NEHEMÍAS 10 - Quichua Imbabura Bible

1Paicunapaj shutita churajcunaca, caicunami carca: Hacalías shuti runapaj churi mandaj Nehemías runapash, Sedequías shuti runapashmi carca.

2Shinallata Seraías, Azarías, Jeremías,

3Pasur, Amarías, Malquías,

4Hatus, Sebanías, Maluc,

5Harim, Meremot, Obadías,

6Daniel, Ginetón, Baruc,

7Mesulam, Abías, Mijamín,

8Maazías, Bilgai, Semaías shuti runacunapashmi carca. Tucuilla paicunaca, curacunami carca.

9Levita puramandaca, caicunami carca: Azanías shuti runapaj churi Jesúa shuti runapash, Henadad shuti runapaj mirai Binúi shuti runapash, Cadmiel shuti runapashmi carca.

10Paicunapaj huauqui puramandaca, caicunami carca: Sebanías, Hodías, Kelita, Pelaías, Hanán,

11Micaía, Rehob, Hasabías,

12Zacur, Serebías, Sebanías,

13Hodías, Bani, Bininu shuti runacunami carca.

14Gentecunata mandaj puramandaca, caicunami carca: Paros, Pahat-moab, Elam, Zatu, Bani,

15Buni, Azgad, Bebai,

16Adonías, Bigvai, Adín,

17Ater, Ezequías, Azur,

18Hodías, Hasum, Bezai,

19Harif, Anatot, Nabai,

20Magpías, Mesulam, Hezir,

21Mesezabeel, Sadoc, Jadúa,

22Pelatías, Hanán, Ananías,

23Oseas, Hananías, Hasub,

24Halohes, Pilha, Sobec,

25Rehum, Hasabna, Maasías,

26Ahías, Hanán, Anán,

27Maluc, Harim, Baana shuti mandajcunami carca.

28Huaquin gentecuna, curacuna, levitacuna, Diospaj huasi pungupi cuidajcuna, candajcuna, Diospaj huasipi servijcunapashmi tandanajurca. Taita Dios mandashcata pactachingapaj, shuj llactapi causanajuj gentecunamanda shicanyashpa, tucui shamujcunapash, paicunapaj huarmicunandi, alita na alitapash yachai ushanalla, ña juizulla churicunandi ushicunandimi tandanajurca.

29Taita Dios mandashcata pactachishpa causashunmi nishpa rimashpa juramentungapajmi, paicunapaj huauquicunandi, mandajcunandi tandanajurca. Chai mandashcataca, Taita Diosta servij Moisesmanmi cushca carca. Shinallata ñucanchita Mandaj Jatun Dios tucui mandashcacunata, imata rurachun mandashcacunata, pactachinajuchun cushca shimicunatapash cazushpa pactachishunmi ningapajmi tandanajurca.

30Ñucanchi ushicunataca, cai llacta ladollapi causajcunapaj churicunahuanga, na cazarachishunllu. Ñucanchi churicunatapash, paicunapaj ushicunahuanga na cazarachishunllu.

31Shinallata samana punllacunapi, shuj llacta gentecuna imata jatungapaj shamujpipash, granocunata jatungapaj shamujpipash, na randishunllu. Chai punllapash, Diospajlla shicanyachishca ashtahuan shuj punllacunapash, paicuna apamushcataca na randishunllu. Shinallata canchis huata tucujpica, alpacunatapash na tarpushpami samachishun. Tucui ima divicunatapash na cuhuai nishpa saquishunllami.

32Ñucanchica, cai mandashcata pactachingapajmi, ñucanchillata ari ninajurcanchi. Chai jahuapash ñucanchi Taita Diospaj huasita rurachunmi, chuscu gramotashna pezaj culquita huatapi huatapi cungapaj, tucuicuna ari ninajurcanchi.

33Chai culquica, Diosman cuna tandapaj, Diosman imagutapash punllandi cungapaj, Diosman animalta cushpa punllandi rupachingapajmi canga. Samana punllacunapi, luna llullu punllacunapi fiesta punllacunapi cungapajmi canga. Shinallata Diosman shicanyachishcacunata cungapajpash, israelcunapaj juchamanda cushpa animalta huañuchingapajpash, ñucanchi Taita Diospaj huasipi tucui ruranacunata rurachumbashmi canga ninajurcanchimi.

34Curacunapash, levitacunapash, tucui israelcunapashmi, ñucanchi Taita Diospaj huasiman huatapi huatapi ima hora yamdata carashpa apamuna cashcata yachangapaj, suerteta rurarcanchi. Chaitaca, mandashcapi nishcashnallatami, ñucanchi taitacunapaj huasi ucu puracuna imashna cashcashnallata, ima huatacunapi cajpipash, ñucanchita Mandaj Taita Diospaj altarpi rupachingapaj, yamdata apamuchun suerteta rurarcanchi.

35Ñucanchi pambacunapi punda fucushcacunatapash, tucui yuracunapi punda fucushcatapashmi, Mandaj Diospaj huasiman huatapi huatapi apamushun ninajurcanchi.

36Shinallata ñucanchi punda churicunatapash, punda huacharishca huagracunatapash, mandashcapi nishcashnallatami ñucanchi Taita Diospaj huasiman apamushun nircanchi. Punda huacharishca huarmi huagracunata, llamacunatapash, ñucanchi Taita Diospaj huasipi servij curacunamanmi apamushun nircanchi.

37Punda masashca tandata, shuj ima caranacunata, tucui yuracunapi punda fucushca granocunata, punda rurashca vinota, aceitetaca curacunamanmi, ñucanchi Taita Diospaj huasi ucucunaman apamushun ninajurcanchi. Ñucanchi pambapi fucushcacunataca, levitacunamambashmi, chungamanda shujguta apamushun nircanchi. Tucui pueblocunapi tiaj ñucanchi pambacunapi fucushca granocunataca, levitacunami chungamanda shujguta japina carca.

38Chungamanda shujguta levitacuna japinajujpica, Aaronbaj mirai shuj curami, levitacunata cumbanga. Chungamanda shujguta japishpaca, levitacunallatami cutin shuj chungamanda shujguta anchuchishpa, ñucanchi Taita Diospaj huasipi tiaj alichina ucuman alichingapaj apanga.

39Chai alichina ucumanmi israelcunandi, levitacunandi, Diosman carashca granocunata, vinota, aceiteta apana carca. Chaipillatami, Diospaj huasipi ima charishcacunatapash alichina carca. Chai huasipillatami, Diosta servij curacunapash, pungupi cuidajcunapash, candajcunapash causanajun. Chashna rurashpami, ñucanchi Taita Diospaj huasitaca, napacha saquishun ninajurcanchi.