NÚMEROS 5 - Quichua Imbabura Bible

Mapayashcacunataca, tucuicunatami carpacunamanda llujchishpa cachashca

1Mandaj Diosca, Moisesmanmi cashna nishpa villajurca:

2“Israelcunataca, cashna nishpa mandai: ‘Lepra ung:uihuan huañujujcunata, yuraj yacu shamujujpi ungushcacunata, huañushcapi tacarishpa mapayashcacunatapash, carpacunamanda llujchishpa cachaichi.

3Chashnacunataca, jaricuna cachun, huarmicuna cachumbash, carpacunamanda llujchishpa cachaichi. Ñuca causajuj cangunapaj carpa chaupicunapi paicuna ama mapayachinajuchunmi, chashna llujchina canguichi’ nishpa mandai” nijurcami.

4Shina mandashcashnallatami israelcunaca, carpacunamanda llujchishpa cachanajurca. Mandaj Dios imashna Moisesta mandashcashnallatami, israelcunaca ruranajurca.

Imata llaquichishpapash tigrachijuchun mandashcami

5Cashnatapashmi Mandaj Diosca, Moisesman cashna nishpa villajurca:

6“Israelcunataca, cashna ni: ‘Jari cashpa, huarmi cashpapash yachashpata, Mandaj Diosta na cazushpa, shuj runacuna tucui ima juchacunata rurashcamanda maijan juchatapash rurashpaca, jatun juchatami ruran.

7Chashna juchata rurashca cashpaca, llaquirishpami chai juchataca, Diosman villanga. Pitapash llaquichishca cashpaca, llaquichi tucuj chai runamanllatami tucuillata tigrachinga. Shina tigrachishpapash, maijan llaquichi tucushca runamanga, pichata ashtahuan mirachishpami tigrachinga.

8Llaquichi tucushcapaj familia na tiajpica, chai nalita rurashcamanda paiman cunataca, Mandaj Diosmanmi cunga. Chaitaca curami japinga. Paipaj juchata anchuchijuchun, juchamanda jari llamata Diosman cushca jahuami, chashna cunga.

9Israelcuna imatalla charishcacunata Diosman shicanyachishpa carashcacunatapash, curapajmanmi apamunajunga. Chai apamushcacunaca, curapajllatami canga.

10Imata cashpapash, Diospajlla shicanyachishcata curapajman apamushcacunaca, chai curapajllatami canga’ ni” nijurcami.

Huarmita cusa shuj jariman juchachijpi, imashna ruranata mandashcami

11Mandaj Diosca, Moisestaca cashnatapashmi nijurca:

12“Israelcunaman, cashna nishpa villangui: ‘Maijambaj huarmi cashpapash maitapash purishpa, paipaj cusata na cazungapashchari.

13Chashna purijpi, pipash chai huarmihuan chayaringapashchari. Paipaj huarmi pacalla mapayashcamamda, paipaj cusapash napashchari yachangachu. Chaita ricushpa villajpash, napash tiangachu. Chai huarmipash, nalita rurajushpa napash japi tucungachu.

14Shina mapayashca cajpi cusaca, paipaj huarmita fiñana yuyaita japingapashchari. Na cashpaca napash mapayashca cajpita, yangamanda fiñana yuyai japingapashchari.

15Shina cashpaca chai cusaca, paipaj huarmita curapajman apamuchun. Shinallata ñucaman cungapaj, ishcai kilo yali cebada jacutapash apamuchun. Huarmita fiñashpa Diosman cushca jacupica, aceitetapash, inciensotapash ama churachun. Chaitaca, juchata Dios yarichishpa ricuchijuchunmi cunga.

16Mandaj Diospaj ñaupajman chai huarmi shayarimuchunga, curami pushamunga.

17Chai jipaca, alpamanda rurashca jarrapi Diospajlla shicanyachishca yacuta cura japichun, shinallata Diospaj jatun carpamanda ñutu alpatapash japishpa, yacupi churachun.

18Chaimandaca curallata chai huarmitaca, Mandaj Diospaj ñaupajpi shayachimuchun. Chai jipaca, chai huarmipaj ajchatapash cacharichun. Shinallata juchachishcamanda Diosman cushca jacutaca, chai huarmipaj maquipi churachun. Chai jacuca, chai huarmipaj juchata Dios ricuchijujmi canga. Shinallata juchamanda llaquichij jayaj yacutaca, curallata paipaj maquipi charijuchun.

19Chai jipaca, curallatami chai huarmitaca juramentuchishpa, cashna ninga: Canhuan pipash na puñushca cajpi, cambaj cusamandapash na anchurishpa na mapayashca cashpaca, juchamanda llaquichij cai jayaj yacuta ufiashpapash, na llaquichi tucunami quedangui.

20Ashtahuangarin canllatami, cambaj cusa tiashca jahua, maitapash purishpa mapayashcangui. Shinallata maijan runapash, canhuan chayarishcami canga.

21Shina cajpica, (curallatami chai huarmitaca, ima llaquipash japishpaca alichari canman nishpa juramentuchishpa, cashna ninga): Mandaj Diosca, candaca cambaj llacta purapica, ima llaquipash japishpami ali canman ni tucunata, ninanda millanayachi tucunata rurachun. Mandaj Diosllata cambaj cinturastapash, cunguricaman chaquichishpa, vijsatapash punguichishpa saquichun.

22Juchamanda llaquichingapaj cai jayaj yacu cambaj vijsaman yaicushpaca, cambaj vijsata punguichishpa, cambaj cinturastapash, cunguricaman chaquichishca cachun ningami. Shina nijpica, chai huarmica: Shina cachun, shina cachun ningami.

23Chai juchamanda llaquichinacunataca, curami libropi escribinga. Chai escribishcataca, jayaj yacuhuanmi fichanga.

24Llaquichij jayaj yacutaca, chai huarmimanmi ufiachun cunga. Chai nalita rurashpa llaquichij yacuca, jayajyachishpa llaquichijungapajmi huarmipaj vijsaman yaicunga.

25Chai jipami, juchachishpa cushca jacutaca, chai huarmipaj maquimanda curallata japishpa, Mandaj Diospaj ñaupajpi vichai cuyuchishpa, altar ñaupajpi Diosman cunga.

26Shinallata curallatami, yarichij jacuta maqui jundata japishpa, altarpi rupachinga. Chai jipami, jayaj yacuta huarmi ufiachun cunga.

27Paipaj cusata na cazushpa, chai huarmi mapayashca cajpica, juchamanda llaquichij yacuta ufiajpimi, paipaj vijsata jayajyachishpa punguichinga, cinturastapash cunguricamanmi chaquichinga. Chashna tucushpami, chai huarmica paipaj llactapica, ninanda nalicachi tucujunga.

28Ashtahuangarin chai huarmica na mapayashca cashpa, mapa illajpacha cashpaca, imapash na tucushpa, huahuacunatapash charingallami.

29Maijan huarmipash, paipaj cusata na cazushpa, na paipaj cusahuan causashpa, shujhuan mapayashca cajpi imashna llaquichinata mandashca shimicunaca, caicunami.

30Shinallata cusaca, paipaj huarmita fiñana yuyai shamujpi fiñashpaca, paipaj huarmitaca Mandaj Diospaj ñaupajman apamuchun. Chaipica curami, cai mandashcapi nijunshnallata ruranga.

31Cusaca nalita rurashcamandaca, na llaquita apangachu, huarmillatami juchata rurashcamandaca, llaquita apanga’ nishpa rimai” nijurcami.