JOB 3 - Quichua Imbabura Bible

Job runaguca, huacharishca punllatami nalicachishca

1Chai jipami Job runaguca, pai huacharishca punllata ninanda nalicachishpa rimarca.

2Job runaguca caparishpami, cashna nijurca:

3“Ñuca huacharishca punllapash tucurishca cachun.

‘Jari huahuatami ungushca’ nishpa,

villashca tutapash chingashca cachun.

4Chai punllapash, llandu llandu cachun.

Chai punllataca, Taita Diospash jahua pachamanda

na quedashpami ali canman.

Chai punllataca punchayachijpash,

na punchayachishpami ali canman.

5Nali punlla, yana yana tuta

tucushpa, huañuchij llandu tucushpa,

yana fuyu quilpashpachari ali canman.

Yana llandu punllatashna manllanayaita

rurashpachari ali canman.

6Chai tutataca, yana tutalla

charijushpachari ali canman.

Ñuca huacharishca chai punllapash, huatapaj

punllacunapica, na tiajushpachari ali canman.

Shinallata quillacunapipash,

na tigrajushpachari ali canman.

7¡Chai tutapi ñuca na huacharishca cajpica,

chai tutaca imata candanapash, na tianmanllu carca!

8Chai punllataca, punllata fiñajcuna,

Leviatán nishca manllanayai animalta rijchachijcuna,

nalicachishpaca alimi canman.

9Pacarij luzerocunapash, yanayashpaca alimi canman.

Punchayachijta shuyajujpipash,

ama punchayachishpaca alimi canman. Pacarishpa punchayachijta na ricurishpaca alimi canman.

10Ñuca tiajushca, ñuca mamapaj vijsata na vichashcamanda, tucui cai llaquicunata ñuca ama ricuchun na pacashcamanda, chashna tucushpami ali canman.

11Ñucaca, ¿imashpata na vijsapillata huañurcaniyari? Na cashpaca, ¿imashpata huacharishcandi na huañurcaniyari?

12Ñucataca, ¿imashpata cunguripi japinajurcayari? ¿Imapajta chuchuchihuarcayari?

13Huañushca cashpaca, cunanga samajuimanmi carcani. Puñushca cashpaca, samanatami chariman carcani.

14Cai pachata jatun mandajcunahuan, paicunaman yuyaita cuj runacunahuanmi samajuiman carcani. Paicunaca, urmashca huasicunatami, paicunapaj cachun alichinajun.

15Na cashpaca orota charij mandajcunahuan, culquita huasipi jundachij runacunahuanmi samajuiman carcani.

16¿Imashpata na shullushca huahuatashna, punllata nara ricuj huahuatashna na chingachihuarcayari?

17Huañushpami, Diosta na manllajcunaca, shujcunata pandachinata saquin. Shaijushca, ushai illajcunapash, chaipimi samanajun.

18Prezucunapash, chaipimi samanajun. Chaipica, imatalla ruranacunata ricushpa mandajcuna caparishcatapash na uyanajunllu.

19Uchillapash, jatumbash chaipillatami. Servishpa causajpash, chaipica amopaj maquimanda cacharishcami.

20¿Imashpata llaquihuan shaijushca causajuj runamanra, punchapamba punllata ricuchinyari? ¿Imashpata yuyaipi llaquilla causajmanra causaita cunyari?

21Paicunaca huañuitami shuyajun. Shina cajpipash, huañuica na chayamunllu. Juyailla charinacunata yali mascajpipash, huañuica na japinllu.

22Huañushpa pambai tucuna utujuman rishpaca, ninandapachami cushijun.

23Taita Diosllata, corralashpa charijujpi, maita rinatapash na yachaj runamanga, ¿imapajta causaita curcayari?

24Micunata micunapaj randica, jatunda llaquirinarami punda chayamuhuan. Aij nishpa llaquirishca shimicunaca, yacushnami calpajun.

25Ñucata manllachij llaquillatami, ñucataca japihuashca. Ñuca manllashpa causashcapash, chashnallatami tucushca.

26Casilla ali causaitaca, napacha chari ushashcanichu. Napacha cungashca samai ushashcanichu. Ashtahuangarin musparina llaquicunami shamuhuashca” nijurcami.