NÚMEROS 18 - Quichua Imbabura Bible

Curacuna, levitacuna imahuan causanatami villajun

1Mandaj Diosca, Aarondami cashna nijurca: “Ñucapajlla huasipi ñucata na cazushpa juchata rurashcamandaca cambash, cambaj churicunapash, cambaj taitapaj huasi ucu purapashmi, llaquichi tucunguichi. Shinallata curacuna cashpata juchata rurashcamandaca cambash, cambaj churicunapashmi llaquichi tucunguichi.

2Cambaj taitapaj aillu, Leví aillu puramanda cambaj huauquicunatapash, cambaj ladoman canhuan tandanajuchun ningui. Paicunami candaca servinajunga. Cambash, cambaj churicunapashmi, imashna causanata ñuca yachachishcacuna tiajuj carpa ñaupajpi servinguichi.

3Ñuca huasipi tucui imatalla ruranataca, can mandashcashnallatami ruranajunga. Ashtahuangarin paicunapash, cangunapash ama huañungapaca, ñucapajlla cachun shicanyachishpa churashcacunamanmi, na quimirina canguichi. Altarmanllapash, na quimirinachu canguichi.

4Paicunapash canhuan tandanajushpami, ñucahuan tuparina jatun carpapi ruranataca ruranajunga. Ñucapajlla jatun carpapimi, tucuipi servinajunga. Pipash na rijsishcacuna cangunapajman quimiritaca na ushangachu.

5Ñucapajlla huasitapash, ñuca altartapash cuidanguichi. Shina ruranajujpimi, israelcunataca na ashtahuan fiñasha.

6Ricui, Mandaj Dios ñucami, cangunapaj huauqui levitacunataca, Israel puracunamanda japircani. Ñucallatami, ñuca jatun carpapi ñucata servishpa, ñucapajta rurachumbash curcani.

7Ashtahuangarin cambash, cambaj churicunapash curacuna cashcamandaca, altarpi tucui imatalla ruranacunatapash, telahuan jarcashca ucupipash ricuriashpami, ñucapajta rurana canguichi. Canguna cura cashpa servinatapash, ñucami curcani. Pipash na rijsishcacuna quimirishpaca, huañungapachami” nijurcami.

8Mandaj Diosca, Aarondaca cashnatapashmi nijurca: “Ricui, imaguta ñucaman carashcacunata cuidachumbash, canmanmi curcani. Israelcuna ñucaman carangapaj shicanyachishpa tucui carashcacunataca, aceiteta talishpa javi tucushca cura cajpimi, canman curcani. Cambaj churicunapash, paicunapaj tucui causaipi pactachinajuchun cushca shimicunami.

9Ñucamanlla shicanyachishpa carashcamanda na rupachishpa saquishcacunami, cambaj canga. Imagutapash ñucaman cungapaj tucui apamushcacunapash, imaguta carangapaj tucui apamushcacunapash, paicunapaj juchamanda cushcacunapash, paicuna nalita rurashcamanda ñucaman cushcacunapash cambajmi canga. Chaicunaca, cambajpash, cambaj churicunapajpash, ñucapajlla cachun ashtahuan shicanyachishcami canga.

10Chaicunataca, ñucapajlla huasipimi micuna cangui. Chaicunataca, tucuilla jaricunami micunajunga. Chaicunaca, cambajpash, ñucapajlla shicanyachishcami canga.

11Caicunapashmi cambaj canga: Vichai ricuchishpa imatalla ñucaman paicuna cushcacunapash, israelcuna tucui imatalla ñucaman vichai cuyuchishpa cushcacunapashmi cambajpash, canhuan causanajuj cambaj churicunapajpash, cambaj ushicunapajpash canga. Chaicunataca, mapa illaj causanajuj tucui cambaj huasi ucu puracunami micunga. Chaicunaca, tucui causaipi pactachinajuchun cushca shimicunami.

12Aceitemanda, llullu vinomanda punda llujshishcatapash, punda fucushca trigomandapash ashtahuan alita agllashpami, Mandaj Dios ñucaman cunajunga. Chaicunataca canmanmi cuni.

13Paicunapaj alpapi tucui ima punda fucushcata Mandaj Diosman apamushcacunaca, cambajmi canga. Chaicunataca, mapa illaj causanajuj tucui cambaj huasi ucu puracunami micunga.

14Israelcuna ñucaman carashapachami nishpa, tucuita shicanyachishcapash cambajmi canga.

15Causaita tucui charijcuna punda huacharishcataca, genteta cashpa, animalta cashpapash, ñucaman cungapaj tucui apamushcacunaca, cambajmi canga. Shina cajpipash punda ungushca churipaj randica, culquita cuchun mandangui. Shinallata punda huacharishca, na micunachu nishca animalpaj randipash, culquita cuchun mandangui.

