GÉNESIS 45 - Quichua Imbabura Bible

Joseca, paipaj huauquicunamanmi rijsirishca

1Joseca, paipaj ladopi tucui tianajujcunapaj ñaupajpica, ninandami huacanayachijurca. Shinamandami, na jarcari ushashpa: “Ñuca ñaupajmanda tucuicunata llujchipaichi” nishpa caparirca. Paipaj huauquicunaman José rijsirijujpica, pipash na paihuanga quedarcachu.

2Chaipimi paica, shinllita caparishpa huacarca. Shina huacajtaca, Egiptopi causajcunapash, Faraonbaj huasipi causajcunapashmi uyarca.

3Joseca, paipaj huauquicunataca:

—Ñucaca, Josemi cani. ¿Ñuca taitaca causajupanrachu?— nircami.

Shina nijpimi paipaj huauquicunaca, paipaj ñaupajpi musparishpa, imata nitapash na ushanajurca.

4Shinamandami Joseca, paipaj huauquicunataca:

—Cunanga, ñucapajman quimirimuichi— nirca.

Shina nijpi paicuna quimirijpimi Joseca, cashna nirca:

—Ñucaca, canguna Egiptoman jatushpa cachamushca, cangunapaj huauqui Josemi cani.

5Cunanga, na llaquirinachu canguichi. Ñucata caiman jatumushcamandapash, na fiñanajunachu canguichi. Cangunata causaihuan charingapajmi, Taita Diosca cangunata ñaupachishpa cachamuhuarca.

6Cai llactapica, ñami ishcai huatata yarjai tiashca. Shina cajpipash picha huatacaman yarjai tiangarami. Chai huatacunapica yapunapash, cozechanapash na tiangachu.

7Cai pachapi cangunapaj miraicunata causaihuan charingapajmi, Taita Diosca cangunapaj punda cachamuhuarca. Shinallata ninan ushaihuan cacharichishpa, causaita cungapajmi chashna cachamuhuarca.

8Shinamandami ñucataca, na canguna caiman cachamushcanguichi. Ashtahuangarin Taita Diosmi, Faraonbaj taitashna cachun, Faraonbaj huasipipash tucuita mandajuchun, tucuilla Egipto llactatapash mandaj cachun churahuashca.

9Ñuca taitapajman ucha rishpa, cashna nishpa villagripaichi: ‘Cambaj churi Josemi, cashna nin: Taita Diosmi ñucataca, tucuilla Egiptopi mandaj cachun churahuashca. Shina cashcamanda, na ashtahuan shuyashpa ñucapajman ucha shamuilla.

10Gosén shuti llactapi causangapaj shamuilla. Chaipi causashpami, ñuca ladollapi causangui. Cambash, cambaj churicunapash, cambaj churicunapaj churicunapash, cambaj animalcunapash, huarmi huagracunapash shamuichilla. Shinallata can tucui imatalla charishcacunandi shamuilla.

11Chaipimi, micunata carashpa charisha. Yarjai huatacunaca, picha huata tianrami. Cambash, cambaj huasi ucu purapash, can tucui charishca animalcunapash, ama yarjaimanda huañuchunmi, chashna charisha nijunmi’ nipaichi.

12Ricuichi, cangunapaj ñavihuan, ñuca huauqui Benjaminbaj ñavihuambachami, cangunahuan ñuca rimajujtaca ricuhuanguichi.

13Egiptopi ninanda alicachi tucushca tiajujtapash, tucui imatalla ricushcatapash ñuca taita yachachun villagripaichi. Ucha rishpa, ñuca taitata caiman pushamugripaichi— nircami.

14Shina nishpami, paipaj huauqui Benjaminbaj cungapi ugllarishpa huacarca. Benjaminbashmi, paipaj cungapi ugllarishpa huacarca.

15Tucuilla paipaj huauquicunatapash muchashpami, ugllarishpa huacarca. Chai jipami, paipaj huauquicunaca paihuan parlanajurca.

16“Josepaj huauquicunami shamushca” ninajujmi, Faraonbaj huasipica uyarirca. Chaita uyashpami Faraonbash, paita servijcunapash cushijunajurca.

17Shinamandami Faraonga, Josetaca cashna nirca:

—Cambaj huauquicunataca, cashna ni: ‘Caita ruraichi: Cangunapaj animalcunaman apachishpa, Canaán llactaman tigraichi.

18Cangunapaj taitata, cangunapaj familiacunata pushashpa, ñucapajman tigramuichi. Ñucami, Egipto llactapi ima ashtahuan ali tiashcata carasha. Cai llactapi imalla ashtaca tiashcatapashmi micunguichi’ ni.

19Canga, cashna nishpa mandangui: ‘Cashna ruraichi: Cai Egipto llactamanda carretacunata apashpa, cangunapaj huahuacunata, cangunapaj huarmicunata, cangunapaj taitatapash pushashpa tigramugrichi’ nishpa mandangui.

20Canguna imatalla charishcacunata saquishpapash, na llaquirinachu canguichi. Egipto llactapi imalla tiashcacunapash, cangunapajmi canga— nircami.

21Shina nijpimi, taita Israelpaj churicunaca chashna ruranajurca. Joseca, Faraón imashna mandashcashnallatami carretacunatapash, ñambi imata micuchumbash paicunaman curca.

22Tucui paicunamanmi, mudarichun churajunacunata curca. Benjaminmanmi, quimsa patsaj culquicunatapash, mudarichun picha churajunatapash curca.

23Paipaj taitamambash, caicunatami cacharca: Egiptopi ima ashtahuan ali tiashcatami, chunga burrocunapi apachishpa cacharca. Shinallata paipaj taita ñambi micuchumbash, chunga huarmi burrocunapimi micunata, trigota, tandata cacharca.

24Paipaj huauquicunataca: “Ñambi na fiñanajushpami rina canguichi” nishpa, cayacaman nishpa cachajpimi, paicunaca rinajurca.

25Shina cachajpimi Egiptomanda Canaán llactaman vichai rishpa, paicunapaj taita Jacobopajman chayanajurca.

26Shina chayashpaca, ali villaitami cashna nishpa villanajurca: “Joseca causajunrami, paica tucuilla Egipto llactata mandajmi” ninajujpimi, Jacoboca paicunata na crishpa, shungupi ninanda llaquirirca.

27Chaimandami paicunaca, tucui imatalla José paicunaman parlashcacunata paiman villanajurca. Jacoboca, paita pushachun José cachamushca carretacunata ricushpami, shungupi ninandapacha cushijurca.

28Shina cashpami taita Israelca, cashna nirca: “Chaitallami yachangapaj munarcani. Ñuca churi Joseca causajupashcarami. Nara ñuca huañushpallata rishpami, paitaca ricusha” nircami.