Psalms 18 - Quichua Imbabura Bible

Macanajuipi mishashpa, pashi nishpa candashcami(2 Sam. 22:1-51)Candajcunata mandaj candachijuchun, Mandaj Diosta servij David rurashca Salmomi. Paita tucui fiñajcunapaj maquimandapash, Saulpaj maquimandapash, Mandaj Dios cacharichijui punllami, Mandaj Diosman cai shimicunata candashpa, cashna nijurca:

1Ñuca shinlli torreshna Mandaj

Dioslla, candaca juyanimari.

2Mandaj Diosca, ñucapaca jatun Rumishnami.

Shinlli jatun huasishna ñucata pacaj,

ñucata cacharichijmi.

Ñuca shinlli torreshna ñuca Taita Dioslla.

Paitami yariajusha.

Ñuca jarcarina escudomi.

Ninan ushaita charij, ñucata quishpichijmi,

jahua jahuapi ñuca pacajunami.

3Mandaj Diostami mañasha.

Paimi, alicachi tucunatapacha charin.

Paita mañashpami, ñucata

fiñajcunamandaca quishpirisha.

4Huañuica, huatashpami muyundi pillushpa charihuarca.

Jatun nalicunapash, ninanda jatarij

huaicu yacushnami ninanda manllachihuarca.

5Seolca huatashpami, muyundi pillushpa charihuarca.

Huañuchij lazutami churahuarca.

6Chashna ninan llaquihuan cashpami,

Mandaj Diostaca mañarcani.

Ñuca Taita Diostami caparircani.

Paimi, ñuca mañajujtaca, paipaj

huasimandapacha uyahuarca.

Ñuca caparishcapash, paipaj ñaupajman

chayashpami, paipaj rinriman uyarirca.

7Cai pachaca, ninanda cuyuchijpimi chujchurca.

Urcucunata charijuj callari rumicunapashmi cuyurirca.

Dios fiñarijpimi, chashna chujchunajurca.

8Paipaj singamandaca, cushni llujshishpami vichai rijurca.

Paipaj shimimandaca, tucuchij ninami llujshijurca.

Carbongunapash, pai japichijpimi japirirca.

9Jahua pachata pascashpami, urai shamurca.

Paipaj chaqui ucupica, yana yana, sangu fuyumi carca.

10Paica, shuj querubín nishcapi

tiarishpami jahuata rirca.

Huaira alascunapaj jahuapimi rijurca.

11Paita pacachunga, yana yana tutatami,

paipaj cortinashna cachun, paipaj muyundipi churarca.

Jahua pachapica, tamianalla yana

yana fuyutami churarca.

12Pai punchapamba ricurijpimi,

paipaj fuyucunaca anchurirca.

Rundupash, rupajuj carbongunapashmi urmamurca.

13Mandaj Diosca, jahua pachapimi culun nichijurca.

Jahua pachapi causajuj Diosmi rimamurca.

Rundupash, rupajuj carbongunapashmi urmamurca.

14Paipaj flechacunata cachamushpami,

fiñajcunataca caita chaita cacharca.

Paipaj punchapambata shitamunacunata

cachamushpami, paicunataca tucuchirca.

15Shinamandami, mama cucha yana

yana utujupash ricurirca.

Cai pacha callari rumicunapashmi,

ricunalla quedarca.

Can Mandaj Dios shinllita rimashpa,

cambaj singa samaihuan fucujpimi,

chashna tucurca.

16Jahua pachamanda cachamushpami ñucataca,

ashtaca yacucunamanda japishpa llujchihuarca.

17Ñucataca, ninan ushaita charij ñucata

fiñajmandapash, ñucata millanayachij

runacunamandapashmi cacharichihuarca.

Paicuna ñucata ashtahuan yali shinllicuna

cajpipash, llujchircallami.

18Ninan llaquihuan purijui punllami,

ñucataca ashtahuan llaquichingapaj japihuarca.

Ashtahuangarin Mandaj Diosmi,

ñucataca shinllichihuarca.

19Jatun pambamanmi llujchihuarca,

ñucata alicachishpami cacharichihuarca.

20Mandaj Diosca, imatapash cashcatapacha

ñuca rurashcashnallatami, alita carahuarca.

Ñuca maquihuan ima mapatapash na

rurashcashnallatami, alita tigrachihuarca.

21Ñucaca, Mandaj Dios mandashcatami cazurcani.

Ñuca Taita Diosmanda ama anchuringapaca,

paita manllashpami causarcani.

22Tucui imatalla pai yachachishcacunami,

ñuca ñaupajpi carca.

Pactachinajuchun cushca paipaj Shimicunamandaca,

na anchurishcanichu.

23Paipaj ñaupajpica, aligutami causarcani.

Nalita ruranamandapash jarcarircanimi.

24Chaimandami Mandaj Diosca, imatapash

cashcatapacha ñuca rurashcashnallata, alita carahuarca.

