JEREMÍAS 25 - Quichua Imbabura Bible

Canchis chunga huatatami, llaquinayaita causanga

1Josías shuti runapaj churi Joacim runa, Judá llactata ña chuscu huatata mandajujpimi, jatun mandaj Nabucodonosor runaca, Babilonia llactata mandai callarirca. Chai huatapimi Mandaj Diosca, Judá llactapi tucui causajcuna imalla tucunataca, Jeremiasman villarca.

2Chai shimicunataca, profeta Jeremiasca, Judá llactapi causanajuj tucui gentecunamambash, Jerusalenbi tucui causajcunamambashmi, cashna nishpa villajurca:

3“Amón shuti runapaj churi Josías shuti runa, Judá llactata ña chunga quimsa huatata mandajui punllamandapacha cunan punllacamanmi, Mandaj Diosca cai shimicunata villajuhuarca. Ñami chaica, ishcai chunga quimsa huata tucun. Chai shimicunataca, pundamandapachami na shaijushpa villajurcanilla. Ashtahuangarin cangunaca, na uyanayachishpami causarcanguichi.

4Mandaj Diosca, pai ima nishcata villashpa paita tucui servijcunataca, pundamandapachami cangunapajman na shaijushpa cachamujurcalla. Ashtahuangarin cangunaca na uyashpami causarcanguichi. Chaita uyangapaca, cangunapaj rinritapash na mañachishpami causarcanguichi.

5Paicunaca cashnami villanajun carca: ‘Cunanga, nali causaita, nalita ruranacunata saquishpa, Diospajman tigrarichi. Shina tigrarishpaca, cangunamambash, cangunapaj ñaupa taitacunamambash, Mandaj Dios carashca cai llactapica causaitami causanguichi.

6Shuj dioscunataca, na catinachu canguichi. Chai dioscunataca, na servishpa alicachinachu canguichi. Cangunapaj maquihuanllata rurashca dioscunahuambash, na ninanda fiñachinachu cahuanguichi. Na fiñachijpica, ñucapash cangunataca na ima llaquita rurashachu’ ninmi nishpami, villanajun carca.

7‘Shina villajpipash, na uyangapaj munashpami causarcanguichi. Ashtahuangarin cangunallata llaquichi tucungapajmi, cangunapaj maquihuan rurashca dioscunahuan, ñucata ninanda fiñachircanguichi’ ninmi Mandaj Diosca.

8Shinamandami tucuita Mandaj Diosca, cashnatapash nin: ‘Ñuca rimashcataca, na uyanayachishpami causarcanguichi.

9Ricuichi cunanga, jahua lado llactapi causanajuj, tucui aillucunatapash, Babilonia llactata jatun mandaj, ñucata servij Nabucodonosor shuti runatapash pushamuchunmi cachagrini. Paicunataca, cai llactatapash, caipi tucui causajcunatapash, cai muyundi tucui llactacunatapash, llaquichinajuchunmi pushamusha. Shina tucuchishpami, na cazushpa asi tucuchun, asishpa ricui tucuchun, tucui causaipi llaquinayaita tucuchi tucushca causachun saquisha. Mandaj Dios ñucami, chashna nini.

10Paicuna puramandaca, ninanda cushijushpa candanatapash, cushijuihuan caparinatapash, cazarajcuna candanatapashmi chingachisha. Shinallata cutana rumi huacashcapash, na uyaringachu. Maipi micha punchayachijllapash, na ricuringachu.

11Tucui cai llactami, manllanayaita tucuchi tucunga. Cai llactapi causajcunaca, canchis chunga huatatami, Babilonia llactata jatun mandajtaca servishpa causanajunga.

12Mandaj Dios ñucallatami, cashnatapash nini: Chai canchis chunga huata pactajpimi, Babilonia llactata jatun mandajtaca llaquichisha. Paicuna nalita rurashcamandami, chai llactapi causajcunatapash llaquichisha. Caldeocunapaj llactataca, causaita causaicaman jichushca tiachunmi saquisha.

13Chai llactaman llaquicunata cachanata tucuita villashcashnallatami, chai llactaman llaquita cachamusha. Tucui shuj llactacunatapash, ñuca llaquichinata Jeremías villashcata cai libropi tucuita escribishca tiajushcashnallatami cachamusha.

14Paicunatapash, shuj ashtaca llactacuna ashtaca jatun mandajcunami mishashpa mandanajunga. Shinami paicunataca, paicuna nalita rurashcashnallata, paicunapaj maquihuan imatalla rurashcashnallata, cuna cashcataca cushpa llaquichisha’ ninmi” nijurcami.

Ninanda fiñarishpami, copamanda talinshna shuj llactacunapi causajcunata llaquichinga

15Israelcunata Mandaj Taita Diosca, cashnami nihuarca: “Ñuca ninandapacha fiñarishca vino copata ñuca maquimanda japi. Chai vinotaca, canda ñuca cachashca tucui llactacunapi causajcuna ufiachun cungui.

16Chaita ufiashpaca, espadahuan llaquichi tucunata, paicunapaj llactaman ñuca cachajpimi, chujchushpa loco tucunajunga” nihuarcami.

17Shina nijpimi, Mandaj Diospaj maquimanda chai copata japishpa, Mandaj Dios cachashca tucui llactacunapi ufiachun curcani.

