ÉXODO 10 - Quichua Imbabura Bible

Langostacunahuanmi llaquichishca

1Mandaj Diosca, Moisestaca cashnami nirca:

—Faraonbaj ñaupajman yaicungui. Ñucami, paipaj shungutapash, paita servijcunapaj shungutapash shinlliyachircani. Cai ñuca rurashcacunata paicunaman ricuchingapajmi, chashna rurarcani.

2Cangunapaj huahuacunaman, cangunapaj churicunapaj huahuacunamambash, Egiptopi ñuca imatalla rurashcacunata, pai puracunapi ima ricuchinacunata villanajuchunmi, chashna rurarcani. Ñucataca, Mandaj Dios cajta yachachunmi, chashna rurarcani— nircami.

3Shina nijpimi Moisespash, Aaronbash, Faraonbajman shamushpa cashna ninajurca:

—Hebreocunata Mandaj Taita Diosca, cashnami nin: ‘¿Ima punllacamanda ñuca ñaupajpi na pingai tucushpa na urai cumurigringui? Ñuca agllashcacunataca, ñucata servingapaj richun saqui.

4Ricui, richun saquingapaj nara munajpica, cayapaca ñucami cambaj llactaman, langostacunata cachamusha.

5Chai langostacunami, tucuilla llactapica alpapash, na ricuringacaman quilpanga. Chaicunami, rundu na tucuchijpi puchushcacunatapash micunga. Shinallata pambapi ali fucuj yuracunatapashmi micunga.

6Cambaj huasicunapipash, canda servijcunapaj tucui huasicunapipash, Egiptopi causajcunapaj tucui huasicunapipashmi jundanga. Chashnataca, cangunapaj taitacunapash, cangunapaj taitacunapaj punda taitacunapash, paicuna cai llactapi tiai callarishcamandapacha cunangaman, ima horapash na ricushcami canga’ ninmi— ninajurcami.

Chai jipami, Faraonbaj ñaupajmanda llujshishpa tigranajurca.

7Shinamandami Faraonda servijcunaca, cashna ninajurca:

—¿Ima punllacamanshi cai ruranaca, ñucanchita urmachij lazushna canga? Cai runacunataca, paicunata Mandaj Taita Diosta servingapaj richun saqui. Egipto llacta ña tucurishcataca, ¿narachu yachangui?— ninajurcami.

8Shinamandami Moisespash, Aaronbash, Faraonbaj ñaupajman cutin cayai tucunajurca. Paicunataca cashnami nirca:

—Cangunata Mandaj Taita Diosta servingapaj richilla. ¿Maijangunallata rina canguichi?— nircami.

9Shina nijpimi Moisesca, cashna nishpa tigrachirca:

—Ñucanchica, ñucanchi huahuacunandi, ñucanchi rucu taitagucunandi, ñucanchi churicunandi, ñucanchi ushicunandi, ñucanchi llamacunandi, ñucanchi huagracunandimi rina canchi. Mandaj Diosman ñucanchi jatun fiestata rurana cashcamandami, chashna rina canchi— nircami.

10Shina nijpimi Faraonga, cashna nirca:

—¡Mandaj Diosca, cangunahuan cajpipash, imashnamanda cangunataca, cangunapaj huahuacunandi richun saquishayari? ¡Ricuichi, cangunaca nalitamari yarinajunguichi!

11Na chashna cangachu. Cunanga, cangunaca jaricunalla Mandaj Diosta servingapaj richi. Chaitami, cangunaca munarcanguichi— nircami.

Chai jipami, Faraonbaj ñaupajmanda llujchishpa cachanajurca.

12Shinamandami Mandaj Diosca, Moisestaca cashna nirca:

—Egipto llactaman langostacunata apamungapaj, cai Egipto llacta jahuapi cambaj maquita chutai. Chai langostacunami, rundu na tucuchijpi puchushcacunatapash, tucuillata tucuchinga— nircami.

13Shina nijpimi Moisesca, paipaj vara caspitaca, Egipto llacta jahuapi chutarca. Shina rurajpimi Mandaj Diosca, tucui chai punllapash, tucui chai tutapash, indi llujshimuj ladomanda huairata chai llactaman cachamurca. Chai cayandi pacaripaca, indi llujshimuj ladomanda huairami, langostacunata apamurca.

