1Mandaj Dios mandashcata catishpa,
ima pandatapash na rurashpa causajcunaca,
ninandami cushijun.
2Imashna causanata yachachishcata pactachishpa,
tucui shunguhuan paita mascajcunaca ninandami cushijun.
3Pai yachachishcashna causajcunaca,
ima nalitapash na ruranllu.
4Can mandashcacunata aliguta pactachinajuchunga,
canllatami mingarcangui.
5¡Pactachinajuchun can cushca shimicunata
pactachishpa causangapaca, ñuca causaitara
alichishca cashpami ali caiman!
6Shina rurajpica, can mandashcacunata tucuita
pactachijushpaca, napacha pingai tucuimanllu.
7Imatapash cashcatapacha rurashpa, aliguta ricushpa
can mandashcacunata yachajushpami, ñuca
shungupica, alitalla yarishpa alicachisha.
8Pactachinajuchun can cushca shimicunataca pactachishami.
Ñucataca, ama saquitapacha saquihuaichu.
Bet9Chairalla viñai huambraguca, ¿imahuanshi
paipaj causaipica, mapa illaj canga?
Cambaj Shimita cazushpallami, mapa illaj canga.
10Ñuca tucui shunguhuanmi, candaca mascarcani.
Can mandashcacunamanda anchurichunga, ama saquihuaichu.
11Juchata rurashpa canda ama fiñachingapaca,
can rimashcacunatami ñuca shungupi alichircani.
12Mandaj Dioslla, canga alicachi tucushcami cangui.
Pactachinajuchun can cushca
shimicunataca yachachihuayari.
13Aliguta ricushpa, cambaj shimihuan
mandashcacunataca, ñuca shimihuanmi villarcani.
14Imashna causanata can yachachishcata catishpami,
tucui imata charinacunahuan cushijunatapash
yali cushijurcani.
15Can mandashcacunatami, aligutapacha yariajusha.
Cambaj ñambimi purijusha.
16Pactachinajuchun can cushca shimicunahuanga cushijushami.
Cambaj Shimicunataca na cungashachu.
Guímel17Canda servij causaita charichun,
cambaj Shimita pactachijuchunga alita rurapairi.
18Can mandashca juyailla Shimita ricungapaca,
ñuca ñavita pascapairi.
19Cai pachapica, caru llactamanda
shamushca runashnami cani.
Can mandashcacunataca, ñuca
ñaupajmanda ama pacapaichu.
20Ñuca almaca, aliguta ricushpa can mandashcacunata,
punllandi yachangapaj munashpami ninanda llaquirijun.
21Can mandashcacunamanda anchurishpa
jariyashpa, ninanda nalicachi tucushcacunataca
jarcashpami rimarcangui.
22Nalicachishpa rimai tucunatapash,
yangapi churai tucunatapash, ñucamanda anchuchipairi.
Ñucaca, imashna causachun can
yachachishcacunatami cazurcani.
23Mandajcunapashmi paicunapura tiarishpa,
ñucataca nalicachishpa rimanajurca.
Ashtahuangarin canda servij ñucaca,
pactachinajuchun can cushca shimicunatami,
aligutapacha yariajurcani.
24Imashna causanata can yachachishcacunami,
ninanda cushichihuan.
Chaicunaca, ali yuyaitapashmi cuhuan.
Dálet25Ñuca almaca, ñutu alpaman chayajta
cumurishcami, llaquita apajun.
Cambaj Shimipi nijunshnallata, causaita carahuayari.
26Ñuca imashna causajushcataca, canmanmi villarcani.
Canga tigrachihuarcanguimi.
Pactachinajuchun can cushca
shimicunataca yachachihuayari.
27Juyaillacunata can rurashcata yaringapaca,
can mandashcacunapi imashna causanata yachachihuayari.
28Ñuca almaca, llaquihuanmi tucurijun.
Cambaj Shimipi nijunshnallata shinllichihuayari.
29Llullashpa causanataca, ñucamanda anchuchihuayari.
Can llaquij cashcamanda, can mandashcata cuhuayari.
30Na llullashpa causanatami agllarcani.
Aliguta ricushpa can mandashcacunatami,
ñuca ñaupajpi charini.
31Imashna causanata can yachachishcacunapimi
quimirircani.
Mandaj Dioslla, ama pingaichihuaichu.
32Ñuca shunguta can ninanda cushichijui punllapica,
can mandashcacunata ricuchijuj ñambimi calpajusha.