18Jerusalenbipash, Judá llactapi tiaj tucui caishuj pueblocunapipash, jatun mandajcunaman, caishuj mandajcunamambashmi ufiachun curcani. Cunambishnallata, na cazushpa asi tucunapi, asishpa ricui tucunapi, ima llaquipash japishpaca alichari canman ni tucunapi churangapajmi chashna curcani.

19Shinallata Egipto llactata jatun mandaj Faraón runamambash, pai churashca mandajcunamambash, paita servijcunamambash, paipaj tucui gentecunamambashmi ufiachun curcani.

20Shuj llactacunamanda chapurishca gentecunamambash, Uz shuti llactata tucui jatun mandajcunamambash, Filistea llactapi tiaj Ascalón, Gaza, Ecrón shuti pueblocunata tucui jatun mandajcunamambash, Asdod shuti pueblopi huaquin puchushca gentecunamambashmi ufiachun curcani.

21Shinallata Edom, Moab, Amón shuti llactacunapi causajcunamambashmi ufiachircani.

22Tiro shuti, Sidón shuti pueblocunata tucui jatun mandajcunamambash, mama cucha chai lado manñacunapi tiaj tucui llactacunata jatun mandajcunamambashmi ufiachun curcani.

23Dedán, Tema, Buz shuti aillucunamambash, ñavi pata milmacunata ruturij runacunamambashmi ufiachun curcani.

24Arabia llactata tucui jatun mandajcunamambash, jichushca pambapi causanajuj shican shican aillu runacunata tucui jatun mandajcunamambashmi ufiachun curcani.

25Zimri, Elam, Media shuti llactacunata tucui jatun mandajcunamambashmi ufiachircani.

26Jahua ladoman tiaj tucui llactacunata jatun mandajcunamambash, chai ladollapi causajcunamambash, carupi causajcunamambashmi ufiachun curcani. Tucui cai pacha llactacunapimi, caishujman chaishujman ufiachun curcani. Paicunapaj jipaca, Babilonia llactata jatun mandajmi ufianga.

27“Paicunataca cashna ningui: Tucuita Mandaj, israelcunapaj Taita Diosca cashnami nin: ‘Caita ufiashpa machashpa, shungu tigrachishpa urmaichi. Canguna purata espadahuan llaquichinajuchun, ñuca cachashcamandami, na jataringuichi’ ninmi ningui.

28Cambaj maquipi charijuj chai copamanda ufiangapaj na japingapaj munajpica, canga cashna ningui: Tucuita Mandaj Diosca, cashnami nin: ‘Ufianapachami canguichi.

29Ricuichi, ñuca shutipi mañajuj pueblotarami, llaquichi callarircani. ¿Cangunarachu na llaquichi tucuna canguichi? Cai llaquimandaca, na quishpiri ushanachu canguichi. Tucui cai pachapi causajcunatami, espadahuan huañuchigrini’ ninmi tucuita Mandaj Diosca ningui.

30Canga, ñuca tucui ima nishca shimitami cashna nishpa, paicunaman villana cangui: ‘Mandaj Diosca, jahuamandami leonshna huacamunga. Pai causajuj jucha illaj huasimandami shinllitapacha rimamunga. Pai causana huasita fiñashpami, ninandapacha leonshna huacamunga. Cai pachapi tucui causajcunatami, uvasta sarujcuna candanshna candashpa llaquichinga.

31Culun nijujca, cai pacha tucuri manñacunacamanmi uyaringa. Mandaj Diosca, tucui cai pachapi causajcunapaj Juez cashpami, tucui llactacunapi causajcuna imatalla rurashcata ricushpa llaquichinga. Paita na manllajcunataca, espadahuan huañuchijcunamanmi cunga’ ninmi Mandaj Diosca nishpami villana cangui” nihuarcami.

32Tucuita Mandaj Diosca, cashnatapashmi nihuarca: “Ricuichi, llactan, llactanmi ninanda llaquichishpa ringa. Cai pacha tucuri manñacunamandami, ninan huairahuan tamia jataringa.

33Chai punllapica, Mandaj Dios ñuca huañuchishcacunaca, tucui cai pachapimi shuj lado manñamanda caishuj ladocaman, shitashca sirinajunga. Chai huañushcacunamandaca, pipash na yarishpa yarishpa huacangachu. Paicunataca, pipash na tandachingachu, pipash na pambangachu. Huanushnami, alpa jahuapi shitashca sirinajunga.

34Michijcunaca, ninanda caparishpa huacaichiyari. Llamagucunashna ashtaca gentecunata shinllita mandajcuna, llaquirishpa ñutu alpapi urmaichiyari. Cunan punllami, cangunapaj cungata muchuna punllapash, caita chaita cachana punlla pactamushca. Juyailla vasota faquishcashnami urmanguichi.

35Chai punllapica, michij runacunapash na pacajui ushangachu. Llamagucunashna ashtaca gentecunata shinllita mandajcunaca, pipash na quishpiri ushangachu.

36Mandaj Diosca, michina pambacunatapashmi tucuchinga. ¡Shinamandami michijcunaca, ninanda caparishpa huacanajunga! ¡Llamagucunashna ashtaca gentecunata shinllita mandajcunapashmi, ninanda huacanajunga!

37Mandaj Diosca, ninandapacha fiñarishpami, michina juyailla pambacunataca tucuchinga.

38Huahua león paipaj utujuta saquishpa rinshnami saquirca. Paicunata llaquichishpa charijcuna ninanda fiñarishpa shamushpami, paicunapaj llactataca llaquinayaita tucuchirca. Ninandapacha fiñarishpami tucuchirca” nijurcami.