1 CORINTIOS 3 - Quichua Imbabura Bible

Taita Diosta ayudajcunallami canchi

1Huauquicuna, panicuna, Diospaj Espirituta charijcunamanshnaca, na cangunaman villai usharcanichu. Ashtahuangarin Cristota crij cashpapash, nara yachajuj huahuacunashna, cangunapaj munaitara rurashpa causajcunamanshnami villarcani.

2Llullu huahuacuna na shinlli micunata micui ushajpi, lechetalla caranshnami cangunapash, nara shuj yachajunata yachajui ushajpi, yachajui ushanatalla yachachijurcani. Cunangamanmi, nara yachajui ushanguichi.

3Cangunaca, cunangamanmi cangunapaj munaitara rurashpa causanajunguichi. Shujcuna imata charijtapash munashpa, fiñanajushpa, shicanyarinajushpaca, ¿nachu na crijcunashnallata, cangunapaj munaitara rurashpa causanajunguichi?

4Shujcunaca: “Ñucaca, Pablota catijpachami cani” ninajunmi. Caishujcunaca: “Ñucaca, Apolos shuti runata catijmi cani” ninajunmi. Chashna ninajushpaca, ¿nachu cangunapaj munaitallata rurashpa causanajunguichi?

5Apolospash, Pablopash, ¿imata canchiyari? Ñucanchica servijcunallami canchi. Apunchi Jesús ñucanchiman ushaita carajpi, villajpimi crircanguichi.

6Ñucami, tarpunshna villajurcani. Apolosca, yacuta churanshnami yachachijurca. Ashtahuangarin Taita Diosmi, viñachinshna mirachijun.

7Shina cashpaca tarpujpash, yacuta churajpash imapash na canllu. Ashtahuangarin Taita Diosllami viñachijun.

8Tarpujpash, yacuta churajpash, chashnallatami canchi. Imata rurashcashnallata ricushpa Dios carajpi, ishcandillata japina cashpapash, chashnallatami canchi.

9Ñucanchica, Taita Diosta ayudajcunallami canchi. Cangunaca, Taita Dios tarpujuj alpashnami canguichi. Shinallata Taita Dios huasichijuj huasishnami canguichi.

10Taita Dios ninanda juyajpimi, huasichinata ali yachaj runa huasichinshna, cangunaman villai callarircani. Ñuca callarishca jahuapica, shujmi huasichinshna catijun. Shina cashpapash huasichinshna catingapaca, tucuicuna aliguta ricunarami.

11Huasita shayachingapaj callari rumita churashcashnaca, Jesucristollami. Chaipi shuj rumita churaitaca, pipash na ushanllu.

12Callaringapaj churashca cai rumi jahuapica, maijan cashpapash orohuan, culquihuan, juyailla rumicunahuan, caspihuan, jupahuan, fangacunahuan huasichingami.

13Tucuicuna imata rurashcapash ricuringami. Huasichij runa imashna rurashcataca, shamui punllapimi ninahuan rupachishpa ricuchijunga. Tucuicuna imatalla rurashca cajpipash, ninami ricuchinga.

14Callarishca jahuapi, huasichinshna maijan imata rurashcapash na rupajpica, imagutapash aligutami japinga.

15Ashtahuangarin maijan imata rurashcapash rupajpica, imatapash na japingachu. Shina cashpapash, paillami rupajuj nina ucumanda llujshinshna quishpiringa.

16Cangunaca, Taita Diospaj huasishnami canguichi. Chaitaca, ¿nachu yachanguichi? Taita Diospaj Espíritu cangunapi causajujtapash, ¿nachu yachanguichi?

17Taita Dios causajuj huasita maijambash tucuchijpica, Taita Diosmi paitapash tucuchinga. Taita Dios causajuj huasica, Diospajllami. Chai huasica, cangunallatami canguichi.

18Cangunallata, na pandarinachu canguichi. Cai pachapajtaca aligutapacha yachanimi nishpapash, alipacha yachajushcacuna cangapaca, imatapash na yachanshnami tucuna canguichi.

19Imata cai pachapajta alipacha yachajushcapash, Taita Diospaj ñaupajpica, juizu illajcunashnami ricurin. Escribishcapica cashnami nijun: “Diosca, alipacha yachajushcacunataca, paicuna umachita ali yachashcapillatami japishpa muspayachijun” nijunmi.

20Cutinmi cashnatapash nijun: “Jatun Diosca, alipacha yachajushcacunapaj yuyaicunaca, yanga yanga cajtami yachan” nijunmi.

21Chaimandami runacunahuanga, na jariyana canguichi. Ima tiashcapash, tucuillami cangunapaj.

22Pablo, Apolos, Cefas shuti runacunapash, cai pachapash, causaipash, huañuipash, cunan punllacunapash, shamui punllacunapash, tucuimi cangunapaj.

23Cangunaca, Cristopajmi canguichi. Cristoca, Taita Diospajmi.