He33Mandaj Dioslla, pactachinajuchun can cushca
shimicunata cazushpa causanata yachachihuayari.
Chaitaca, ñuca tucui causaipimi alichisha.
34Ali yuyaita cuhuayari.
Can mandashcataca cazushallami.
Chaitaca, tucui shunguhuanmi pactachijusha.
35Can mandashcacunapi nijunshnallata pushahuayari.
Chaicunahuanmi cushijuni.
36Ñuca shungutaca, imashna causanata
can yachachishcata cazujta rurapairi.
Charijyanatalla munashpa causachunga, ama saquihuaichu.
37Ñuca ñavitapash, imapash yangacunatara
ricunamandaca anchuchihuayari.
Cambaj ñambi ali catingapaj shinllichihuayari.
38Manllaihuan canda servijtaca, shinllitapacha
cambaj Shimita pactachipairi.
39Nalicachishpa rimai tucunata ñuca
manllashcataca anchuchipairi.
Aliguta ricushpa can mandashcacunaca, alipachami capan.
40Ricui, ñucaca can mandashcacunatami
yachangapaj munarcani.
Canga, imatapash cashcatapacha ruraj
canahuan causaita cuhuayari.
Vau41Mandaj Dioslla, can llaquinatapash, can
quishpichinatapash, can nijunshnallata cachamupairi.
42Shina rurajpimi, ñucata pingaichijmanga,
cambaj Shimita yariashpa causashcata villai ushasha.
43Cambaj na llullaj Shimitaca, ima horapash
ñuca shimimandaca, ama anchuchipaichu.
Ñucaca, aliguta ricushpa can mandashcacunata
catingapajmi shuyajuni.
44Ñuca tucui causaipi, causaita causaicamanmi
can mandashcataca pactachijusha.
45Can mandashcacunata mascashcamandaca,
pipash na llaquichijpimi purijusha.
46Imashna causanata can yachachishcataca,
jatun mandajcunapaj ñaupajpi parlajushpapash,
na pingai tucushachu.
47Can mandashcacunapimi cushijusha.
Chai mandashcacunatami juyarcani.
48Shinallata ñuca juyashca, can mandashcacunata
pactachingapajmi, ñuca maquita alsashpa mañasha.
Pactachinajuchun can cushca shimicunatami,
aligutapacha yarijusha.
Zain49Canda servij ñucaman cushca cambaj
Shimipi nijujtaca yaripairi.
Chaita yariashpa causachun, ñucata
can shuyachishcataca yaripairi.
50Ñuca llaquihuan cajpica, chai Shimimi cushichihuan.
Can rimashca Shimimi, ñucaman causaita cuhuan.
51Jariyashcacunaca, ñucata ninandami
nalicachishpa asinajurca.
Ashtahuangarin can mandashcamandaca, na anchurishcanichu.
52Mandaj Dioslla, aliguta ricushpa ñaupa huatacunapi
can mandashcacunata yarishpami cushijurcani.
53Can mandashcamanda anchurishpa nalicuna
tucujta ricushpami, ninan manllai japihuarca.
54Caru llacta huasipi ñuca mingarishca
tiajujpipash, pactachinajuchun can cushca
shimicunaca ñucapaca candanami carca.
55Mandaj Dioslla, cambaj shutitaca, tutacunapash
yariashpami, can mandashcataca pactachijurcani.
56Can mandashcacunata pactachishcamandami,
cashna bendiciai tucurcani.
Chet57Mandaj Diosmi, tucui imatapash ñucaman carahuan.
Cambaj Shimipi nijujtaca pactachishami niparcanimi.
58Can ñucaman ricurichunga,
tucui shunguhuanmi mañajurcani.
Cambaj Shimipi nijunshnallata llaquihuayari.
59Ñuca imashna causajushcataca, aligutapacha
yarishpami, imashna causanata can
yachachishcata catingapaj tigrarircani.
60Can mandashcacunataca, na unayashpami
ucha pactachijurcani.
61Canda na manllajcunami tandanajushpa,
ñuca muyundipi carca.
Ashtahuangarin can mandashcataca, na cungarcanichu.
62Imatapash cashcatapacha rurashpa, aliguta
ricushpa can mandashca shimicunamandami,
chaupi tuta jatarishpa canda alicachijuni.
