HECHOS 22 - Quichua Imbabura Bible

1—Huauquicuna, taitacuna uyahuaichi. Ñuca imatapash nalita na rurashcataca, cangunaman villasha nipanimi— nircami.

2Hebreo shimipi rimajta uyashpami, ashtahuan upallayarca. Shina upallayajpimi Pabloca, cashna nijurca:

3—Cilicia shuti llactapi tiaj Tarso shuti pueblopi huacharishca, Judea llactamanda runallatami cani. Ashtahuangarin cai Jerusalenbi viñajushpami, Gamaliel shuti runa aligutapacha yachachijpi yachajurcani. Chaimandami, ñucanchipaj ñaupa taitacunaman mandashca shimicunataca, tucui canguna cunambi pactachishpa causanajunshnallata, Taita Diospajlla causashpa pactachijun carcani.

4Ali Ñanda catijcunataca, huañuchingacamanmi huarmicunata, jaricunatapash japishpa, prezuna huasiman apachun cachajurcani.

5Ñuca chashna rurashcataca, curacunata mandajpash, mandaj rucucunapash, tucuillami yachan. Damasco shuti pueblopi causanajuj, ñucanchipura mandaj rucucunapajman richunga, paicunami cartacunata escribishpa cachahuarca. Chai pueblomandaca, cai Jerusalenbi llaquichi tucuchunmi, chai crijcunataca huatashpa apamungapaj rijurcani.

Pabloca, pai quishpirishcatami villashca(Hech. 9:1-19; 26:12-18)

6Ashtahuangarin chaupi punlla tucujujpimi, Damasco shuti, puebloman ña chayajujpi cashna tucurca: Jahua pachamandaca cungashcapimi, ñapash ñucapaj muyundiman punchapamba micha shitamurca.

7Shina shitamujpi alpaman ñuca urmashpaca: ‘Saulo, Saulo, ¿imamandata catiriashpa llaquichihuangui?’ nijtami uyarcani.

8Shina nijpica: ‘¿Pita capangui, Taitalla?’ nircanimi. Shina nijpimi: ‘Can llaquichijuj, Nazaret pueblomanda Jesusmi cani’ nihuarca.

9Ñucata cumbashpa rij runacunapash, punchapamba shitamujta ricushpami, ninanda manllarinajurca. Ashtahuangarin ñucaman imata nijtapash, na yacharcachu.

10‘¿Imatata rurapasha, Apunchi Jesús?’ nishpami tapurcani. Shina nijpica: ‘Cunanda jatarishpa, Damasco puebloman rilla. Chaipimi, can imata rurachumbash villanga’ nishpami, Apunchi Jesusca nihuarca.

11Jahua pachamanda punchapamba shitamushpami ñausayachirca. Shina tucujpimi, ñucata cumbashpa rij runacunallata maquimanda aisashpa pushajpi, Damasco puebloman chayarcani.

12Chaipica, Ananías shuti shuj runagumi causashca carca. Diosta yarij cashpami paica, Moisés mandashca shimita pactachijun carca. Shina cajpimi, Judea llactamanda Damasco pueblopi causajcunaca, tucuicuna ninanda alicachin carca.

13Paimi, ñuca ladoman quimirishpa: ‘Huauqui Saulo, cambaj ñavihuan cutin ricuilla’ nihuarca. Shina nijpi cutin ricushpaca, paita ricurcanillami.

14Paica, cashnami nihuarca: ‘Ñucanchi ñaupa taitacunapaj Taita Diosmi, pai munashcata yachachun, canda agllashca. Shina cashpami, imatapash cashcatapacha Rurajtapash ricushcangui, pai rimashca shimitapash uyashcangui.

15Canga imata ricushcata, uyashcatapash tucuicunaman maipipash villajmi tucungui.

16Cunanga, ama ashtahuan shuyaichu, jatarishpa bautizari. Cambaj juchacunata maillachun, Apunchi Jesusta mañai’ nihuarcami.

Na israelcunaman villangapaj cachai tucushcatami, Pabloca villashca

17Cai Jerusalenman ñuca tigramushpaca, Diospaj huasipi mañajushpami, muscuipishna ricurcani.

18Chaipimi, Apunchi Jesús ñucaman ricurishpa, cashna nihuarca: ‘Ñucamanda can villajujta, caipi causajcunaca na uyangapaj munagrinllu. Chaimandami, Jerusalenmandaca ucha llujshishpa rilla nini’ nihuarcami.

19Shina nijpimi, cashna nircani: ‘Apunchi Jesús, canda crijcunataca, tandanajuna huasicunapi astichishpami, prezuna huasiman apachin carcani. Ñuca chashna rurajushcataca, tucuicunami caipica yachan.

20Canmanda villaj Esteban runaguta macashpa yahuarta jichajpipash, chaipimi carcani. Paitaca huañuchinapachami nircanimi. Shina nishpami, huañuchij runacunapaj churajunatapash, japishpa shayajurcani’ nircanimi.

21Ashtahuangarin Apunchi Jesusca, cashnami nihuarca: ‘Rilla, ñucami candaca shuj llactacunapi causajcunaman villachun cachagrini’ nihuarcami— nijurcami.

Pablotaca, soldadocunata mandajmi charijushca

22Cai shimicunata villangacamanmi Pablotaca, ali uyanajurca. Ashtahuangarin ñapash ninanda caparishpami: “Cai runaca, na causanachu. Paitaca, cai pachamanda anchuchinami” ninajurca.

23Chashna ninanda caparishpami, paicuna churajushcatapash shitashpa, alpatapash jahuaman shitanajurca.

24Huaranga soldadocunata mandajca, imamanda chashna Pablota fiñashpa caparinajujta yachangapajmi munarca. Shina yachangapaj munashpami:

—Shinlli torre ucuman pushaichi. Chaipi astishpa tapuchigrichi— nishpa mandarca.

25Pabloca, ña paita astingapaj huascacunahuan huatanajujpimi, patsaj soldadocunata mandajtaca cashna nirca:

—Roma llacta purallata shuj runataca, pipash na llaquichi tucunapachami nishcachu. Shina cajpipash, ¿astinallachu canga?— nircami.

26Chai mandajta cashna nijpica, huaranga soldadocunata mandajmanmi, cashna nishpa villagrirca:

—Chai runaca, Roma llacta purami cashca. Ama imatapash ruranguichu— nircami.

27Shina villajpimi, chai mandaj runa shamushpa Pablotaca:

—¿Canga, Roma llactamandachu cangui?— nijpi, Pabloca:

—Ari, chaimandami cani— nirca.

28Shina nijpimi chai mandaj runaca, cashna nishpa tigrachirca:

—Roma llactapura tucungapaca, ñucaca ashtaca culquitami curcani— nircami.

Shina nijpimi, Pabloca:

—Ashtahuangarin ñucaca, chaipi huacharishcami cani— nirca.

29Shina nijpica, Pablota macachun churashca soldadocunaca anchurircallami. Pablotaca, Roma llactapura cashcata, huaranga soldadocunata mandajpash yachashpami manllarirca.

Mandajpura tandanajushcapaj ñaupajpimi, Pabloca villashca

30Chai mandaj runaca, Judea llactapi causajcuna imamanda Pablota huañuchipacha nishcata yachangapaj munashpami cayandi punllapica, Pablota cadenacunahuan huatashcamanda cacharichirca. Shinallata curacunata mandaj curacunatapash, mandaj puralla tandanajujcunatapash, tucuilla tandanajuchunmi mandarca. Pablotaca, chai mandajcunapaj ñaupajpimi tapuchingapaj pushamurca.