1 CORINTIOS 7 - Quichua Imbabura Bible

Cazarashcacuna imashna causanatami villajun

1Canguna ñucata tapushpa escribishcatami, cunanga tigrachimuni. Jarica, na cazarashpa causashpachari ali canman.

2Ashtahuangarin huainayana munaicuna tiashcamanda, tucuicunallata quiquin huarmita charichun. Shinallata huarmicunapash, quiquin cusata charichun.

3Cusaca, cazarashca cashcashnallata, paipaj huarmiman imata cashpapash pactachishpa causachun. Shinallata huarmipash, cusahuan chashnallata causachun.

4Huarmica, paipaj cuerpotaca na mandai ushanllu, ashtahuangarin cusami mandai ushan. Shinallata cusapash, paipaj cuerpotaca na mandai ushanllu, ashtahuangarin huarmimi mandai ushan.

5Ishcandimanda na munanichu nishpaca, na ninachu canguichi. Ashtahuangarin Diosta yariashpa mañangapajmi, ashagucamanlla na quimiri ushana canguichi. Na unaita jarcari ushashpaca, nali yuyaita Satanás ama cuchun, cutin quimiringuichilla.

6Chashna causanguichi nishpaca, na mandanichu. Ashtahuangarin shina causashpami, ali canga nitallami nijuni.

7Tucui jaricuna ñucashnalla causachunmi munani. Ashtahuangarin Taita Diosmi, shican shican causaita caishujmambash, chaishujmambash carashca.

8Nara cazarashcacunapash, sapalla huarmicunapash, ñucashnalla na cazarashpa causashpami, ali canman ninimi.

9Ashtahuangarin na jarcari ushashpaca, cazarachunlla. Chaita yariajlla purinapaj randica, cazaranami ashtahuan ali.

10Shina cajpipash cazarashcacunataca, Apunchi Jesusmi caita mandan, na ñuca mandanichu: Huarmica, cusataca na jichunachu.

11Jichushpaca, ama shujhuan cazarashpa causachun. Na cashpaca, cusallahuanda ali tucuchun. Shinallata cusapash, huarmitaca napacha jichunachu.

12Shujcunataca, na Apunchi Jesús nijujpi, ñucallami cashna nijuni: Maijan crij huauquipash na crij huarmita charijpi, huarmi ali causashunllami nijpica, ama jichuchun ninimi.

13Shinallata maijan crij huarmipash na crij cusata charijpi, cusa ali causashunllami nijpica, ama jichuchun ninimi.

14Na crij cusaca, paipaj huarmi crij cajpimi, Diospajlla tucushca. Shinallata na crij huarmipash, paipaj cusa crij cajpimi, Diospajlla tucushca. Na shina cajpica, cangunapaj huahuacunapash, na crijcunapaj huahuacunashna nalicunami canman. Ashtahuangarin cunanga, cangunapaj huahuacunaca Diospajllami.

15Maijan na crij cashpapash jichusha nishpaca, jichuchunlla. Shina jichujpica, crij huauqui cashpa, pani cashpapash, na ashtahuan gañanshna causajunllu. Taita Diosca, casilla ali causaita charichunmi, ñucanchitaca cayashca.

16Cazarashca huarmilla, ¿cambaj cusataca quishpichi ushashallami yajunguichu? Shinallata cazarashca cusapash, ¿cambaj huarmitaca quishpichi ushashallami yajunguichu?

17Ashtahuangarin Apunchi Jesusmi imashna ali causanatapash, tucuicunaman carashca. Shinamandami, Taita Dios cangunata cayai punllapi imashna causajushcashnallata, tucuicuna chashnallata causana canguichi. Shina causachunmi, tandanajuj tucui crijcunataca mandani.

18Dios cayai punllapica, ¿maijandapash circuncisión nishcata rurashcachu carca? Shina cashpaca, circuncisionda rurashcallata quedachunlla. Dios cayai punllapi ¿maijandapash circuncisionda na rurashcachu carca? Shina cashpaca, na circuncisionda ruranachu ninimi.

19Circuncisionda rurashca cashpa, circuncisionda na rurashca cashpapash, imapash na canllu. Ashtahuangarin Taita Dios mandashcacunata pactachinami ali.

20Dios cayai punllapi imashna causajushca cashpapash, chashnallata tucuicuna causashpa catichilla.

