2 REYES 19 - Quichua Imbabura Bible

Senaquerib shuti runa llaquichinamandami, Judá llactataca cacharichishca(2 Crón. 32:20-23; Isa. 37:1-38)

1Jatun mandaj Ezequías runaca chaita uyashpami, pai churajushcatapash liquishpa, cañamuta churajushpa, Mandaj Diospaj huasiman yaicurca.

2Chai jipami mayordomo Eliaquim shuti runatapash, escribij Sebna shuti runatapash, curacunata mandaj rucucunatapash, cañamuta churajushcata, Dios ima nishcata villaj Isaiaspajman cacharca. Isaiasca, Amoz shuti runapaj churimi carca.

3Cashna nichunmi cacharca: “Ezequiasca cashnami nin: ‘Cunan punllamari, ninanda nalicachi tucushpa, rimai tucushpa, ninan llaqui punllapi canchi. Huahuata unguna punlla pactajpi, huahuata unguj huarmishnami, ushai illaj canchi.

4Rabsaces nishca mandaj rimashcataca, canda Mandaj Taita Diosca tucuita uyangapashchari. Paitaca, asiriocunata jatun mandaj paipaj amomi, causaj Taita Diosta nali shimicunahuan ninanda nalicachishpa rimachun cachamushca. Chashna rimashcataca, canda Mandaj Taita Diosllata uyapashcami. Shina cashcamanda caipi huaquin puchushcacunamanda, Diosta mañajupailla’ ninmi” nichunmi cacharca.

5Chaita villangapajmi, Ezequiasta servijcunaca, Isaiaspajman shamurca.

6Chaita villajpimi Isaiasca, cashna nirca: “Cangunata mandajman cashna ninguichi: Mandaj Diosca, cashnami nin: ‘Asiria llactata jatun mandajta servijcunami, nali shimicunahuan ñucata ninanda rimarca. Chaita uyashcamandaca, ama manllaichu.

7Ricui, ñucami paipica shuj espirituta churasha. Chaimandami paica, ninan manllanayaicunata uyashpa, paipaj llactaman tigranga. Paipaj llactapimi, paitaca espadahuan huañuchi tucuchun saquisha’ ninmi ninguichi” nircami.

8Rabsaces nishca mandaj tigrashpaca, Libna shuti pueblopi causajcunahuan macanajujujtami, Asiria llactata jatun mandajtaca tuparigrirca. Paica, Laquis shuti puebloman rishcata yachashpami tigrarca.

9Shinallata Etiopía llactata Tirhaca shuti jatun mandaj, paihuan macanajungapaj llujshimushcatapashmi yacharca. Chaimandami paica, cutin tigramushpa paipaj randi parlajcunata Ezequiasman, cashna nichun cachamurca:

10“Judá llactata jatun mandaj Ezequiastaca, cashna ninguichi: ‘Can yariashpa causajungui, chai cambaj Taita Dios umachijuchunga, na saquinachu cangui. Paica: Jerusalendaca, Asiria llactata jatun mandajpaj maquipica, na churashachu ningami.

11Ricui, Asiria llactata jatun mandajcuna, tucui llactacunata imatalla rurashpa tucuchishcataca, canllata yachanguimi. Shina cajpipash, ¿canrachu quishpirigringui?

12Ñuca ñaupa taitacuna tucuchishca llactacunataca, ¿maijan dioscunallapash quishpichi usharcachu? Chai taitacunaca: Gozán, Harán, Resef shuti pueblocunapi causajcunatapash, Edén shuti llactapi tiajuj Telasar shuti pueblopi causajcunatapashmi tucuchirca.

13¿Hamat pueblota jatun mandajpash, Arfad shuti pueblota jatun mandajpash, Sefarvaim, Hena, Iva shuti pueblocunata jatun mandajcunapash maipitayari?’ ninguichi” nichunmi cachamurca.

14Ezequiasca, jatun mandajpaj randi parlajcunapaj maquimanda cartacunata japishpami leyirca. Chai jipami, Mandaj Diospaj huasiman vichai rirca. Chaipimi Ezequiasca, chai cartacunataca, Mandaj Diospaj ñaupajpi pascarca.

15Chaipimi Ezequiasca, Mandaj Diospaj ñaupajpi cashna nishpa mañarca: “Israelcunata Mandaj Taita Dioslla, querubín nishcacunapaj chaupipimi causajungui. Canllami, cai pachapi tiaj tucui jatun mandajcunapaj Taita Dios cangui. Jahua pachatapash, cai pachatapash canmi rurarcangui.

16Mandaj Dioslla, aliguta uyapairi. Mandaj Dioslla, cambaj ñavita pascashpa ricupairi. Senaquerib rimachun cachamushcacunataca uyapairi. Paica, causaj Taita Diosta nali shimicunahuan rimachunmi cachamushca.

17Mandaj Dioslla, Asiria llactata jatun mandajcunaca, caishuj llactacunapi causajcunataca, paicunapaj llactacunandi tucuchircapachami.

18Paicunapaj dioscunatapashmi shitanajurca. Chaicunaca, na dioscunachu carca. Ashtahuangarin runacunapaj maquihuan rurashca caspicuna, na cashpaca rumicunallami carca. Chaimandami chashna tucuchinajurca.

19Cunanga, ñucanchita Mandaj Taita Dioslla, chai jatun mandajpaj maquimanda ñucanchita quishpichiyari nipanimi. Cai pachapi mandajuj llactacunapica, can Mandaj Dioslla, Taita Diospacha cajta yachachun, chashna rurapairi” nishpami mañajurca.

