EZEQUIEL 6 - Quichua Imbabura Bible

Israel urcucunata llaquichinatami villashca

1Mandaj Diosca cai shimicunatami, cashna nishpa villahuarca:

2“Huañuna aichayu runa. Israel llactapi tiaj urcucunata vichai ricushpa, paicunata llaquichinata villai.

3Paicunataca cashna ningui: Israel llactapi tiaj urcucunalla, Mandaj Jatun Diospaj Shimita uyaichi. Mandaj Jatun Diosca, urcucunatapash, lomacunatapash, chaipi tiaj jatun larca yacucunatapash, pugru pambacunatapash cashnami nin: ‘Ricuichi ñuca, ñucallatami cangunata llaquichijuchun espadata cachamusha. Shinallata lomacunapi tiaj cangunapaj altarcunatapashmi tucuchisha.

4Cangunapaj altarcunapash, llaquinayaitami tucuchi tucunga. Indiman rijchaj, cangunapaj dioscunapash faqui tucungami. Canguna puramanda huañushcacunatapash, cangunapaj yanga dioscunapaj ñaupajpimi urmachisha.

5Israelcunapaj huañushca cuerpocunataca, yanga dioscunapaj ñaupajpimi churasha. Paicunapaj tullucunataca, cangunapaj altar muyundipimi, caita chaita shitasha.

6Canguna maipi causanajuj pueblocunapash, jichushcami siringa. Lomacunapi tiaj altarcunapash, llaquinayaitami tucuchi tucunga. Cangunapaj altarcunaca shitashca, llaquinayai tucuchi tucushpa, shitashca cachunmi chashna ruranga. Cangunapaj yanga dioscunapash faqui tucungami. Indiman rijchaj cangunapaj yanga dioscunapash, tucuchi tucungami. Canguna imatalla rurashcapash, yangami tucuringa.

7Huañushcacunapash, cangunapaj chaupipillatami urmanajunga. Chaita ricushpami ñucataca, Mandaj Dios cajta yachanguichi.

8Ashtahuangarin huaquingunataca saquishami. Shina saquijpimi, llacta puracunapica espadahuan huañuchi tucunamanda pacajushpa huaquin puchushcacunata charinguichi. Caita chaita llujchishpa cachai tucushpami, chashna causanguichi.

9Canguna puramanda pacajushpa puchushcacunaca, shuj llactacunapi prezu causashpami, ñucata yarinajunga. Paicunapaj shungupi huainayanatalla munashpa ñucamanda anchurishcamandami, ninanda llaquirircani. Shinallata paicunapaj ñavihuan ricushpa huainayanshna, yanga dioscunata catishcamandami, chashna llaquirircani. Tucui millanayaicunata rurashpa, jatun nalicunata rurashcamandami, pingai tucunajunga.

10Shinamandami ñucataca, Mandaj Dios cajta yachanajunga. Shinallata llaquichishami nishpaca, na yangata nijushcatami yachanajunga’ nishpa villai” nihuarcami.

11Mandaj Jatun Diosca, cashnatapashmi nihuarca: “Cambaj maquihuan huactarishpa, chaquihuan tushurishpa cashna ningui: ‘Cai tucui millanayaita ruraj israelcunaca, ¡aij imachari tucunga!’ ningui. Paicunaca, espadahuan, yarjaihuan, jatun ung:uihuambashmi huañunga.

12Carupi causajcunaca, jatun ung:uihuanmi huañunga. Ladollapi causajcunataca, espadahuanmi huañuchinga. Maijan puchushcacunaca, paicunata llaquichijcuna muyundi shayanajujpillatami, yarjaimanda huañunga. Chashnami, ñuca fiñarishcataca paicunapi pactachisha.

13Paicunapaj yanga dioscunapaj chaupipi, tucui altar muyundicunapi, lomacunapi, tucui urcucunapi, fanga junda quiru ucucunapi, fanga junda encina nishca quiru ucucunapimi, paicunapaj huañushcacunaca sirinajunga. Shina sirinajujpimi ñucataca, Mandaj Dios cajta yachanguichi. Chai pushtucunapimi, paicunapaj yanga dioscunaman carashpa inciensota cushnichinajurca.

14Paicunataca, ñuca maquita chutashpami llaquichisha. Paicuna maipi causanajujpipash, Diblat shuti puebloman rina ñan ladopi tiaj jichushca pambatapash yali jichushcatami saquisha. Shina llaquinayaita tucuchishcata ricushpami ñucataca, Mandaj Dios cajta yachanajunga” nihuarcami.