajpipash israelcunata Mandaj Taita Diosca, Sehón shuti runatapash, paipaj tucuilla gentecunatapash, israelcunapaj maquipimi churarca. Shina churajpi mishashpami israelcunaca, chai llactapi causanajuj amorreocunapaj tucui llactata japinajushca.

22Amorreocunapaj tucui llactatapash, Arnón shuti jatun yacumandaca, Jaboc shuti jatun yacucaman, shinallata jichushca pambamandaca, Jordán yacucamanmi japinajushca.

23Shina cashpaca, ¿israelcunata Mandaj Taita Diosllata, pai agllashca israelcunapaj ñaupajpi, amorreocunata quichushca alpatachu canga, paita cutin quichungapaj munangui?

24Quemos shuti cambaj dios canman cujpica, ¿nachu cambash japinguiman? Shinallatami, ñucanchita Mandaj Taita Dios ñucanchi ñaupajpi alpata quichushcataca, ñucanchi japina canchi.

25Cunanga, canga Zipor shuti runapaj churi, Moab llactata jatun mandaj Balac shuti runataca, ¿imapillapash yalichu cangui? ¿Paica, israelcunataca imatallapash nircachu, na cashpaca, israelcunahuan macanajurcachu?

26Israelcunaca, Hesbón shuti, Aroer shuti pueblocunapi, chai muyundi uchilla llactacunapi, Arnón shuti yacu manñapi tiaj tucui pueblocunapica, quimsa patsaj huatatami causashca. Shina cashpaca, ¿imashpata na chai huatacunapillata cutin quichurcanguichi?

27Shina cashpaca canda fiñashpaca, ima juchatapash na rurashcanichu. Ashtahuangarin canmi ñucata fiñashpa ñucahuan macanajushpa, ñucata llaquichingui. Cunanga, Mandaj Dios ñucanchi juez cashcamandaca, ñucanchi israelcunatapash, amonitacunatapash, ishcandi ladota ricushpa paillata llaquichijuchunlla’ ninmi” nichunmi cacharca.

28Ashtahuangarin amonitacunata jatun mandaj runaca, Jefté runa aliguta yarishpa villachun cachashcataca, na cazurcachu.

29Mandaj Diospaj Espiritumi, Jefté runapajman shamurca. Shinamandami Galaad llactata, Manasés llactatapash yalishpa, Galaad llactallapita tiaj Mizpa shuti puebloman tigrarca. Galaad llactapi tiaj Mizpa shuti pueblomandaca, amonitacunapajmanmi yalirca.

30Chaipi cashpami Jefté runaca, Mandaj Diosman imagutapash carashapachami nishpa cashna nijurca: “Amonitacunataca, ñuca maquipimi churangui. Shina churajpi,

31macanajuita mishashpa tigrajujpi, ñucata tuparingapaj ñuca huasi pungumanda maijambash punda llujshimushpaca, Mandaj Diospajmi canga. Chaitaca, canman cushpami tucuillata rupachisha” nijurcami.

32Amonitacunahuan Jefté runa macanajugrijpimi, Mandaj Diosca paipaj maquipi churarca.

33Jefté runaca ashtacacunata huañuchishpami, Aroer shuti pueblomanda, Minit pueblocaman, ishcai chunga pueblocunata quichurca. Uvas tarpushca, yacu tiaj juyailla alpacunatapashmi quichurca. Shinami israelcunaca, amonitacunata cazuchishpa causanajurca.

34Macanajuita mishashpa, Mizpa shuti pueblopi tiaj paipaj huasiman Jefté runa tigrajujpica, paipaj ushimi panderocunata huactashpa, bailashpa tuparingapaj ñapash llujshimurca. Jefté runaca, na ashtahuan huahuacunata charircachu, chai ushigutallami charirca. Paipaj shujlla ushigumi carca.

35Paipaj ushigu llujshimujta ricushpami Jefté runaca, pai churajushcata liquishpa, cashna nirca: —¡Aij ñuca ushigulla, jatun llaquipipachamari churahuangui! Canllatami, ñuca jatun llaquita apachun cuhuangui. Mandaj Diosmanmi cushapachami nircani. Chaitaca, na saqui ushanichu— nircami.

36Shina nijpimi paipaj ushica, cashna nirca: —Ñuca taitalla. Mandaj Diosman imagutapash carashapachami nishca cashpaca, imashna can nishcashnallata imatapash rurahuailla. Mandaj Diosca, canda fiñaj amonitacunataca, paicuna canda llaquichishcashnallatami llaquichishca— nircami.

37Paipaj taitataca, cutinmi cashna nirca: —Caigutallami mañapani: Jarihuan nara tacarishca cashcamanda, ñucapaj cumba cuitsacunahuan huacashpa, urcucunata urai rijungapaj, ishcai quillata shuyapai— nircami.

38Shina nijpimi Jefté runaca, rilla nishpa ishcai quillacaman saquirca. Shina cachajpimi paipaj cumba cuitsacunahuan rishpa, jarihuan nara tacarishca cashcamanda, urcucunapi huacajurca.

39Ishcai quilla yalipimi, paipaj taitapajman tigramurca. Paipaj taita Jefté runaca, Diosman cushami nishcashnallatami, paipaj ushi tigrajpica pactachirca. Jefté runapaj ushica, ima horasllapash jarihuan na tacarishcami carca.

40Galaad llactapi causaj Jefté runapaj ushi shina huañushcamandami, Israel llactapi jarihuan nara tacarishca cuitsacunaca, chaita yarishpa huatapi huatapi chuscu punllacaman yarishpa yarishpa huacangapaj llujshin carca.