JOB 36 - Quichua Imbabura Bible

Eliú shuti runaca, Taita Dios jatun cajtami alicachijushca

1Eliú shuti runaca, cashnatapash nijurcarami:

2“Ashatalla shuyahuai, candaca yachachishallami. Ñucaca, Taita Diospaj randi rimana ali yuyaicunata charinirami.

3Ñucaca, carucunamanda ali yachaita apamushpami, ñucata Ruraj Diosca imatapash cashcatapacha ruraj cajtaca ricuchisha.

4Ñuca villashca shimicunaca, napacha llullachu. Ima pandatapash na yachachij ñucaca, canhuanmi cani.

5Ricui, Taita Diosca jatun Diosmi. Shina cashpapash, pitapash na yangapi churanllu. Paica, ninan ushaita charij ali yachaitami charin.

6Paita na manllaj runamanga, causaita na cungachu. Ashtahuangarin llaquichi tucushpa causajcunamanmi, paicuna japina cashcata cunga.

7Paipaj ñavitaca, imatapash cashcatapacha rurajcunamandaca, napacha anchuchingachu. Ashtahuangarin jatun mandajcunahuanmi, mandangapaj tiarinapi causaita causaicaman tiachinga. Paicunaca jatunyachi tucushcami canga.

8Chaquipi huatana grillohuan huatashpa charijujpipash, llaquichina huascacunahuan huatashpa charijujpipash,

9Diosmi, paicuna imatalla rurashcataca ricuchinga. Shinallata paicuna na cazushpa yalishcatapashmi ricuchinga.

10Chashna ricuchishca jahuami, pai jarcashpa rimashcata uyachun, paicunapaj rinrita pascashpa: ‘Nalita ruranata saquishpa, ñucapajman tigrarimuichi’ ninga.

11Shina nishcata uyashpa, paita servishpaca, ali punllacunata, ali huatacunata causashpami, huañuicaman aliguta cushijuihuan causanajunga.

12Ashtahuangarin na uyashpaca, espadahuanmi huañuchi tucunajunga. Ali yachaipash illajmi tucurinajunga.

13Ashtahuangarin mishqui shimi jayaj shungucunaca, paicunapaj shungu ucupillami ninanda fiñarishpa tucurinajun. Paicunata Dios huatajpica, na capari ushanajungachu.

14Paicunaca, chairalla viñai cashpallatami huañunajunga. Paicunaca, jari purallata siririj sodomita nishca puracunashnami huañushpa tucurinajunga.

15Imagutapash na charij runataca, imagutapash na charij canamanda llujchingami. Llaquipi cashpa caparijujpipash, paitaca uyangami.

16Shinallatami llaquichishpa rimaj runamandaca, candapash quishpichinga. Ima llaquipash na japina pushtupimi, causachun churanga. Chaipimi, meza junda alipacha micunatapash, canman alichinga.

17Ashtahuangarin canga, imagutapash alita, imatapash cashcatapacha yaringapaj randica, cambaj yuyaipica Diosta na manllajcunapaj yuyaitallami jundachishcangui.

18Shinamandami manllana cangui. Pactarallapash pai ninanda fiñarishpa, canda huactashpa anchuchinman. Chai llaquimandaca, imata cushpapash napacha quishpiri ushanguichu.

19Candaca, orota charijpilla, na cashpaca ninan ushaita charijpilla, ¿llaquingallami yanguichu?

20Tutayachunga ama shuyajuichu. Tutayajpica, gentecunapash paicuna maipi tianajushcamandaca chinganllami.

21Nalita rurangapaca ama tigranguichu, chaita ruranamandaca jarcaringui. Dios llaquichijuchun saquingapaj randica, nalita ruranatarami agllarcangui.

22Ricui Taita Diosca, tucuita yali ninan ushaita charij Diosmi. Paishna yachachij Diosca, ¿pita tiangayari?

23Pai imatalla ruranataca, ¿pita yachachirca? ¿Pita paitaca: ‘Canga, nalitami rurashcangui’ ninga?

24Pai imatalla rurashcamandaca, jatunyachinata yarinami cangui. Chai rurashcacunatami, runacunaca ricunajun.

25Pai imatalla rurashcacunataca, tucui runacunami carumandallata ricunajun.

26Ricuichi, Taita Diosca jatunmi. Chaitaca, ñucanchica na yachashpami causanajunchi. Pai causashca huatacunatapash, napacha cuentai ushanallachu.

27Paimi, yacu samai llujshijpipash, tamiata rurangapaj shujpilla tandachin.

28Chai fuyu yacuyashpami, runacunapaj jahuapi ninanda urmamun.

29Fuyu maipi callarijtapash, tucurijtapash, ¿pita yachai ushangayari? Culun nishpa, pai maipi tiajujtapash, ¿pita yachangayari?

30Ricuichi, pai punchayachijujtaca chai jahuapimi churarca. Chaihuanmi, mama cucha ucucunatapash jatachinshna punchayachirca.

31Chaihuanllatami runacunatapash llaquichin. Chaicunahuanmi, ashtaca gentecunamambash micunata caran.

32Ama punchayachijuchunga, fuyuta churashpami quilpan.

33Pai fiñarishcataca, culun nishpami villan. Nalita rurajcunata ninanda fiñashpa llaquichinataca, shinlli huairahuan tamiapashmi villan.