2 SAMUEL 21 - Quichua Imbabura Bible

Gabaonitacunapash, paicunata llaquichishcashnallatami llaquichishca

1David mandajui punllacunapica, quimsa huatatami jatun yarjai tiarca. Shinamandami Davidca, Mandaj Diosta tapurca. Shina tapujpimi Mandaj Diosca, cashna nirca: “Saulpash, paipaj huasi ucu purapash, gabaonita nishca gentecunata huañuchishpa yahuarta jichashcamandami, cai jatun yarjaica tian” nircami.

2Shina nijpimi jatun mandajca, gabaonitacunata cayashpa paicunahuan parlajurca. (Gabaonitacunaca, na Israel purachu carca. Ashtahuangarin amorreo puramanda puchushcacunami carca. Paicunatami israelcunaca, na llaquichishunllu nishpa juramentushca carca. Shina cajpipash Saulca, Israel llactapi, Judá llactapi causajcunapi ali ricuringapajllami, paicunata huañuchingapaj yarijushca carca).

3Gabaonitacunata David cayashpaca, cashnami nirca:

—¿Cangunamandaca imatata rurasha? Mandaj Dios carashca llactata canguna bendicianajuchunga, ¿imashnata cangunataca cushichisha?— nircami.

4Shina nijpimi gabaonitacunaca, cashna nishpa tigrachinajurca:

—Saulhuan, paipaj huasi ucu purahuan culquimanda, oromanda ñucanchi fiñanajushpa rimarinaca na tianllu. Israel runacuna huañuchi tucuchun nishpapash, na ninajunchica— ninajurcami.

Shina nijpimi, Davidca:

—Shina cashpaca canguna imata rurai nijpipash, rurashallami— nircami.

5Shina nijpimi paicunaca, jatun mandajtaca cashna ninajurca:

—Chai runami, ñucanchitaca tucuchirca. Paica, tucui cai Israel llactapica, shujllatapash na saquishpa tucuillata tucuchingapajmi yarijushca carca.

6Shina cashcamandaca, Mandaj Dios agllashca Saulpaj Gabaa shuti pueblopi, Mandaj Diospaj ñaupajpi sipishpa huañuchingapaj, paipaj churicunamanda canchis runacunata cuhuai— nircami.

Shina nijpimi, jatun mandajca:

—Ari, ñucallata cushallami— nirca.

7Jatun mandajca, Saulpaj churi Jonatanbaj churi Mefi-boset shuti runatallami na curca. Paicunaca, ima llaquitapash ama rurangapaj nishpami, Mandaj Diospaj shutipi Davidhuan, Jonatanhuanga juramentushca carca. Chaimandami na curca.

8Shina cashpapash jatun mandajca, Aja shuti runapaj ushi Rizpa shuti huarmihuan Saúl charishca Armoni shuti, Mefi-boset shuti churicunatami apamurca. Shinallata Saulpaj ushi Mical shuti huarmipaj picha churicunatapashmi apamurca. Chai churicunataca, Mehola shuti pueblopi causajuj Barzilai shuti runapaj churi Adriel shuti runahuanmi charishca carca.

9Paicunataca, gabaonita nishca gentecunapaj maquipi cujpimi, Mandaj Diospaj ñaupajpi shuj lomapi sipishpa huañuchinajurca. Chashnami chai canchis runacunaca, tucuilla huañurca. Paicunataca, cebadata cozechai callarina punda punllacunapimi huañuchirca.

10Chaimandami, Aja shuti runapaj ushi Rizpa shuti huarmica, cañamu telata japishpa, shuj jatun rumi jahuapi pai tiaringapaj mandarca. Paica, cebadata cozechai callarina punllamandapacha tamiashpa, paicunapaj cuerpota mutiyachingacamanmi, chai huañushcacunataca, punllapash alasyu animalcuna ama micuchun, tutapash sacha animalcuna ama micuchun cuidashpa tiajurca.

