Psalms 12 - Quichua Imbabura Bible

Nali gentecunamanda mitsashpa ayudachunmi mañashcaCuerdacunahuan tocanacunata tocashpa, Seminit nishca tonopi, candajcunata mandaj candachijuchun, David rurashca Salmomi.

1Mandaj Dioslla, quishpichihuayari.

Huañuna aichayu runa puramandaca,

canda yariashpa causajcunaca chingashcamari.

2Tucuicunallatami caishuj,

chaishuj llullashpa parlanajun.

Mishqui shimi jayaj shungu cashpami,

shimihuanga uyanayaita llullashpa parlanajun.

3Mandaj Diosca, shimihuanlla uyanayaita

llullashpa parlajcunatapash, jariyashpalla

parlajcunatapash, tucuillatami tucuchinga.

4Paicunaca cashnami ninajurca:

“Ñucanchi jalluhuan rimashpami mishashunchi.

Ñucanchi shimica ñucanchipajmi.

¿Pita ñucanchitaca mandangayari?” ninajurcami.

5Mandaj Diosca, cashnami nin:

“Imagutapash na charijcunata llaquichishcamanda,

imagupash illajcuna aij nishpa

huacanajujmandaca cunanga, ñucami shayarigrini.

Chai llaquihuan jatunda llaquirijcunataca,

ñucami quishpichigrini” ninmi.

6Mandaj Diospaj Shimicunaca, mapa illaj shimicunami.

Paipaj Shimicunaca, alpa jornopi rupachishpa,

mapata anchuchishpa punchayachishca culquishnami.

Canchiscaman rupachishpa mapa illajta saquishcashnami.

7Can Mandaj Diosmi, paicunataca huacaichipangui.

Cai nali miraicunamandaca,

causaita causaicaman alichiriapangui.

8Huañuna aichayu runa puracunapica,

yanga nalicunatara alicachijpimi,

nalita ruraj runacunaca ladolla muyurianajun.