DANIEL 8 - Quichua Imbabura Bible

Jari llamatapash, jari chivotapashmi muscuipishna ricushca

1Babilonia llactata jatun mandaj Belsasar shuti runaca, ñami quimsa huatata mandajurca. Chai huatapimi, punda ricurishcashnallata, Daniel ñucaman muscuipishna ricurirca.

2Ñucaca, Elam llactapi tiaj Susa shuti pueblopimi carcani. Chai puebloca, tucui llactata mandana jatun pueblomi. Chai ladopi tiaj Ulai shuti jatun yacu manñapi cashpami, muscuipishna ricurcani.

3Ñuca ñavita alsashpa vichai ricujpica, ishcai cachuyu shuj jari llamami, chai yacu manñapi ñapash ricurirca. Chai jari llamapaj cachucunaca, ishcandi jatun cashpapash, shujca ashtahuan jatunmi carca. Chai ashtahuan jatun cachuca, jipallami viñarca.

4Chai jari llamaca, indi huashajuj ladoman, jahua ladoman, ura ladoman causajcunataca, paipaj cachucunahuan tupashpami chugrichijurca. Paipaj ñaupajpica, ima animalpash na chimbapura shayari usharcachu. Paipaj ñaupajmandaca, pipash na pacajui usharcachu. Chai jari llamaca, pai munashcata rurashpami, ashtahuan ashtahuan jatun tucurca.

5Chaita ricushpa ñuca yarijujpillatami, shuj jari chivoca, alpapi na sarushpa, indi huashajuj ladomanda ninanda shamujujta ñapash ricurcani. Chai jari chivoca, paipaj ishcandi ñavipaj chaupi frentepimi, shuj jatun cachuta charirca.

6Chai chivoca, jatun yacu manñapi shayajujta ñuca ricushca, ishcai cachuyu jari llamapajmanmi, ninandapacha fiñarishpa jatun ushaihuan tucuchingapaj calparca.

7Jari llamapaj ladoman ña chayashpaca, vichai shayarishpa tupashpami, chai jari llamapaj ishcandi cachucunata faquijta ricurcani. Shinamandami chai jari llamaca, chai jari chivopaj ñaupajpi chimbapura shayarishpa macanajungapaca, na ushaita charirca. Chaimandami, alpapi urmachishpa sarujurca. Chashna llaquichi tucujujpipash, chai jari llamata chai jari chivo llaquichijujmanda mitsangapaca, pipash na tiarcachu.

8Chaimandami chai jari chivoca, ashtahuan ashtahuan shinlli tucurca. Ashtahuangarin ninan ushaita charishpa, tucuita mishajujpimi, paipaj jatun cachuca faquirirca. Chai cachupaj randica, cai pacha chuscundi ladomanmi chuscu jatun cachucuna viñarca.

9Chai chuscu cachucunamanda shuj cachupimi, shuj uchilla cachu viñarca. Chai cachuca urai ladomambash, indi llujshimuj ladomambash, Diospajlla juyailla llacta ladomambashmi viñarca.

10Shinallata jahua pachapi imalla tiajcunapajman chayajtami, jatun tucurca. Chaipi imalla tiajcunatapash, luzerocunatapash, huaquingunataca alpaman urmachishpami sarujurca.

11Chai jipaca, jahua pachapi chai imalla tiajcunata Mandajtapashmi, jatun tucushpa jariyarca. Paimi, Diosman animalcunata punllandi cushpa huañuchinatapash anchuchirca. Diospajlla huasitapashmi, tucuillata alpaman urmachirca.

12Gentecuna, yachashca jahua Diosta na cazushcamandami, jahua pachapi imalla tiajcunatapash, Diosman animalcunata punllandi cushpa huañuchinatapash, paipaj maquipi churarca. Chaimandami na llullaj shimitaca, tucuillata chingachirca. Shinallata pai munashcata rurashpami, tucui imapipash ali llujshirca.

