JOB 29 - Quichua Imbabura Bible

Job runaguca, punda cushijushcatami yarishca

1Job runaguca, punda villashcata yarishpami, cutinllata cashna nijurca:

2“¡Punda yalishca quillacunapishna maijambash tigrachishpachari ali canman! Taita Dios cuidajpi causajurcani, chashnallata causachun tigrachishpachari ali cahuanman.

3Chai horasca, paipaj lamparatami, ñuca uma vichaipi churashpa punchayachijurca. Yanapi cashpapash, chai michapimi purin carcani.

4Ñuca chairalla viñai cajpipash, Taita Diosca paipaj yuyaihuanmi, ñuca carpatapash cuidarian carca.

5Tucui Ushaita Charij Dios ñucahuan cajpica, ñuca huahuacunapash, ñuca muyundipimi causanajurca.

6Ñuca chaquitaca, lechehuanmi maillan carcani. Rumipash, jatun yacutashnami ñucapica aceiteta talin carca.

7Imata rurashcacunata ricungapaj, pueblo punguman llujshishpapash, ñuca tiarinataca, plazapimi alichin carcani.

8Chairalla viñaicuna ñucata ricushpaca, pacajujllami carca. Rucucunapash, tianajushcamanda jatarishpami shayarin carca.

9Mandajcunapash, imatallapash na rimai ushanllu carca. Ashtahuangarin maquihuanmi, shimita quilparinajuj carca.

10Alicachi tucushcacunapash, upalla tucunllami carca. Paicunapaj jalluca, shimi ucupimi llutarin carca.

11Ñucata uyajcunaca: ‘Cai runaca cushijushcami’ ninajunmi carca. Ñucata ricujcunapash, ñuca imashna cajtami parlanajun carca.

12Imagutapash na charij runagu caparijujpica, ñucami quishpichin carcani. Taita mama illaj huahuaguta pipash na ayudajpica, ñucami ayudan carcani.

13Chingagrijuj runata ayudajpimi, ñucataca bendiciahuarca. Sapalla mamagu huacajujpipash, ñucami cushichin carcani.

14Ñucaca, imatapash cashcatapacha rurashcahuanmi churajunshna causarcani. Chaillatami ñucataca quilpahuarca. Aliguta ruranaca, jahualla churajunashna, umapi churana diadema nishcagushnami carca.

15Ñausapaca, ricujuj ñavishnami carcani. Chaqui faquirishcapaca, ali chaquishnami carcani.

16Imagupash illajcunapaca, taitashnami carcani. Imagutapash na yachai ushashpaca ñucamanmi, uchalla villanajun carca.

17Nalita ruraj runataca, juchu quirucunatami faquin carcani. Imatapash paicunapaj quiruhuan charijujtami cacharichin carcani.

18Ñucaca, cashnami yajurcani: ‘Ñuca tazimbillatami huañusha. Ñuca causai punllacunataca, t'iyu alpatashnami mirachisha’ yajurcanimi.

19Ñuca sapica, yacu manñapimi carca. Ñuca malquicunapica, jamzi paramu urmajujllami carca.

20Ñucaca, cutin cutinmi alicachi tucujurcani. Ñuca arcotapash, ñuca maquihuanmi shinllita charijurcani.

21Ñucata uyangapajmi, shuyanajun carca. Ali yuyaita ñuca cujpica, upallami uyanajun carca.

22Ñuca rimajpipash, na tigrachinajurcachu. Ñuca aliguta yarichishcapash, paicunapimi yacuyarca.

23Ñucataca, tamiatashnami shuyanajun carca. Jipa tamiata shimi pascariaj shuyajunshnami, shuyanajun carca.

24Paicunahuan ñuca asijpipash, na crinajurcachu. Punchapamba ñuca ñavitapash, na urai cumurichinllu carca.

25Paicuna imalla rurashcataca, ñucami ricun carcani. Ñucaca paicunapaj chaupipimi, mandaj runashna tiarij carcani. Ñucaca, soldadocunata mandanshnami causajurcani. Huacajcunata cushichinshnami causarcani.