2 SAMUEL 13 - Quichua Imbabura Bible

Amnonmanda, Tamarmandami villajun

1Chai jipami cashna tucurca: Davidpaj churi Absalón runaca, Tamar shuti juyailla panitami charirca. Davidpajllata churi Amnón shuti runami, paitaca ninandapacha munashpa ricun carca.

2Amnón runaca, paipaj pani Tamarta ninandapacha munashpami huañujurca. Tamarca, maijan jarihuambash na tacarishca cajpimi, Amnón runapaca imata ruraitapash, na ushanalla ricurirca.

3Amnón runaca, shuj ali cumbatami charirca. Paica, Davidpaj huauqui Simea shuti runapaj churi Jonadab shuti runami carca. Jonadab runaca, imatapash alipacha yachashca runami carca.

4Paimi Amnón runataca, cashna nirca:

—Jatun mandajpaj churi, ¿imashpata punllandi chashna jamziyashpa catingui? Ima cajpipash, ¿nachu ñucamanlla villahuanguiman?— nircami.

Shina nijpimi Amnón runaca, cashna nishpa tigrachirca:

—Ñuca huauqui Absalonbaj pani Tamar cuitsagutamari, ninanda munani— nircami.

5Shina nijpimi Jonadab runaca, cashna nirca:

—Huañujuj tucushpa, cambaj camapi siriri. Cambaj taita canda ricungapaj shamujpica, cashna ningui: ‘Micunata yanushpa carachun, ñuca pani Tamarta caiman cachamupai. Ñuca ñaupajpi imatallapash yanujta ricushpa, paipaj maquimanda japishpa micungapaj cachamupai’ ningui— nircami.

6Shina nijpimi Amnón runaca, huañujuj tucushpa sirijurca. Chaimandami jatun mandaj David, paita ricungapaj shamujpica, jatun mandajtaca Amnón runaca cashna nirca:

—Ñuca pani Tamarta, caiman cachamupai. Ñuca ñaupajpi ishcai tortillata rurashpa carajpi, paipaj maquimanda japishpa micusha— nirca.

7Shina nijpimi Davidca, Tamartaca Amnón runapaj huasiman cashna nishpa cacharca:

—Cunanga, cambaj Amnón shuti runapaj huasiman rishpa, ima micunatallapash yanushpa caragri— nishpami cacharca.

8Paipaj turi Amnón runapaj huasiman Tamar cuitsa rijpica, paica camapimi sirijurca. Chaipimi Tamarca, jacuta japishpa masashpa, paipaj ñaupajpi tortillacunata rurashpa cusajurca.

9Chai jipaca, uchilla pailata japishpami, tortillacunataca pai ricujta llujchijurca. Ashtahuangarin na micungapaj munarcachu. Shinamandami Amnón runaca: “Tucuilla caipi tiajcuna canllaman llujshichi” nijpi, chaimandaca tucuilla canllaman llujshirca.

10Chai jipami Amnón runaca, Tamartaca cashna nirca:

—Micunata cambaj maquimanda japishpa micungapaca, puñuj ucuman apamuilla— nircami.

Shina nijpimi Tamarca, pai rurashca tortillacunata japishpa, paipaj turi Amnón runa puñuj ucuman aparca.

11Pai micuchun ñaupajpi ña churajpimi, Tamartaca japishpa:

—Ñuca panigulla, ñucahuan siririj shamui— nirca.

12Shina nijpimi Tamarca, cashna nirca:

—Ñuca turigulla, ama chashna nalita ruraichu. Cai Israel llactapica, chashna nalitaca na ruranachu. Ama chashna jatun nalita ruraichu.

13Can chashna rurajpica, ¿ñuca pingaihuanga maimanda rishayari? Cambash Israel llactapica, ninan nalita rurajpura ni tucushcami cangui. Shina cashcamanda cunanga, ñucahuan cazarasha nishpa, jatun mandajhuan parlagripai. Paica canhuan cazarachingapaca, na jarcangachu yanimi— nirca.

14Ashtahuangarin paica, na uyangapaj munashpami, Tamarta yali shinlli cashcamandaca aisashpa, munai na munai paihuan siririrca.

15Chai jipaca Amnón runaca, Tamartaca ninandapachami millanayachirca. Paica, punda ninanda munashpa paita juyashcatapash ashtahuan yalimi ninandapacha na ricunayachishpa millanayachirca. Chaimandami Amnón runaca:

—Jatarishpa caimanda ri— nirca.

16Shina nijpimi Tamarca, cashna nirca:

—Na chashna ruranachu cangui. Ñucata caimanda llujchishpa cachashpaca, ñucahuan sirijushpa nalita rurashcatapash ashtahuan yali nalitami ruragringui— nijpipash, paica na uyangapaj munarcachu.

17Ashtahuangarin pai mandashcata rurashpa causajuj, paita servij runata cayashpami:

—Cai huarmita caimanda canllaman llujchishpa, punguta vichai— nirca.

18Shina nijpimi, Amnón runata servij runaca, Tamarta canllaman llujchishpa punguta vicharca. Tamarca, tucui colorhuan rurashca churajunata churajushcami carca. Chashna churajunataca, jatun mandajcunapaj ushicuna, jarihuan nara tacarishca cashpami, chashna churajun carca.

19Tamarca uchufata japishpami, paipaj umapi churarirca. Shinallata tucui colorhuan rurashca churajunatapash liquirishpa, paipaj umapi maquita churashpami, caparishpa rijurca.

