ROMANOS 10 - Quichua Imbabura Bible

1Huauquicuna, panicuna, Taita Dios israelcunatapash quishpichijuchun munashpami, tucui shunguhuambacha mañariajuni.

2Taita Diospajtaca ninandapacha pactachingapaj munanajushpapash, paicunaca imashna aliguta pactachinataca, na yachanllu. Shina cajpimi, ñucapash chashnapachami nishpa villajuni.

3Ashtahuangarin imatapash cashcatapacha rurashcatashna Taita Dios chasquijujta na yachashpami, paicunapaj munailla imatapash cashcatapacha rurangapaj munan. Shina cashpami, imatapash cashcatapacha rurashcatashna Taita Dios chasquichunga na munashca.

4Cristomi, mandashca shimicunataca pactachishpa tucuchirca. Paita crijcunataca, imatapash cashcatapacha rurashcatashna chasquingapajmi, chashna rurarca.

5Mandashca shimita pactachijpi imatapash cashcatapacha rurachun Dios chasquinamandaca, Moisesca cashnami escribishca: “Cai mandashcata pactachijllami, pactachishcamanda causajunga” nishcami.

6Ashtahuangarin crijpilla imatapash cashcatapacha rurashcatashna Dios chasquinamandaca, cashnami nijun: “Cambaj shungupica, ama: ‘¿Pita jahua pachaman ringayari?’ ninguichu” nijunmi. (Shina nishpaca, Cristota jahuamanda urai apamunshnami nijungui).

7Na cashpaca: ‘¿Maijanda manllanayai ucu ucu utujuman uriajunga?’ nitapash ama ninguichu” nijunmi. (Shina nishpaca, huañushcacunapaj chaupimanda Cristota jahuaman llujchimunshnami nijungui).

8Ashtahuangarin Diospaj Shimipica, ¿ima nijunda? Cashnami nijun: “Diospaj Shimica, cambaj ladopi cashpami, cambaj shimipipash cambaj shungupipash tiajun” nijunmi. Cai shimicunata crinamandami villanajunchi.

9“Jesusca, ñucata Mandajmi” nishpa, cambaj shimihuan villashpa, shinallata huañushcacunapaj chaupimandaca, Taita Dios paita causachishcata, tucui shunguhuan crishpaca quishpiringuimi.

10Shunguhuanga, imatapash cashcatapacha rurashcatashna Dios chasquijujtami crina. Ashtahuangarin shimihuanga, quishpiringapajmi villana.

11Dios escribichishca Shimipica, cashnami nijun: “Pipash paita crishpaca, na pingai tucungachu” nijunmi.

12Judea llacta gentecunahuan, griego nishca gentecunahuanga chashnallatami. Apunchi Jesusca, tucuicunata mandaj cashpami, pai ninan charij cashcamanda, paita tucui mañajcunaman caramujun.

13“Shina cashcamandami, maijan cashpapash Jatun Diospaj shutipi mañashpaca quishpiringa”.

14Ashtahuangarin paita na crij cashpaca, ¿imashnata mañangayari? Shinallata paimanda villajta na uyaj cashpaca, ¿imashnata cringayari? Pipash paimanda na villajpica, ¿imashnata uyangayari?

15Pitapash villachun na cachajpica, ¿imashnata villangayari? Escribishcapica cashnami nijun: “¡Casilla ali causaiguta villashpa purijcunapash, ali villaita villashpa purijcunapash juyaillamari villanajun!” nijunmi.

16Ashtahuangarin ali villaita villajujpica, na tucuicuna cazurcachu. Shinamandami, Isaiasca cashna nijun: “Jatun Dioslla, ñucanchi villajujtaca, ¿maijanda crirca?” nijunmi.

17Shina cashcamandami, Diospaj Shimita villajujta uyanajun. Villajujta uyashpallami crinajun.

18Shina cajpipash, cashnami nini: Villajujtaca, ¿nachu uyashcanga? Ari uyashcami. Villashcapica cashnami nijun:

“Paicuna villajuj shimica, tucui llactacunapimi uyarijun.

Paicuna villajuj shimicunaca, cai pacha tucuri

manñacamanmi uyarijun” nijunmi.

19Caitapashmi nini: Israelcunaca, ¿chaitaca nachu yachashcanga? Moisesmi, pundata cashna nishca:

“Na ñucapajlla causajcunata agllashpami,

cangunataca cambajmi canchi nichisha.

Imatapash na yachajcunatara agllashpami,

cangunataca fiñachisha” nishcami.

20Isaiaspash, na manllashpami cashna nishca:

“Ñucata na mascashpa purijcunahuanrami tuparircani.

Ñucata na tapujcunamanmi ricurircani” nishcami.

21Ashtahuangarin israelcunamandaca, cashnami nin: “Ñucata na cazushpa fiñachij gentecunataca, punllandimi maquita chutashpa cayajurcani” nijunmi.