1¿Imashpata gentecunaca ninanda caparinajun?
Shuj llactapi causajcunapash,
¿imashpata yangacunata yarinajun?
2Cai pachapi tiaj jatun mandajcunaca jataringami.
Cati mandajcunapash tandanajushpami,
Mandaj Diostapash, aceiteta talishpa javi tucushca jatun
mandajtapash fiñashpa, cashna nishpa parlarinajunga:
3“Pai huatashcacunataca fitishunchi.
Ñucanchita huatashpa charijuj cabiacunata
fitishpa shitashunchi” ninajungami.
4Jahua pachapi causajuj Diosca asingami.
Jatun Diosca, paicunataca asishpami ricunga.
5Chai jipaca, ninandapacha fiñarishpami,
paicunataca rimanga.
Pai chashna fiñarishpami, muspachishpa pandachinga.
6“Ashtahuangarin ñucaca, ñucapajlla shicanyachishca
Sion urcu jahuapimi, ñucapaj jatun
mandajta churarcani” nijurcami.
7Ñucaca, imata rurachun mandashcataca villashami.
Mandaj Diosca, cashnami nihuarca:
“Canga, ñuca churimi cangui.
Ñucami, causaita cunan canman curcani.
8Mañahuailla, llactacunatapash
cambaj cachun cushallami.
Cai pacha callari manñacunapi tiaj
llactacunatapash, cambajlla cachun cushallami.
9Paicunataca, jirru varahuanmi llaquichingui.
Mangata ruraj runapaj alpa mangatashnami
ñutungui” nihuarcami.
10Jatun mandajcunalla, cunanga
aligutapacha yarishpa causaichi.
Cai pachapi tiaj juezcuna,
shinllita tacurishcata cazuichi.
11Mandaj Diostaca, manllaihuan servishpa causaichi.
Cushijuitapash chujchushpa cushijuichi.
12Pai fiñarijpi ñambi ama huañungapaca,
paipaj Churitami alicachina canguichi.
Paica, nina japirinshna ñapash fiñarinllami.
Paita yariashpa causajcunaca,
tucuicunami ninanda cushijun.
Who We AreWhat We EelieveWhat We Do
2025 by iamachristian.org,Inc All rights reserved.