13Shina rurajpimi, jucha illaj puramanda shuj rimajujta uyarcani. Chai jucha illaj puramandallata shujca, chai rimajujtami cashna nishpa tapurca: “Diosman animalta cushpa punllandi huañuchinata, muscuipishna ricujunapash, ¿ima punllacamanshi canga? Diospaj huasitapash, jahua pachapi imalla tiajcunatapash, chai mandajpaj maquipi churashpa saruchishpa, yachashca jahua na cazushcatapash muscuipishna ricujunaca, ¿ima punllacamanshi canga?” nishpami tapurca.

14Shina tapujpimi, cashna nirca: “Ishcai huaranga quimsa patsaj chishicunata, tutamandacunatami chashna canga. Chai jipami, Diospaj huasica mapa illaj canga” nircami.

15Daniel ñucaca, tucui chaicunata muscuipishna ricujushpa, aliguta yarishpa chaicunaca ima cajta yachangapaj munajujpimi, cashna tucurca: Chaipica, ñuca ñaupajpimi, shuj runashnalla ñapash shayarirca.

16Chai jipaca, Ulai shuti jatun yacu manñamandami, shuj runa cashna nishpa caparijta uyarcani: “Gabriel, muscuipishna ricushcata entendichi” nijtami uyarcani.

17Shina nishca jipaca, ñuca shayajuj ladomanmi shamurca. Pai shamujpica manllarishpami, cungurishpa urai cumurircani. Ashtahuangarin paica, cashnami nihuarca: “Huañuna aichayu runa, aliguta ricungui. Muscuipishna can ricushcacunaca, tucurimui punllacunapajmi” nihuarcami.

18Ñucata pai chashna nijujpica, ñapash puñushpami, alpapi uraisinga urmarcani. Shina urmajpica, paipaj maquihuan tacarishpami, jatarichishpa shayachihuarca.

19Chai jipami, cashna nihuarca:

“Ricui, tucurimui punllacunapi Dios fiñarishpa llaquichinatami villagrini. Can ricushcapash, tucurimui punllacunapajmi.

20Ishcai cachuta charij, chai jari llamata can ricushcamandaca, Media shuti, Persia shuti llactacunamanda, jatun mandajcunatami ricuchijun.

21Jari chivoca, Grecia shuti llactata jatun mandajtami ricuchijun. Chai chivopaj ishcandi ñavipaj chaupi frentepi tiajushca jatun cachuca, chai llactapi punda tiana jatun mandajtami ricuchijun.

22Shinallata chai cachuta faquijpi, chaipaj randi chuscu cachucuna viñashcapash, chai jatun mandajpaj jipa chai llactamandallata, chuscu jatun mandajcuna llujshinatami ricuchijun. Chai jatun mandajcunaca, punda jatun mandaj runashna ninan ushaitaca na charingachu.

23Chai chuscu jatun mandajcunapaj mandana tucurijpica, Diosta na cazujcunami ninan nalita ruranajunga. Chai punllacunapica, ninanda jariyashca, na yachai ushanallacunatapash entendij jatun mandajmi jataringa.

24Paipaj ushaica, ashtahuanmi shinlli tucunga. Ashtahuangarin na paipaj ushaihuanlla, chashna shinlli cangachu. Imatapash manllanayai jatun llaquicunata rurashpapash, ali llujshingallami. Pai munashcata rurashpami, ninan shinllicunatapash, Diospajlla causajcunatapash, huañuchishpa tucuchinga.

25Ali yachajushca cashcamandaca, pitapash ñapash umachingallami. Paipaj shungupipash jatun tucushpami, upallamanda ashtacacunata huañuchinga. Mandajcunata Mandajhuambashmi, macanajungapaj jataringa. Shina cashpapash paica, maijan runapaj maquipi na huañushpapash, huañuchi tucungallatami.

26Chishicunapi, tutamandacunapi ima tucujta muscuipishna can ricushcapash, chashnapachami tucunga. Muscuipishna can ricushcataca alichilla. Chaicunaca, tauca huatacunapimi pactanga” nihuarcami.

27Chai jipaca, Daniel ñucaca, ñutui tucushcashnami carcani. Chaimandami, tauca punllacunata huañujurcani. Ña ali tucushpami, jatun mandajpaj imata ruranacunataca rurashpa catircani. Shinapash muscuipishna ñuca ricushcamandaca, manllarishcami carcani. Chaicunaca, ima cajtapash na yacharcanichu.