Ñuca maquihuan paipaj ñaupajpi ima

mapata na rurashcashnallatami, alita carahuarca.

25Llaquij runahuanga, cambash llaquij

cajtami ricuchingui.

Ima nalitapash na ruraj runapaca,

cambash aligutami rurangui.

26Ima mapapash illaj runapaca,

cambash ima mapapash illaj cajtami ricuchingui.

Ashtahuangarin jatun nalita rurajtaca, ninandami llaquichingui.

27Canmi, llaquihuan causaj gentecunataca quishpichingui.

Ashtahuangarin jariyashcacunapaj

ñavitaca, urai cumuchinguimi.

28Canmi, ñuca lamparataca japichipangui.

Ñucata Mandaj Taita Diosmi,

ñuca yana yana tutatapash punchayachinga.

29Canhuanga, ashtaca soldadocunatapash mishashallami.

Ñuca Taita Dioshuanga, jatun pircacunatapash

urmachishpa yalishallami.

30Taita Diosta ricujpica, ima pandapash na tianllu.

Mandaj Dios rimashca shimicunaca,

culquita rupachishpa tucui mapata anchuchishcashnami.

Paita tucui shuyajcunapaca, jarcarina escudoshnami.

31Shina cashpaca, ¿pita Taita Dios?

Mandaj Diosllami tian.

Jatun Rumishna, ñucanchi Taita Diosmanda shujca, ¿pita tian?

32Taita Diosmi, chumbilichinshna ushaita cuhuan.

Paillatami, ñuca purina ñandaca aliguta alichijun.

33Paimi, ñuca chaquitaca,

tarugashna ucha calpajta ruran.

Urcu jahuacunapipash, paimi shinllita shayachihuan.

34Paimi, jatun macanajuipi

macanajuchumbash, ñuca maquita yachachin.

Bronce arcota ñuca rigrahuan chutanatapashmi yachachin.

35Shinallata quishpichij cambaj escudotapashmi cuhuarcangui.

Cambaj ali lado maquihuanmi charihuarcangui.

Cambaj juyaihuanmi, jatun canapi churahuarcangui.

36Ñuca purina ñandaca, rinallagutami rurarcangui.

Chaimandami ñuca chaquica, na llucharca.

37Ñucata fiñajcunata catishpa rishpaca japircanimi.

Paicunata tucuchingacaman na tigrarcanichu.

38Paicunataca, na jatari ushangacamanmi chugrichircani.

Ñuca chaqui ucucunapimi urmanajurca.

39Macanajuchunga, chumbilichinshnami ushaita cuhuarcangui.

Ñucata fiñajcunataca, ñuca ñaupajpimi urai cumuchircangui.

40Ñucata fiñajcunataca, tigrachishpami calpachircangui.

Ñucata na ricunayachij runacunata tucuchijuchunmi,

chashna rurarcangui.

41Caparinajujpipash paicunata quishpichijca, pipash na tiarcachu.

Mandaj Diostapashmi mañanajurca.

Ashtahuangarin paicunataca na uyarcachu.

42Paicunataca huairapi, ñutu alpata ñutunshnami tucuchircani.

Ñangunapi sirij turuta shitanshnami, llujchishpa cacharcani.

43Fiñashpa rimaj gentecunamandaca cacharichihuarcanguimi.

Llactacunapaj umashna cachunmi churahuarcangui.

Ñuca na rijsishca gentecunami, ñucata servinajurca.

44Ñuca rimajta uyashpallami cazunajurca.

Na rijsishca gentecunapaj churicunami,

ñucata cazushpa causanajurca.

45Na rijsishca gentecunaca, ushai illaj

tucushpami, paicuna pacajushca

ucucunamandaca, chujchushpa llujshinajurca.

46Mandaj Diosca causajupachunlla.

Jatun Rumishna ñuca Diosca, alicachi tucushca cachun.

Ñucata quishpichij Taita Diosca, jatunyachi tucushca cachun.

47Ñucata llaquichishcamandaca,

chashnallata llaquichij Taita Diosmi.

Gentecunataca, ñucata cazuchunmi ñuca chaqui ucupi churan.

48Paimi, ñucata fiñajcunamandaca cacharichihuan.

Ñucata llaquichingapaj jatarinajujpipash,

ashtahuan alipi churashpami jatunyachihuan.

Huañuchij runapaj maquimandapashmi cacharichihuarcangui.

49Mandaj Dioslla, shinamandami shuj

llactacunapipash, canmanda villajusha.

Cambaj shutitapashmi candajusha.

50Paipaj jatun mandajtaca,

jatun macanajuicunatami mishachin.

Aceitehuan javi tucushca, paipaj

jatun mandajtaca ninandami llaquin.

Davidtapash, paipaj miraicunatapash,

causaita causaicamanmi chashnallata charin.