63Ñucaca, canda tucui manllajcunapaj, can
mandashcacunata pactachijcunapaj cumbami cani.
64Mandaj Dioslla, cai pachaca cambaj juyaihuan jundami.
Pactachinajuchun can cushca
shimicunataca yachachihuailla.
Tet65Mandaj Dioslla, canda servij ñucahuanga, cambaj
Shimipi nijunshnallatami aliguta rurashcangui.
66Ali yuyaita, ali yachaita carahuayari.
Can mandashcacunataca, crishpami causajurcani.
67Ñuca nara pingai tucushpa, urai
cumurishpaca, chingashcami purijurcani.
Ashtahuangarin cunanga, cambaj Shimita
pactachishpami causajuni.
68Canga alimi cangui, imatapash alita rurajmi cangui.
Pactachinajuchun can cushca
shimicunataca yachachihuailla.
69Jariyashca runacunami ñucata fiñashpa,
llullashpa juchachinatalla yarinajurca.
Ashtahuangarin ñucaca, tucui shunguhuanmi
can mandashcacunataca pactachijusha.
70Paicunapaj shunguca, virayashpa
racuyanshnami shinlliyashca.
Ashtahuangarin ñucaca, can mandashcahuanmi cushijushcani.
71Alipajmi pingaichishpa, urai cumuchihuashcangui.
Pactachinajuchun can cushca shimicunata
yachajuchunmi, chashna rurahuashcangui.
72Ñucapaca, cambaj shimihuan mandashcacunaca,
mashna huaranga huaranga orota,
culquitapash yali aligumari.
Yod73Cambaj maquihuan rurashpami churahuarcangui.
Can mandashcacunata yachachihuayari, yachajushallami.
74Canda manllajcuna ñucata ricushpaca, cushijunajungami.
Cambaj Shimipi nijujtami shuyajurcani.
75Mandaj Dioslla, imatapash cashcatapacha rurashpa,
aliguta ricushpa can mandashcacunataca rijsipanimi.
Imashna can imatapash pactachijunshnallatami llaquichihuarcangui.
76Cunanga, canda servij ñucaman imashna
nijunshnallata, llaquishpa cushichihuayari.
77Ñuca causai ushangapaca, can llaquishpa ayudahuayari.
Ñucataca, can mandashcami ninanda cushichihuan.
78Jariyashcacunaca pingai tucuchunlla.
Paicunaca, yangamandami ñucataca nalicachinajurca.
Ashtahuangarin ñucaca, can mandashcacunata
aligutapacha yarishpami causasha.
79Canda manllajcunapash, imashna causanata
can yachachishcata rijsijcunapash,
ñucahuan tandanajuchun.
80Ñuca ama pingai tucungapaca, pactachinajuchun
can cushca shimicunapi nijunshnallata,
ñuca shungupica ima pandapash illaj
cashpami ali caiman.
Caf81Can quishpichinata shuyashpami,
ñuca almaca ña huañunashna tucushca.
Shina cashpapash, cambaj Shimipi
nijujta yariashpami shuyajuni.
82Cambaj Shimipi nijujtaca, ñavipash
amsayangacaman chapajushpami: “¿Ima horata
ñucataca cushichigrihuanguiyari?” nijurcani.
83Cushnipi huarcushca cara muchilashnami cani.
Shina cashpapash pactachinajuchun can cushca
shimicunataca, na cungashcanichu.
84Canda servij ñucataca, ¿mashna
punllacunatata shuyachigringui?
Ñucata catiriashpa llaquichijcunataca,
¿ima horashi llaquichingui?
85Jariyashcacunaca, utujucunatami ñucaman allashca.
Ashtahuangarin can mandashcapi imashna
nijujtaca na ruranajunllu.
86Can tucui mandashcacunaca, na llullaj shimicunami.
Ñucataca, yangamandami catiriashpa llaquichinajun,
ayudahuayari.
87Ñucataca, ashamandami na alpapi shitahuarca.
Shina cajpipash, can mandashcacunataca
na saquishcanichu.
88Canga, imashna llaquinshnallata, causaita cuhuayari.
Imashna causanata cambaj shimihuan
yachachishcataca pactachishami.
Lámed89Mandaj Dioslla, cambaj Shimica causaita
causaicamanmi jahua pachapi tiajun.
90Mirai miraicunacamanmi, canga tucuita pactachijungui.
Cai pachatapash, shinllitapacha can churajpimi tiajun.