Absalón shuti runaca, Amnón shuti runata huañuchishpami pacajugrishca

20Chaimandami paipaj turi Absalón runaca, cashna nirca:

—¿Amnón shuti cambaj turichu, chashna nalita rurarca? Ñuca panigulla, cunambica upalla cailla, paipash cambaj turillatami. Ama chaimandaca, cambaj shungupi llaquirijuichu— nircami.

Shinami Tamarca, paipaj turi Absalonbaj huasipi llaquilla quedarca.

21Chaita tucuita yachashpami, jatun mandaj Davidca ninandapacha fiñarirca.

22Ashtahuangarin Absalón runaca, Amnón runahuanga ima alitapash, ima nalitapash na parlarcachu. Paipaj panita munai, na munai Amnón runa chashna rurashcamanda na ricunayachijushpapash, upalla carcallami.

23Ña ishcai huata yalishca jipami, cashna tucurca: Absalón runata servijcunaca, Efraín pueblo ladollapi tiaj Baal-hazar shuti pueblopimi, llamacunata rutunajurca. Chaimanmi Absalón runaca, jatun mandajpaj tucuilla churicunata shamupaichi nirca.

24Absalón runaca, jatun mandajpajman shamushpami cashna nirca:

—Ricui, canda servij ñucami, cunanga ñuca llamacunata rutuchijuni. Chaimanda can jatun mandajpash, can churashca mandajcunapash, canda servijcunandi, ñucapajman shamupaichi nipanimi— nirca.

25Shina nijpimi jatun mandajca, Absalondaca cashna nirca:

—Ñuca huahualla, na tucuilla ri ushapashunllu. Tucuilla rijpica, ashtacatami tucuchipangui— nircami.

Ripashunllayari nishpa cutin cutin nijujpipash, na ringapaj munarcachu. Ashtahuangarin bendiciashpami cacharca.

26Chaimandami Absalón runaca, cashna nirca:

—Can na ri ushashpapash, ñuca huauqui Amnondaca richun saquipairi— nijpimi, jatun mandajca:

—¿Imapajta canhuanga ringayari?— nirca.

27Shina nijpipash Absalón runaca, richun saquipailla nijujpillatami, Amnón runatapash, pai jatun mandajpaj tucuilla churicunatapash richun saquirca.

28Absalón runaca, paita servijcunatami, cashna nishpa mandashca carca: “Amnón runataca, vinota ufiashpa paipaj shungupi cushijushpa tiajujta ricuriapanguichi. Shina tiajujpi Amnonda chugrichishpa huañuchichi nijpica, ama manllashpa huañuchinguichilla. Ñucami mandani, shinlli tucushpa, imatapash na manllanachu canguichi” nircami.

29Absalón runata servijcunaca, Absalón mandashcashnallatami Amnón runataca huañuchirca. Shinamandami, jatun mandajpaj tucuilla churicuna jatarishpaca, tucuicuna paicunapaj mulapi tiarishpa pacajushpa calpanajurca.

30Paicuna ñanda rinajujpillatami, chai llaquicunata cashna ninajuj, Davidpajman uyarirca: “Absalón runaca, jatun mandajpaj churicunataca tucuillatami huañuchishca, shujllapash na puchushcachu” nishcami uyarirca.

31Chaita uyashpami Davidca jatarishpa, pai churajushcata liquishpa, alpapi siririrca. Shinallata paita servijcunapash, tucuicunami paicuna churajushcata liquinajurca.

32Shinamandami Davidpaj huauqui Simea shuti runapaj churi Jonadab runaca, cashna nijurca:

—Ñuca amolla, can jatun mandajpaj chairalla viñai churicunataca, ama tucuillatami huañuchishcanga yajupaichu. Amnón runatallami huañuchishcanga. Absalón runaca, paipaj pani Tamarta munai, na munai nalita rurashca punllamandami Amnón runataca, huañuchishapacha yashpa purijurca.

33Shina cashcamanda cunanga ñuca amo, can jatun mandajca: ‘Can jatun mandajpaj tucuilla churicunami huañushca’ nishpa parlanajushcataca, cambaj shungupica ama cripaichu. Amnón runatallami huañuchishcanga— nircami.

34Chai jipami Absalón runaca, pacajushpa rirca. Shinallata chapashpa shayajuj, chairalla viñai runapash vichai ricushpami, paipaj huashataca tauca gentecuna, loma ladomanda ñanda shamunajujta ricurca.

35Chaita ricushpami Jonadab runaca, jatun mandajtaca cashna nirca:

—Ricui, canda servij ñuca nishcashnallatami, jatun mandajpaj churicunaca, chaita shamunajun— nircami.

36Pai chashna villajhuanmi, jatun mandajpaj churicuna ñapash chayamushpaca, ninandapacha caparishpa huacanajurca. Shinallata jatun mandajpash, paita servijcunapashmi ninandapacha llaquirishpa huacanajurca.

37Ashtahuangarin Absalón runaca, Amiud shuti runapaj churi, Gesur shuti pueblota jatun mandaj Talmai shuti runapajmanmi pacajushpa rirca. Davidca, punllandimi paipaj churimandaca huacajurca.

38Absalón runaca, Gesur shuti puebloman pacajushpa rishpaca, quimsa huatatami chaipi causajurca.

39Amnón shuti huañushcamanda ña cungashpami, jatun mandaj Davidca, Absalón runata ninanda ricungapaj munashpa causajurca.