20Chaimandami Amoz shuti runapaj churi Isaiasca, Ezequiasman cashna nichun cacharca: “Israelcunata Mandaj Taita Diosca, cashnami nin: ‘Asiria llactata jatun mandaj Senaquerib shuti runa llaquichishcamanda, imatalla ñucata mañashcataca uyarcanimi’ ninmi.

21Chai jatun mandajtaca, Mandaj Diosca cashna nishpami riman: ‘Sion pueblopi causajcunaca, jarihuan nara tacarishca cuitsagu asinshnami, candaca yangapi churashpa na cazushpa asinajun. Jerusalenbi causajcunaca, can tigrashpa rijpica, umata cuyuchishpami asinajun.

22¿Pitata ninanda nalicachishpa, nali shimicunahuan rimarcangui? ¿Pitata shinlli rimashpa jariyashpa ricujurcangui? Israel llactapaj jucha illaj Diostamari, chashna rimajurcangui.

23Cambaj villaj runacunata cachashpami, Mandaj Diostaca ninanda nalicachishpa, rimashpa cashna nijurcangui: Ñucapaj ashtaca carretacunahuanmi, urcu pundacunaman, Líbano urcu ashtahuan jahua lomacunaman vichai rishcani. Chaipimi, jatun cedro quirucunata, ashtahuan juyailla ciprés quirucunata urmachisha. Chaipica, ashtahuan caru pushtucunapimi tiajusha, juyailla jihua junda bosque pambacunaman rishpami tiajusha.

24Ñucami, pugyucunata allashpa, ñuca na rijsishcacunapaj yacuta ufiarcani. Egipto llactata rijuj tucui yacucunatapash, ñuca chaquihuan sarushpami chaquichircani nijurcanguimi.

25Chashna tucunata ñaupa huatacunamandallata ñuca rurashcataca, ¿nachu uyarcangui? Chaitaca, punda punllacunallata ñuca yarijushcataca, ¿nachu uyarcangui? Cunanga, ñucami candaca pushamurcani. Canmi cai pueblo muyundi jatun pircacunatapash urmachishpa, rumi mundundalla saquishpa, jichushcata saquingui.

26Chai pueblocunapi causajcunaca, na shinllicunachu carca. Paicunaca, manllashpami musparinajurca. Paicunaca, pamba jihuacunashna, micuna llullu jihuacunashna, huasi jahuapi jihuacuna nara ali viñashpallata chaquishcashnami.

27Candaca, imashna cajtapash tucuitami yacharcani. Can maiman rishpa cutin tigramujtapash, can ñucahuan ninanda fiñarishcatapash yachanimi.

28Canga, ñucahuan ninanda fiñarishpa, ninanda jariyashpami, ñuca rinriman uyarimujta rimarcangui. Chaimandami candaca, ñuca garfio jirruta singapi churachishpa, caballopaj shimipi churachina ñuca jirruta, cambaj shimipi churachishpa, can maita shamushca ñandallata tigrachisha.

29Ezequiaslla, chashna tucunata can yachachunga, cashnatami ricuchisha: Cunan huatapash, cati huatapash paimanda viñashpa fucushca granotami micunguichi. Ña quimsa huata tucujpica, canguna tarpushca chagratami cozechanguichi. Uvastapash tarpushpami, chaipi fucushcacunata micunguichi.

30Judá llacta puramanda pacajushpa huaquin puchushcacunaca, alpa ucupi sapi quedashcamanda sapiyashpa, yura vichai viñamushpa cutin fucunshnami miranajunga.

31Jerusalenmandami, huaquin puchushcacuna llujshinga. Sion shuti urcumandami, quishpirishcacuna llujshinga. Tucuita Mandaj Taita Dios ñuca ninandapacha juyashcamandami, chashna rurasha.

32Chaimandami Mandaj Dios ñucaca, Asiria llactata jatun mandajmandaca, cashna nini: Cai puebloman yaicuitaca, na ushangachu. Cai pueblopica, shuj flechatallapash na cacharingachu. Macanajuna escudota apashpa, cai pueblo ñaupajpi shayarimuitapash na shamungachu. Baluarte nishcata shayachitapash, na ushangachu.

33Paica, maita shamushca ñandallatami tigranga. Cai puebloman yaicumuitaca, na ushangachu. Mandaj Dios ñucami, chashna nini.

34Ñucami, cai pueblotaca ayudashpa quishpichisha. Ñucallata juyarimanda, ñucata servij Davidtapash juyaimandami, chashna rurasha’ ninmi” nichunmi cacharca.

35Chai jipami, cashna tucurca: Mandaj Diospaj angelca, asiriocunapaj carpacunaman chai tutallata llujshishpami, patsaj pusaj chunga huaranga soldadocunata huañuchirca. Cayandi tutamandata jatarishpaca, tucuilla huañushca sirinajujtami ricunajurca.

36Chaimandami, Asiria llactata jatun mandaj Senaquerib shuti runaca, Nínive puebloman tigrashpa chaipi quedarca.

37Chaipimi cashna tucurca: Senaquerib runaca, Nisroc shuti paipaj diospaj huasipi, chai diosta ninanda alicachijujpimi, Adramelec shuti, Sarezer shuti paipaj churicunallata, espadahuan huañuchirca. Shina huañuchishpaca, Ararat shuti llactamanmi pacajushpa rinajurca. Paipaj randica, Esar-hadón shuti paipaj churimi mandajurca.