91Can mandashcamandami, tucui imapash cunangaman tiajun.
Tucui chaicunaca, candami servinajun.
92Can mandashca Shimipash ñucata na cushichishca
cajpica, ñucaca llaquipimi huañuiman carcani.
93Can mandashcacunataca, ima horapash na cungashachu.
Chaicunahuanmi, ñucaman causaita cuhuarcangui.
94Ñucaca cambajmari cani, quishpichihuayari.
Can mandashcacunatami mascajurcani.
95Canda na manllajcunaca, ñucata
tucuchingapajmi chaparianajun.
Ashtahuangarin ñucaca, imashna causanata
can yachachishcatami yarijusha.
96Imalla alipacha tiashcacunapash,
tucurijlla cajtami ricuni.
Can mandashca Shimica, ima horapash na tucurij Shimimi.
Mem97¡Can mandashcataca, ninandami juyani!
Tucui punllami, chaitaca aligutapacha yariajuni.
98Can mandashcacunahuanmi, ñucata fiñajcunata
yali yachajta rurahuashcangui.
Chai mandashcacunaca, tucui causaipimi ñucahuan.
99Imashna causachun can yachachishcacunaca,
ñuca aligutapacha yarishpa causangapajmi.
Chaimandami, ñucata tucui yachachijcunatapash
yali yuyaita japircani.
100Can mandashcacunata cazushpa causashpami,
rucucunatapash yali yuyaita japircani.
101Cambaj Shimipi nijujta pactachingapajmi,
tucui naliman ñuca chaqui rinatapash jarcarircani.
102Ñucataca can yachachijpimi, aliguta ricushpa can
mandashcacunamandaca na anchurircani.
Chaicunataca canmi yachachihuarcangui.
103¡Cambaj Shimicunaca, ñuca shimipica,
mishqui mishquimari!
Ñuca shimipica, balun mishquitapash yali mishquimi.
104Can mandashcacunamandami, ali yuyaitaca japircani.
Chaimandami llulla causaitaca, tucuita millanayachircani.
Nun105Cambaj Shimica, ñuca chaqui sarunata
punchayachijuj lamparagushnami, ñuca
ñanda punchayachijuj michagushnami.
106Imatapash cashcatapacha rurashpa,
aliguta ricushpa can mandashcacunataca
pactachishapacha nishpami juramenturcani.
107Mandaj Dioslla, ninan llaquihuanmi cani.
Cambaj Shimipi nijunshnallata, causaita cuhuayari.
108Mandaj Dioslla, ñuca munai ñuca shimihuan
carashami nishpa, animalcunata cushpa huañuchishcataca
alicachishpa chasquipairi nipanimi.
Aliguta ricushpa can mandashcacunatapash yachachihuayari.
109Ñuca causaitaca, ima horapash llaqui japinallami.
Ashtahuangarin can mandashcataca, na cungarcanichu.
110Canda na manllajcuna ñucata lazungapaj munajpipash,
ñucaca can mandashcacunamandaca na anchurircanichu.
111Imashna causanata can yachachishcataca,
tucui causaipi ñucapaj cachunmi japircani.
Chai shimicunami, ñuca shungutaca cushichin.
112Ñuca shungupica, pactachinajuchun can cushca
shimicunata pactachishpa tucuchingacamanmi,
tucui causaipi ashtahuan ashtahuan yarijurcanilla.
Sámec113Mishqui shimi, jayaj shungucunataca na ricunayanllu.
Ashtahuangarin can mandashcatami juyani.
114Ñucata pacaj, ñuca jarcarina escudoshnami cangui.
Cambaj Shimipi nijujtami, yariashpa shuyajurcani.
115Nalita ruraj runacuna, ñucamanda anchurichi.
Ñuca Taita Dios mandashcacunatami pactachisha.
116Ñuca shuyajushcamanda ama pingai tucungapaca,
cambaj Shimipi nijunshnallata charihuayari.
Shina ayudajpica causashami.
117Can charijpimi, ñucaca quishpirisha.
Pactachinajuchun can cushca shimicunahuanmi,
tucui ñuca causaipi cushijusha.
118Pactachinajuchun can cushca shimicunamanda
anchurijcunataca, tucuicunatami sarurcangui.
Paicuna umachinata alipacha yachashcapash
yanga cajpimi, chashna sarurcangui.
119Canda na manllajcunataca, mapatashnami
tucui llactamanda tucuchircangui.