21Dios cayai punllapica, ¿gañanllu carcangui? Na chaimanda llaquirinachu cangui. Shina cajpipash chaimanda llujshi ushanashnalla cashpaca, llujshinata yaringui.

22Apunchi Jesusta crichun, Dios cayai punllapi gañan causanajushca cashpaca, Apunchi Jesuspajta rurangapaj cacharishcami cangui. Shinallata Dios cayai punllapi na gañan cashca cashpapash, Cristopajmi gañan cangui.

23Diosca, tucuita yali valishcahuanmi cangunataca randishca. Shina cashpami gentecunapaca, na gañan tucuna canguichi.

24Huauquicuna, Dios cayai punllapi imashnami causarcanguichi, chashnallata Taita Diospaj causashpa catinguichilla.

25Jarihuan nara tacarishca cuitsacuna imashna causachun ñuca yachachijuchunga, Apunchi Jesusca na mandahuarcachu. Ashtahuangarin pactachij Apunchi Jesús ñucata llaquishpa yarichijpimi, cashna causanaca aligumi nijuni:

26Ninan llaqui punllacunapi causanajushcamandami, imashna causajushpapash, chashnallata causanami jaripaca ali yajuni.

27¿Huarmihuan cazarashcachu cangui? Shina cashpaca, jichunata na yarinachu cangui. ¿Nara cazarashcachu cangui? Shina cashpapash, cazaranataca na yarinachu cangui.

28Cazarashpaca, juchataca na ruranguichu. Shinallata cuitsagupash cazarashpaca, juchataca na ruranllu. Ashtahuangarin cazarajcunaca, cai causaipi llaquicunatami apanajunga. Chai llaquicunamanda cangunata jarcangapajmi munani.

29Ashtahuangarin huauquicuna, caitallami ningapaj munani: Punllacunaca, na unaicaman tiajunallachu, tucurishpa catijunallami. Shinamandami huarmita charijcunaca, huarmita na charinshna causachun nini.

30Shinallata huacajcunapash, na huacanshnalla purichun. Cushijushpa causajcunapash, na cushijunshnalla purichun. Imata randijcunapash, na charinshnalla causachun.

31Shinallata cai pachapi imata charishcacunahuan cushijujcunapash, na charishpa cushijunshnalla causachun. Cai pachapi imalla tiajcunapash tucurinllami.

32Canguna llaquilla causachunga na munanichu. Na cazarashca chairalla runaca, Apunchi Jesusta yariajlla cashpami, Apunchi Jesustalla cushichingapaj munan.

33Ashtahuangarin cazarashca runaca, huarmi cushijushpa causachun nishpami, cai pachapi imapash tiajtalla yarishpa causan.

34Shinallata cusayu huarmica shuj yuyaita, jarihuan nara tacarishca cuitsaca shuj yuyaitami charin. Jarihuan nara tacarishca cuitsami, cuerpondi almandi Diospajlla causashpa, Apunchi Jesusta yariashpa causan. Ashtahuangarin cusayu huarmica, cusata cushichingapajmi, cai pachapi imapash tiajtalla yariashpa causan.

35Caitaca, cangunapaj ali cachunmi cashna nini. Lazuta churanshna jarcashpaca, na ninichu. Ashtahuangarin imapash na jarcajpi Apunchi Jesuspajta aliguta rurashpa causachunmi, cashna nini.

36Ashtahuangarin maijan cashpapash, ñuca ushi na cazarashpa payayanaca na alichu yajushpaca, pai imashna yajushcashnallata cazarachinapachami. Pai imashna munashcashna cazarachinallami. Chaica na juchachu.

37Ashtahuangarin jarihuan nara tacarishca paipaj ushi na cazarashpaca, alimi canga nishpa shungupi yarishpaca, aligutami ruran.

38Shina cashpami maijambash paipaj ushita cazarachishpapash, alita ruran. Na cazarachishpacarin, ashtahuan aligutami ruran.

39Cusayu huarmica, mandashca shimipi nijunshnami cusa causajujpica, huatashcashna causan. Ashtahuangarin cusa huañujpica, cacharishcashna cashcamandami, pihuan cazarangapaj munashpapash cazaranalla. Ashtahuangarin Apunchi Jesusta crij cachun ninimi.

40Ashtahuangarin na cutin cazarashpaca, ashtahuan cushijushpami causanman yanimi. Ñucapash, Taita Diospaj Espiritutaca charinimi yashpami cashna nini.