1 SAMUEL 16 - Quichua Imbabura Bible

1Mandaj Diosca, Samueltaca cashnami nijurca: —Israelcunata jatun mandaj cashcamanda, Saulta ñuca anchuchishcamandaca, ¿ima horacamanda huacajugringuilla? Can charijuj cachupi aceiteta jundachishpa tigramugri. Candaca, Belén pueblopi causajuj Isaí shuti runapajmanmi cachagrini. Paipaj churicunamandami, jatun mandaj cachun shujta ña agllarcani— nijurcami.

2Shina nijpimi Samuelca, cashna nirca: —¿Imashnata rishayari? Ñuca rishcata Saúl yachashpaca, huañuchihuangamari— nijpimi Mandaj Diosca, cashna nirca: —Huagracunamanda shuj shicuta apashpa rishpa, cashna nigri: ‘Mandaj Diosman cushpa rupachingapajmi shamurcani’ ningui.

3Chaita rupachingapaca, Isaí runatapash cayangui. Chaipimi, can imatalla ruranataca villasha. Maijanda ñuca ricuchishcatami, aceiteta talishpa javingui— nircami.

4Samuelca, Mandaj Dios mandashcashnallatami rurarca. Belén puebloman pai ña chayajpimi, chai pueblopi causanajuj mandaj rucucunaca, ninan manllaihuan tuparingapaj llujshishpaca: —¿Alita villashpa cushichingapajchu shamujupangui?— nishpa tapunajurca.

5Shina nijpimi Samuelca, cashna nirca: —Ari, ñucaca Mandaj Diosman cushpa rupachingapajmi shamujuni. Cangunapash, Diospajlla tucushpa, Diosman cushpa rupachingapaj ñucahuan jacuchi— nircami. Shinallata Isaí shuti runatapash, paipaj churicunatapash, Diospajlla cachun rurashpami: “Diosman cushpa rupachingapaj shamuichi” nishpa cayarca.

6Paicuna ña shamujpimi, cashna tucurca: Samuelca, Eliab shuti runata ricushpami: “Mandaj Diosca, cai runatapachami jatun mandaj cachun agllashca canga” yajurca.

7Shina yajujpimi Mandaj Diosca, Samuelta cashna nirca: “Ama pai juyailla runa cajtalla, shinallata jatun runa cajtalla ricuichu. Paitaca, ñucami yangapi churani. Mandaj Dios ñucaca, runashnaca na ricunichu. Runaca, paipaj ñavipi ricurishcatallami ricun. Ashtahuangarin Mandaj Dios ñucaca, shungutami ricuni” nircami.

8Shinamandami Isaí runaca, caishuj churi Abinadab shuti runata, Samuelpaj ñaupajman cayarca. Shina cayajpi shamujpimi, Samuelca: —Mandaj Diosca, paitapash na agllashcachu— nirca.

9Chai jipami Isaí shuti runaca, Sama shuti caishuj churita cayarca. Shina cayajpi shamujpimi, Samuelca: —Mandaj Diosca, paitapash na agllashcachu— nirca.

10Shinami Isaí shuti runaca, paipaj canchis churicunataca, Samuelpaj ñaupajman cayarca. Ashtahuangarin Samuelca, Isaí runataca: —Mandaj Diosca, caicunataca na agllashcachu— nircami.

11Chai jipami Samuelca, Isaí runataca: —Cambaj churicunaca, ¿caicunallachu capan?— nirca. Shina nijpimi, Isaí runaca: —Shuj uchilla churigullami tiapan. Paica, llamacunatami michijun— nirca. Shina nijpimi Isaí runataca, Samuelca cashna nirca: —Paita pushamuchun cachai. Pai caiman shamungacaman, na micungapaj tiarishunllu— nircami.

12Shina nijpimi, paita cayachun cachashpa, ña chayamujpica ucuman churarca. Chai huambraguca, pucajlla ajcha, juyailla ricujuj, ali huambragumi carca. Pai chayamujpimi Mandaj Diosca, Samueltaca cashna nirca: —Paimi, jatun mandaj tucugrin. Jatarishpa, paipaj umapi aceiteta talishpa javilla— nircami.

13Shina nijpimi Samuelca, aceiteta jundachishca cachuta japishpa Davidtaca, paipaj huauquicunapash ricujta, aceiteta talishpa javirca. Chai punllamandapachami, Mandaj Diospaj Espirituca Davidpajman shamurca. Chai jipaca Samuelca jatarishpa, Ramá puebloman tigrarcallami. Davidca, Saulpaj ñaupajpimi arpata tocashca

14Mandaj Diospaj Espirituca, Saulpajmanda anchurircami. Mandaj Diosmandami shuj nali ayaca, Saulta llaquichijurca.

15Shina cajpimi Saulta servijcunaca, cashna ninajurca: —Ricui cunanga, Taita Diosmandami shuj nali ayaca, canda llaquichijun.

16Ñucanchita mandajlla, cambaj ñaupajpi tiaj canda servijcunataca, arpata tocanata yachaj shuj runata mascachun cachapairi. Taita Diosmanda shuj nali aya cambajman shamujpica, pai tocajta uyashpa ashaguta cushijungui— ninajurcami.

17Shina nijpimi Saulca, paita servijcunataca cashna nirca: —Shina cashpaca, maijambash ali tocanata yachajta mascashpa, cunanda caiman pushamuichi— nircami.

18Shina nijpimi servij puramanda shuj runaca, cashna nishpa tigrachirca: —Ricui, ñucami Belén pueblopi causajuj Isaí runapaj shuj churiguta ricurcani. Paica, tocanata ali yachaj, imatapash na manllaj, ninan shinlli huambragumi. Macanajunatapash ali yachaj, aligutapacha yarishpa parlaj, juyailla huambragumi. Shinallata Mandaj Diospash paihuanmi— nircami.

19Shina nijpimi Saulca, villajcunataca Isaí runagupajman cashna nichun cacharca: “Llamacunata michijuj cambaj churi Davidta cachamui” nijunmi nichunmi cacharca.

20Shina villajpimi Isaí runaca, shuj burrota japirca. Chai burropica tandata, shuj fundupi vinota, huahualla chivota apachishpami, paipaj churi Davidtaca, Saulpajman cacharca.

21Saulpajman David chayamushpaca, paita servijmi tucurca. Saulca, Davidta ninanda juyashpami, paipaj macanajunacunata apashpa purichun churarca.

22Chaimandami Saulca, Isaí shuti runapajman cashna nichun cacharca: “Davidtaca, ñucahuan causachun saquipailla. Paica, ñuca ñaupajpica aligumi ricurishca” nichunmi cacharca.

23Taita Diosmanda shuj nali aya, Saulta japijhuanmi, Davidca arpata japishpa tocan carca. Shina tocajpimi Saulca, cushilla tucushpa munaillayachin carca. Shinallata Saulta llaquichijuj, chai nali ayapash anchurinllami carca. Goliat shuti runatami Davidca huañuchishca