Chaimandami, imashna causachun
can yachachishcataca juyarcani.
120Canda manllashpami, ñucaca chujchurcani.
Aliguta ricushpa can mandashcacunataca manllanimi.
Ayin121Aliguta rurashpami, imatapash cashcatapacha
rurashpa causarcani.
Ñucata llaquichijcunapaj maquipica,
ama cushpa saquihuaichu.
122Canda servij ñucataca, canllata
aliguta ricushpa pushahuayari.
Jariyashcacuna ñucata llaquichishpa
charichunga, ama saquihuaichu.
123Can quishpichinata chapajushpallatami,
ñuca ñavipash amsayarca.
Cambaj Shimipi nijunshnallata, imatapash
cashcatapacha ruranatapashmi shuyajurcani.
124Canda servijhuanga, imashna can
llaquinshnallata alita rurapairi.
Pactachinajuchun can cushca
shimicunataca yachachihuayari.
125Ñucaca, canda servijmi cani.
Imashna causanata can yachachishcacunata
ali rijsingapaj, ali yuyaita cuhuayari.
126Can mandashcata yangapi churashcamandaca,
Mandaj Dioslla, ñami imatallapash rurana capangui.
127Shinamandami can mandashcacunataca, orotapash yali,
ashtahuan ali orotapash yali juyajurcani.
128Shinamandami, tucui imacunamandapash yalica,
can mandashcacunata tucuillata ashtahuan alicachircani.
Llulla causaitaca, tucuitami na ricunayachircani.
Pe129Imashna causanata can yachachishcacunaca,
juyaillagumi.
Chaimandami, ñuca tucui almahuan
chaicunataca pactachijurcani.
130Cambaj Shimicunata yachachishcami punchayachijun.
Imatapash na yachajcunamambash, ali yuyaitami cun.
131Can mandashcacunata ninanda munaimandami,
shimita pascashpa, aij nishpa llaquirircani.
132Cambaj shutita juyajcunata llaquinshnallata,
ñucatapash ricushpa llaquihuayari.
133Ñuca purinapica, cambaj
Shimihuan mandashpa pushahuayari.
Ñucataca, ima nalipash ama mandashpa charihuachun.
134Ninandapacha llaquichij runacunamandaca
cacharichihuayari.
Shina rurajpica, can mandashcacunata pactachishami.
135Canda servij ñucataca, cambaj ñavihuan
punchayachihuayari.
Pactachinajuchun can cushca
shimicunataca yachachihuayari.
136Can mandashcacunata na cazujcunamandami,
ñuca ñavimandaca jatun yacushna viquica jicharirca.
Tsade137Mandaj Dioslla, canga imatapash
cashcatapacha rurajmi cangui.
Aliguta ricushpa can mandashcacunapash aligupachami.
138Imashna causanata can yachachishcacunaca,
aligutalla yachachij, pactachij shimicunami.
139Ñucata fiñajcuna cambaj Shimicunata
cungajpimi, paicunata ninanda fiñashpa huañujuni.
140Cambaj Shimica, mapa illajpacha
cajpimi, canda servij ñucaca juyani.
141Ñucaca, yangalla runa jichui tucushcami cani.
Ashtahuangarin can mandashcacunataca,
na cungarcanichu.
142Imatapash cashcatapacha can ruranaca,
na tucurij causaita causaicaman imatapash
cashcatapacha ruranami.
Can mandashcacunapash, na llullajmi.
143Ñucataca ninan llaquipash, manllaipashmi japihuarca.
Ashtahuangarin can mandashcacunami,
ninanda cushichihuarca.
144Imashna causanata can yachachishcacunaca,
na tucurij causaita causaicaman imatapash
cashcatapacha yachachijmi.
Shina causachun ali yuyaita carahuayari, causajushallami.
Cof145Mandaj Dioslla, tucui ñuca shunguhuanmi
caparishpa mañajurcani.
Ñucata uyahuayari.
Pactachinajuchun can cushca shimicunataca pactachishami.
146Candami caparishpa mañarcani, quishpichihuayari.
Imashna causanata can yachachishcacunataca
pactachishami.
147Nara pacarijpillata jatarishpami,
caparishpa mañajurcani.
Cambaj Shimipi nijujtami shuyajurcani.
148Can mandashcacunata yaringapaca, tuta
cuidangapaj yaicuna horaspillatami,
ñuca ñavica pascarirca.
