PROVERBIOS 21 - Quichua Imbabura Bible

1Jatun mandajpaj shunguca, Mandaj Diospaj maquipica,

uchilla larca yacucuna chaupirishpa rijunshnami.

Paica, pai maiman munashcamanmi cachajun.

2Runaca, tucui causaipi imatalla rurashpapash,

aligutallami rurajuni yajunmi.

Ashtahuangarin Mandaj Diosmi,

shungutaca pezanshna ricujun.

3Imatapash cashcatapacha rurashpa,

aligutapacha ricushpa mandashcami, Mandaj

Diospaca animalta carashpa huañuchishcatapash

yali ashtahuan aligu ricurin.

4Jariyashpa ricunapash, shungupi ninanda jariyanapash,

Diosta na manllajcunashna yarijunapash juchami.

5Imatapash ucha rurajcuna aliguta yarishcahuanga,

ashtacatapachami charinga.

Ashtahuangarin yapata musparishpa, imatapash ruraj

tucui runacunaca, imagupash illajmi tucunga.

6Imapash ninan valishcacunata alichinshna, llulla jalluhuan

ninanda mirachishpa huañuita mascajcunapaca,

ñapash chingajlla samaishnami.

7Diosta na manllajcunataca, paicuna

shuhuashcallatami tucuchinga.

Aliguta ricushpa mandangapaj na munashcamandami,

chashna tucuchinga.

8Jatun nalita ruraj runapaj causaica,

pandanalla na rijsishca ñanshnami.

Ashtahuangarin aligutalla ruraj runapaj

causaica, imatalla rurashcapash aligumi.

9Jatun huasi ucupi causashpapash, imatapash

nirijushpa ninandapacha fiñachijujlla huarmihuan

causangapaj randica, huasi jahua uchilla ucugupi

causanami ashtahuan ali.

10Diosta na manllaj runapaj shungupica,

pitapash llaqui japichunllami munan.

Pitapash na llaquishpa ricunllu.

11Na cazushpa asij runata llaquichijta ricushpaca,

na yachajushca runapash alipacha yachajushcami tucunga.

Alipacha yachajushca runacarin, shinlli

tacurijpillata, ali yachaita japingallami.

12Imatapash cashcatapacha ruraj runaca,

Diosta na manllaj runapaj huasi ucu purataca ricujunmi.

Diosta na manllajcuna nalita rurashcamanda

imashna tucuchi tucunajujtapashmi ricujun.

13Imagutapash na charij runagu caparishpa mañajpi

na uyaj runataca, jipaman pai caparijujpipash,

pipash na uyangachu.

14Imatapash pacalla carashpaca,

ninandapacha fiñarishcatapash alichinmi.

Imatapash pacalla japishpa quinllulishcapash,

shinllipacha fiñarishcata alichinmi.

15Aliguta ricushpa mandanaca, imatapash

cashcatapacha ruraj runapaca cushijuimi.

Ashtahuangarin nalita rurajcunapaca, tucuchij llaquimi.

16Ali yachaita saquishpa causaj runaca,

huañushcacunahuanmi tandanajugringa.

17Ima nalicunatapash rurashpa cushijuj

runaca, imapash illajmi causanga.

Vinotapash, mishquilla ashnajuj jambicunatapash

munaj runaca, napacha charijyangachu.

18Imatapash cashcatapacha ruraj runataca,

Diosta na manllaj runata cushpami quishpichin.

Aligutalla ruraj runacunataca, yachashpata

na cazuj runata cushpami, randishna quishpichin.

19Imatapash nirijushpa, ninandapacha fiñachijujlla

huarmihuan causangapaj randica, jichushca

pambapi causanami ashtahuan ali.

20Alipacha yachajushca runapaj huasipica,

imalla ninan valishcacunapash, aceitepashmi tian.

Ashtahuangarin juizu illaj runaca,

tucuillata tucuchinllami.

21Imatapash cashcatapacha ruranata pitapash

llaquishpa causanata na saquishpa catij runaca,

causaitapash, imatapash cashcatapacha ruranatapash,

alicachi tucunatapashmi japinga.

22Alipacha yachajushca runaca, ninan

shinllicunapaj pueblotaca quichurcallami.

Na urmachingachu yashpa chaita yariajlla causanajushca

jatun pircatapash urmachircallami.

23Imatapash cacharishcata rimanamanda

jalluta jarcarij runaca, paipaj alma llaquipi

yaicunatami huacaichijun.

24Jariyashpa jatun tucuj, na cazuj runataca,

na cazushpa asij runami ninajunmi.

Yapata jariyashpa na cazushpami, imatapash ruran.

25Imata ruranatapash na munaj runaca,

paipaj maquihuan imata rurangapajpash

na munashcamandami, imatalla charingapaj

ninanda munashpa huañujun.

26Huaquingunaca, punllandi imatapash

munashpallami causan.

Ashtahuangarin imatapash cashcatapacha ruraj runaca,

na mitsashpa imaguta carangapajpash charinmi.

27Diosta na manllajcuna, animalta Diosman

carashpa huañuchishcapash millanayainmi.

¡Nali shunguhuan carashcacarin, ashtahuanmmi millanayaimi!

28Llullashpa villaj runaca, huañungami.

Ashtahuangarin uyashcatapacha villaj runaca,

alimi llujshinga.

29Diosta na manllaj runapaj ñavipica,

imatapash na rurashcatashnami ricuchin.

Ashtahuangarin aligutalla ruraj runaca, paipaj

causaipica aligutami purin.

30Ima yachaipash, ima yuyaipash, ima yuyaita

cushcapash, Mandaj Diostaca na mishai ushanllu.

31Macanajui punllapaca, caballocunahuanmi

ninanda alichirinajun.

Ashtahuangarin Mandaj Dios mishachijpillami mishanajun.