ÉXODO 23 - Quichua Imbabura Bible

1Napash shina cashcataca, ama shujcunaman villanguichu. Ama ñucata na manllaj runahuan tandanajushpa, pitapash llullashpa villanguichu.

2Ashtacacunahuan nalita rurangapaca, ama catinguichu. Juezcunaman villajushpaca, ama shujcunata manllaimandalla, cambash llullashpa llaquipi churanguichu.

3Imagutapash na charij runagu paipaj llaquita alichijuchun shamujpica, ama ñavita ricushpalla llaquichinguichu.

4Canda fiñaj runapaj huagrata tarishpa, na cashpaca burro chingashcata tarishpaca, tigrachingapaj apangui.

5Canda millanayachij runapaj burro, quipihuan llapi tucushca sirijujta ricushpaca, ¿na ayudashpa saquinguimanllu? Ashtahuangarin ayudashpa jatarichinami cangui.

6Cambaj llacta purallata mañashpa purij runagu llaquita charijpipash, pai japina cashcataca na shujman tigrachinachu cangui.

7Llulla shimimandaca, anchurinami cangui. Ima nalitapash na rurajta, imatapash cashcatapacha rurajtaca, na huañuchinachu cangui. Ñucata na manllaj runataca, ñucaca ima nalitapash na ruraj runatashnaca na ricushachu.

8Imatapash carajpica, na japinallachu cangui. Chai carashcacunaca, ñavita ñausayachinshna saquinllami. Imatapash cashcatapacha ruraj runagutapash, alita ruranataca shujman tigrachishpa rimanllami.

9Shuj llactamanda runagutaca, na ninanda llaquichinachu cangui. Shuj llactamanda shamushpa causajcunapaj shungupi imashna yarijtaca cangunallata yachanguichimi. Egipto llactapica, cangunapash shuj llactamanda rishcami causarcanguichi.

10Cambaj alpapica, sucta huatacaman tarpushpa, grano fucushcata cozechangui.

11Ashtahuangarin canchis huatapica, imagutapash na charij cambaj llacta puracunallata micuchun yanga saquingui. Chai puchushcataca, urcu animalcunami micunga. Chashnallatami cambaj uvas chagrahuambash, olivos chagrahuambash rurana cangui.

12Sucta punllata trabajangui. Canchis punllapica samangui. Cambaj huagrapash, burropash samachunmi chashna samana cangui. Shinallata canda servij huarmipaj churipash, shuj llactamanda shamushpa causajuj runapash, ushaita cutin japichunmi chashna samana cangui.

13Cangunaman ñuca tucui ima nishcata pactachinguichi. Shuj dioscunapaj shutitaca, na parlanachu canguichi. Cangunapaj shimimandaca, chashna parloca uyaritapash ama uyarichun.

Huatapi quimsa jatun fiestata rurachunmi mandashca(Éx. 34:18-26; Deut. 16:1-17)

14Huatapica, quimsacaman ñucaman jatun fiestata ruranguichi.

15Levadura illaj tandata micui punllatapash pactachingui. Levadura illaj tandataca, Abib shuti quillapi canchis punllacaman, ñuca imashna canman mandashcashnallata micungui. Chai quillapimi, Egiptomandaca llujshimurcangui. Shina cashcamanda ñuca ñaupajpica, pipash na chushaj maquihuan ricurimungachu.

16Shinallata pambapi can tarpushcamanda punda fucushca granocunata cozechana fiesta punllatapash rurangui. Huata tucuripipash, pambapi can tarpushca granocunata tandachijushpapash, fiestata rurangui.

17Tucuilla jaricunami, Mandaj Jatun Diospaj ñaupajman, huatapi quimsacaman shamunga.

18Ñucaman cushpa huañuchishca animalpaj yahuartaca, levadurahuan rurashca tandahuanga, na caranachu cangui. Shinallata ñucaman carashpa huañuchishca animalpaj virapash, cayapaca na puchungachu.

19Cambaj alpapi punda fucushca granocunataca, canda Mandaj Taita Diospaj huasimanra punda apamungui. Huahua chivo aichagutaca, ama paipaj mamapaj lechepillata yanunguichu.

Israelcunata pushachunga Mandaj Diosca, paipaj Angeltami cachashca

20Ricui, ñucami cangunata ñaupashpa ñambi cuidashpa pushamuchun, ñuca Angelta cachamuni. Paimi cangunataca, tucui ñambi cuidashpa, ñuca alichishca llactaman pushamunga.

21Paipaj ñaupajpi ali cazushpa, pai ima nijtapash uyanguichi. Paita na cazujcunaca, na canachu canguichi. Canguna na cazushcataca, paica na cungangachu, ñuca shutica paihuanmi.

22Ashtahuangarin pai ima nishcatapacha uyashpa, ñuca tucui ima nishcata rurajpica, cangunata fiñajcunataca ñucapashmi fiñasha. Shinallata cangunata ninanda llaquichijcunataca, ninandami llaquichisha.

23Ñuca Angelca, canda ñaupashpa rishpami amorreo, heteo, ferezeo, cananeo, heveo, jebuseo nishca gentecunapaj llactaman pushanga. Paicunata tucuchijuchunmi mandasha.

24Paicunapaj dioscunataca, na cungurinachu cangui. Servitapash, na servinachu cangui. Paicuna nalicunata ruranajunshnapash, na ruranachu cangui. Ashtahuangarin tucuillatami tucuchina cangui. Paicunapaj dioscunataca, tucuillatami faquina cangui.

25Ashtahuangarin cangunata Mandaj Taita Dios ñucatalla servinguichi. Ñucami, cangunapaj tandatapash, yacutapash bendiciasha. Ñucami, cangunapaj chaupimanda tucui ung:uita anchuchisha.

26Huahuata vijsayu cashpa urmachij huarmipash, huahuata tarinata na yachaj huarmipash, cangunapaj llactapica na tiangachu. Ñucami, mashna punllacunacaman can causana punllacunataca pactachisha.

27Ñucami, jatun manllaita canda ñaupachishpa cachasha. Shina cachashpami, can maiman yaicujpipash chaipi causaj tucui gentecunata tucuchisha. Canda tucui fiñajcunataca, tigrashpa calpachunmi saquisha.

28Heveo, cananeo, heteo nishca gentecunata cambaj ñaupajmanda llujchishpa cachachunmi, millai balun chuspicunata canda ñaupachishpa cachasha.

29Paicunataca, na shuj huatapilla cambaj ñaupajmanda llujchishpa cachashachu. Jichushca pamballa tucujpi, urcu animalcuna jundashpa cangunata ama llaquichinajuchunmi, na chashna rurasha.

30Cambaj huahuacuna mirashpa, chai llactata cambaj cachun japingacamanmi, paicunataca cambaj ñaupajmanda asha asha llujchishpa cachasha.

31Cambaj llacta linderocunataca, Puca Cuchamandapacha filisteocunapaj mama cuchacaman, jichushca pambamandaca, Eufrates jatun yacucaman cachunmi churasha. Cai llactapi causajcunataca, cambaj maquipi churajpimi, paicunataca cambaj ñaupajmanda llujchishpa cachangui.

32Paicunahuanga, imatapash na ari ninachu cangui. Paicunapaj dioscunahuambash, na ari ninachu cangui.

33Paicunaca, cambaj llactapica na causangachu. Chaipi causashpaca, paicunapaj dioscunata servichishpara ñucata fiñashpa, juchata rurachinman. Shina rurashpaca, nitijachinshna canda urmachingapajllami canga” nijurcami.