11Saulpaj caishuj huarmi, Aja shuti runapaj ushi Rizpa shuti huarmi chashna rurajujtaca, Davidmanmi villanajurca.

12Chaimandami Davidca, Saulpaj tullucunata, Saulpaj churi Jonatanbaj tullucunata apamungapaj rirca. Chai tullucunataca, Galaad llactapi tiaj Jabes shuti pueblopi causaj runacunami Saultaca, Gilboa shuti urcupi filisteocuna huañuchishpa, Bet-san shuti pueblo plazapi huarcushcata shuhuashca carca.

13Shinamandami Saulpaj tullucunata, paipaj churi Jonatanbaj tullucunata, chai llactamanda apachun mandarca. Shinallata sipishpa huañuchi tucushcacunapaj tullucunatapashmi, tandachishpa apachun mandarca.

14Chashna apashpami, Saulpaj tullucunata paipaj churi Jonatanbaj tullucunatapash, Benjamín llactapi tiaj Zela shuti pambapi pambarca. Chaitaca, Saulpaj taita Cis shuti runata pambashca utuju ladopillatami pambarca. Jatun mandaj imatalla mandashcataca, tucuitami ruranajurca. Chai jipami Taita Diosca, chai llactapi causajcunaman alita rurai callarirca.

Davidtaca, manllanayai jatun runapaj maquimandami, Abisai runaca quishpichishca

15Filisteocunaca, cutinmi israelcunahuan macanajui callarirca. Chaimandami Davidca, paita servijcunandi urai shamushpa, filisteocunahuan macanajurca. Chai macanajuipimi, Davidca ninanda shaijurca.

16Manllanayai jatun runacunapaj miraipura Isbi-benob shuti runami, Davidta huañuchingapaj munarca. Paipaj lanzaca, quimsa kilo chaupitashna pezaj broncemi carca. Shinallata pai chumbilishcapica, mushuj espadata satirishcami carca.

17Ashtahuangarin Sarvia shuti huarmipaj churi Abisai runami, Davidta ayudangapaj chayashpa, chai filisteo runataca chugrichishpa huañuchirca. Chaimandami Davidpaj soldadocunaca, cashna nishpa juramentunajurca: “Cunanmandaca, napacha ashtahuan macanajungapaj ñucanchihuan llujshinguichu. Can huañushpaca, israelcunapaj micha lamparata huañuchishcashnami canga” ninajurcami.

Davidpaj soldadocunami, manllanayai jatun runacunata huañuchishca(1 Crón. 20:4-8)

18Chai jipaca, cutinmi caihuanga ishcai viajeta, Gob shuti pueblopi filisteocunahuan macanajui tiarca. Chaipimi, Husa shuti pueblomanda Sibecai shuti runaca, manllanayai jatun runacunapaj miraipura Saf shuti runata huañuchirca.

19Chai jipapash cutinmi, Gob shuti pueblopica, filisteocunahuan macanajui tiarca. Chai macanajuipica, Belén pueblomanda Jaare-oregim shuti runapaj churi Elhanán shuti runami, Gat pueblomanda Goliat shuti runata huañuchirca. Goliat runapaj lanzaca, telarpi pilluna caspishna racumi carca.

20Chai jipapash Gat pueblopica, cutinmi shuj macanajui tiarca. Chaipica, maquipipash chunga ishcai dedota, chaquipipash chunga ishcai dedotallata charij, jatun runami tiarca. Tucuimandaca, ishcai chunga chuscu dedomi carca. Paipash, jatun manllanayai runacunapaj mirai purallatami carca.

21Paica, israelcunatami rimajurca. Shina cajpipash, Davidpaj huauqui Simea shuti runapaj churi Jonatanmi huañuchirca.

22Chai chuscu jatun runacunaca, Gat pueblopi causaj manllanayai jatun runacunapaj miraicunami carca. Paicunaca, Davidpaj maquipi, paita servijcunapaj maquipimi huañurca.