149Ñuca mañajujtaca, imashna can
llaquijunshnallata uyahuayari.
Mandaj Dioslla, aliguta ricushpa can
mandajunshnallata, causaita cuhuayari.
150Ñucata catiriashpa llaquichijcunaca,
jatun nalicunata ashtahuan ruranajushpami,
can mandashcacunamanda anchurinajurca.
151Mandaj Dioslla, canga ladollapimi cangui.
Can tucui mandashcacunapash, na llullachu.
152Imashna causanata can yachachishcacunataca,
ña unaitami yacharcani.
Chaitaca, causaita causaicamanmi churashcangui.
Resh153Ñuca llaquita ricushpa cacharichihuayari.
Can mandashcacunataca, na cungapashcanichu.
154Ñucamanda shayarishpa mitsashpa quishpichihuayari.
Cambaj Shimi rimashcahuan causaita cuhuayari.
155Pactachinajuchun can cushca shimicunata
na mascashcamandaca, canda na manllajcunapaca,
quishpirinapash carupimi.
156Mandaj Dioslla, can llaquinaca jatumbachami.
Aliguta ricushpa can mandajunshnallata,
causaita cuhuayari.
157Ñucata catiriashpa llaquichijcunapash,
ñucata fiñajcunapash ashtacapachami.
Ashtahuangarin imashna causanata can
yachachishcacunamandaca, na anchurishcanichu.
158Yachashpata na cazujcunataca, cambaj Shimicunata
na cazunajujta ricushpami manllarircani.
159Mandaj Dioslla, can mandashcacunata
ñuca juyajujtaca ricuhuayari.
Can imashna llaquinshnallata, causaita cuhuayari.
160Tucui cambaj Shimicunaca, napacha llullachu.
Imatapash cashcatapacha rurashpa, aliguta ricushpa
mandashcacunaca, na tucurij causaita causaicamanmi.
Sin161Ñucataca, mandajcunami yangamanda
catiriashpa llaquichinajurca.
Ashtahuangarin ñuca shungupica,
cambaj Shimicunata manllashpami causajurcani.
162Ñucaca, macanajushpa ashtacata quichumushcashnami,
cambaj Shimihuanga cushijuni.
163Llullanataca fiñanimi, ninandami millanayachini.
Can mandashcatami juyani.
164Imatapash cashcatapacha rurashpa, aliguta
ricushpa can mandashca shimicunamandami,
punllapi canchiscaman candaca alicachijuni.
165Can mandashcata juyajcunaca,
casilla ali causaitami charin.
Paicunapaca, imapi nitijanapash na tianllu.
166Mandaj Dioslla, can quishpichinatami shuyajurcani.
Can mandashcacunata rurashpami causajurcani.
167Ñuca tucui almahuanmi, imashna causanata
can yachachishcacunataca pactachijurcani.
Chaicunataca ninandapachami juyarcani.
168Can mandashcacunatapash, imashna causanata
can yachachishcacunatapash cazujurcanimi.
Ñuca tucui causaica cambaj ñaupajpi
cashcamandami, chashna cazujurcani.
Tau169Mandaj Dioslla, ñuca caparishpa mañashcapash,
cambaj ñaupajman chayapachun.
Cambaj Shimipi nijunshnallata ali yuyaita cuhuayari.
170Ñuca mañashcapash, cambaj ñaupajman chayapachun.
Can nijunshnallata cacharichihuayari.
171Pactachinajuchun can cushca shimicunata, canllata
ñucaman yachachijpimi, ñuca shimihuanga
ninanda alicachijusha.
172Tucui can mandashcacunaca, imatapash
cashcatapacha rurana cashcamandami, ñuca
jalluca can rimashca shimicunata rimajunga.
173Cambaj maquica, ayudangapaj ucha shuyajupachunlla.
Can mandashcacunatami agllarcani.
174Mandaj Dioslla, can quishpichinatami
ninanda munarcani.
Can mandashcacunami, ñucataca ninanda cushichin.
175Ñuca almaca, canda alicachingapaj causajuchun.
Aliguta ricushpa can mandashcacunaca ayudahuachunlla.
176Ñucaca, chingashca llamagushnami maitapash purijurcani.
Can mandashcacunata na cungashcamandaca,
canda servij ñucata mascahuayari.
Who We AreWhat We EelieveWhat We Do
2025 by iamachristian.org,Inc All rights reserved.
