Psalms 61 - Quichua Imbabura Bible

Taita Dios huacaichinata yariashpa mañashcamiCuerdacunahuan tocanacunata tocashpa, candajcunata mandaj candachijuchun, David rurashca Salmomi.

1Taita Dioslla, ñuca caparishpa mañajujtaca uyahuayari.

Ñuca mañajujtaca, aliguta uyahuayari.

2Ñuca shungu ña huañugrijunshna cajpimi,

cai pacha tucuri manñamandapacha candaca caparisha.

Ñucata yali ashtahuan jatun rumi jahuaman pushahuayari.

3Canmi, ñuca pacajuna carcangui.

Ñucata fiñajcunapaj ñaupajpica,

shinllipacha torreshnami carcangui.

4Cambaj jatun carpapimi, causaita

causaicaman causajusha.

Quilpajuj cambaj alas ucupimi,

imatapash na manllashpa tiajusha. Selah

5Taita Dioslla, canman imatalla rurashapacha

nishcataca uyahuashcanguimi.

Cambaj shutita manllajcunaman,

caranatallatami carahuashcangui.

6Jatun mandajpaj causai punllacunataca,

punllan punllanmi ashtahuan mirachipangui.

Paipaj huatacunapash, mirai miraicunashnami canga.

7Causaita causaicamanmi, Taita

Diospaj ñaupajpi canga.

Paitaca llaquij canahuan,

na llullaj canahuan cuidapangui.

8Shina rurajpimi, ñucaca tucui

causaipi cambaj shutigutaca candajusha.

Ñuca imata rurashapachami nishcataca,

punllandimi pactachijusha.