14Langostacunaca, tucuilla Egipto llactamanmi vichai shamurca. Shina shamushpami, tucuilla Egipto llactapica, pundaca ima horapash na tiashcata, jipamambash na chashnaca tianata manllanayaita jundamurca.

15Chai tucuilla llactata quilpajpi amsayashpami, alpapash na ricurijurca. Shinallata alpapi tucuilla jihuacunatapash, quirucunapi fucushcacunata rundu na tucuchijpi puchushca tucui granocunatapashmi tucuchirca. Shinamandami, tucuilla Egipto llactapica, quirucunapi ima verdellacunapash, pamba jihuallapash na puchurca.

16Chaimandami Faraonga, Moisestapash, Aarondapash ucha cayachun cachashpa, cashna nijurca:

—Cangunata Mandaj Taita Diostapash, cangunatapash fiñashpami, juchata rurapashcani.

17Ashtahuangarin cunanga, juchata ñuca rurashcataca, cunangulla cungapaichi nipanimi. Shinallata cai huañuchina llaquitallapash ñucamanda anchuchihuachun, cangunata Mandaj Taita Diosta mañapaichi— nijurcami.

18Shina nijpimi Moisesca, Faraonbaj ñaupajmanda llujshishpa, Mandaj Diosta mañarca.

19Shina mañajpimi Mandaj Diosca, indi huashajuj ladomanda ninan shinlli huairata cachamurca. Chai huaira shamushpami, langostacunataca anchuchishpa, Puca Cuchaman shitarca. Tucui Egipto llactapica, shuj langostallapash na puchurcachu.

20Ashtahuangarin Mandaj Diosllata, Faraonbaj shunguta shinlliyachijpimi, israelcuna richunga na saquirca.

Yana yana tutahuanmi llaquichishca

21Mandaj Diosca, Moisestaca cashnami nirca:

—Egipto llactapi yana yana tuta tucuchun, cambaj maquita jahua pachaman chutai. Chai yana yana tutataca, maijan cashpapash maquihuan tacarinallami canga— nircami.

22Shina nijpimi Moisesca, paipaj maquita jahua pachaman chutarca. Shina rurajpimi, tucuilla Egipto llactapica, quimsa punllacaman yana yana tuta tucurca.

23Shina tucujpimi, paipaj cumbatallata pipash na ricui usharca. Quimsa punllacamanmi, paicunapaj huasimandaca pipash na llujshi usharca. Ashtahuangarin tucuilla israelcunapaj huasicunapica, punchallami carca.

24Chaimandami Faraonga, Moisesta cayachun cachashpa cashna nirca:

—Rishpa, Mandaj Diosta servigripaichilla. Cangunapaj llamacuna, cangunapaj huagracunallami quedanga. Cangunapaj huahuacunapash, cangunahuan richunlla— nircami.

25Shina nijpimi Moisesca, cashna nishpa tigrachirca:

—Cambashmari, huañuchishpa tucuillata rupachina animalcunataca ñucanchiman cungui. Chaicunataca, ñucanchita Mandaj Taita Diosman cushpami huañuchishun.

26Ñucanchi animalcunapashmi, ñucanchihuan ringa. Ñucanchi animalcunamandaca, shuj sillullapash na quedangachu. Chai animalcunamandami, ñucanchita Mandaj Taita Diosta servingapaca, japina canchi. Chaiman chayangacaman rinajushpapash, Mandaj Diosta imahuan servitaca na yachashpami tianajunchi— nircami.

27Ashtahuangarin Mandaj Diosllata, Faraonbaj shunguta shinlliyachijpimi, paicuna richunga na saquirca.

28Faraonga cashnami nirca:

—Ñucamandaca anchuri, ñuca ñavipica ama ashtahuan ricurihuaichu. Ima punlla cashpapash, ñuca ñavita ricushpaca, huañunguimi— nircami.

29Shina nijpimi Moisesca, cashna nishpa tigrachirca:

—Alitami nihuangui, cutinga na cambaj ñavita ricushachu— nircami.