16Chaicunata cacharichingapaca, huacharishca punllamanda shuj quillata charijpimi, can ricushpa imashna valichishcashnallata, picha chunga canchis gramota pezaj culquita cunga. Shuj siclo culquica, ñucapajlla huasipi pezashcashnallatami, ishcai chunga gera nishcata pezanga.

17Ashtahuangarin punda huacharishca animalcunataca, huarmi huagra cajpi, llama cajpi, chivo cajpipash, chaicunata cacharingapaj ama culquita japinguichu. Chaicunaca, ñucapajlla cachun cushcacunami. Chai animalcunapaj yahuartaca, altar jahuapi tsirapachingui. Chaicunapaj virataca, Mandaj Dios ñucapajman ali mishquillagu ashnajuchun, ñucaman cushpa rupachingui.

18Paicunapaj aichaca, cambajmi canga. Vichai cuyuchishpa ñucaman cushca pecho aichapash, ali lado rigra aichapash, cambajmi canga.

19Israelcuna Mandaj Dios ñucaman shicanyachishcata, vichai ricuchishpa carashcacunatapash, tucuitami canman cuni. Chaicunataca canmambash, canhuan causanajuj cambaj churicunamambash, ushicunamambashmi cuni. Chaicunaca, tucui causaipi pactachinajuchun cushca shimicunami. Chaicunaca, Mandaj Diospaj ñaupajpica cambajpash, cambaj miraicunapajpash, tucui causaipi Dioshuan ari nishcata ricuchij cachishnami canga” nijurcami.

20Mandaj Diosca, Aarondaca cashnatapashmi nijurca:

“Canga, israelcunapaj alpacunapica ima alpatapash, ima japinatapash na charinguichu. Ñucami, israelcunapaj chaupipica, can japinapash, can japina alpashnallapash cani.

21Ricui ñucaca, Leví shuti runapaj churicuna Israel llactapi paicuna japinataca, ñucapajta ruranajushcamandami, chungamanda shujguta ñucaman cushcataca tucuillata paicunaman cuni. Paicunami, ñucahuan tuparina jatun carpapica, ñucapajta rurashpa servinajun.

22Israelcunaca, ñucahuan tuparina jatun carpamambash na ashtahuan quimiringachu. Paicuna chaiman yaicushcamanda juchayu tucushpa ama huañungapajmi, na yaicunajunga.

23Ashtahuangarin ñucahuan tuparina jatun carpapica, levitacunami servinajunga. Paicuna nalita rurashpapash, paicunallatami llaquita apanajunga. Caicunaca, paicunapaj miraicunapash, tucui causaipi pactachinajuchun cushca shimicunami. Levitacunaca, Israel puracunapica ima alpatapash na charingachu.

24Levitacuna japina cashcataca, chungamanda shujguta ñucaman israelcuna apamushcacunatami curcani. Chaitami, Mandaj Dios ñucaman cunajunga. Chaimandami: ‘Israel puracunapica, ima alpatapash na japinga’ nircani” nijurcami.

25Mandaj Diosca, Moisestaca cashnami nijurca:

26“Levitacunaman, cashna nishpa villangui: ‘Israelcuna imatalla chungamanda shujguta apamushcacunataca cangunami japinguichi. Shinallata chai chungacunamanda shujguta apamushcatapash, cada chungamanda shujguta ñucaman cutin shicanyachinguichi. Chaicunatami, cangunapaj cachun, cangunaman curcani. Imatalla shicanyachishcataca, vichai cuyuchishpa ñucaman cunguichi.

27Chaicunami, cangunapaj chagramanda trigota cushcashnallata, uvasta cutana pushtumanda vinota cushcashnallata canga.

28Chashnami israelcuna tucui imatalla apamushcacunata japishpaca, Mandaj Dios ñucaman cangunapash chungamanda shujguta cuna canguichi. Chai apamushcacunamanda, Mandaj Dios ñucaman cushcataca, Aarón curaman cunguichi.

29Cangunaman tucui imatalla apamushcatami, imata cashpapash tucuillamanda Mandaj Dios ñucaman cuna canguichi. Chai apamushcacunamandaca, alitallami ñucaman cuna canguichi. Chaicunaca, ñucapajlla cachun shicanyachishcacunami canga’ ningui.

30Levitacunataca, cashnatapash ningui: ‘Chai apamushcacunamanda ashtahuan alitalla agllashpa cushcacunaca levitacunapaca, paicuna trillana pamamanda, uvasta cutana pushtumanda cushcashnallatami canga.

31Chaitaca, maijan pushtupi cashpapash cangunandi, cangunapaj familiacunandi micunguichilla. Chaicunatami, ñucahuan tuparina jatun carpapi servinajushcamandaca micunguichi.

32Chai apamushcacunamanda ashtahuan alitalla agllashpa, ñucamanra cushca cashpaca, na juchayu tucunguichichu. Ñucapajlla cachun shicanyachishpa, israelcuna ñucaman cushcacunatapash na mapayachishpaca, na huañunguichichu’ ningui” nijurcami.