NÚMEROS 16 - Quichua Imbabura Bible

Coré shuti runa na cazushcatami villajun

1Coré shuti runaca, Coat shuti runapaj mirai puramandami carca. Coat shuti runaca, Leví shuti runapaj churimi carca. Coré shuti runaca, Izhar shuti runapaj churimi carca. Coré shuti runami, Rubén aillu puramanda Datán, Abiram, On shuti runacunahuan tandanajurca. Datán shuti, Abiram shuti runacunapash, Eliab shuti runapaj churimi carca. On shuti runapaj taitaca, Pelet shutimi carca.

2Paicunami, ishcai patsaj picha chunga israelcunahuan tandanajushpa, Moisesta ninanda nalicachishpa rimanajurca. Chai runacunaca, tandanajushca israelcunata mandajcuna, yuyaita cuj runacuna, alicachi tucushcacunami carca.

3Chai runacuna tandanajushpami Moisestapash, Aarondapash fiñashpa, cashna ninajurca:

—¡Cangunaca, na ashtahuan ñucanchita mandanachu canguichi! Tucuilla tandanajushca israelcunapash, Diospajlla cachun shicanyachishcacunami. Mandaj Diosca, paicunapaj chaupipimi causajun. Shina cajpica, Mandaj Diospajlla tandanajushca israelcunataca, ¿imashpata cangunalla mandashpa causanajunguichi?— ninajurcami.

4Shina ninajujta uyashpami, Moisesca cungurishpa, alpaman chayajta cumurirca.

5Chaipimi Coré shuti runatapash, tucui paita catijcunatapash, cashna nirca:

—Cayapajmi Mandaj Diosca, maijanlla paipaj cajtapash, maijandalla paipaj cachun shicanyachishcatapash ricuchinga. Paillatami, maijanda cashpapash paipajman quimirichun agllanga. Chai agllashca runatami, paipajman quimichinga.

6Shina cashcamanda caita ruraichi: Coré shuti runapash, paita tucui catijcunapash, incensariocunata japichi.

7Chaicunapica, cayapaca ninata churashpa, chai jahuapica, Mandaj Diospaj ñaupajpi inciensota churanguichi. Chaipica, maijandami Mandaj Dios agllan, chai runami paipajlla cachun shicanyachishca canga. Chaipimi, Levipaj miraicunaca na ashtahuan rimai ushanguichi— nijurcami.

8Shina nishca jipapash Moisesca, Coré shuti runata cashna nircarami:

—Cunanga Levipaj miraicuna, uyahuaichi:

9Israelcunapaj Taita Dios, tandanajushca Israel puramanda cangunata agllashcapash, ¿yangallachu ricurin? Shina agllashpami cangunataca, Mandaj Dios paipaj carpapi paipajta ruranajuchun, paipaj ladoman quimichirca. Tandanajushca israelcunapaj ñaupajpi, Diospajta ruranajuchunmi churarca.

10Levipaj miraicunataca candapash, cambaj tucui huauquicunatapashmi, paipaj ladopi servinajuchun churarca. ¿Shina cashpatachu, curacuna tucungapajpash munanguichi?

11Cambash, canda tucui catijcunapash, Mandaj Diosta fiñashpami tandanajushcanguichi. Aaronga, ¿ima cajpita ninanda nalicachishpa rimanajunguichi?— nijurcami.

12Chai jipami Moisesca, Eliab shuti runapaj churi Datán shuti runatapash, Abiram shuti runatapash cayamuchun cacharca. Ashtahuangarin paicunaca, cashna nishpami tigrachinajurca:

—Ñucanchica, napacha chaiman rishunllu.

13Ñucanchitaca, lechepash, balun mishquipash ashtaca tiaj llactamanda llujchishpa, ¿cai jichushca pambapi yarjaimanda huañunajuchun pushamushpaca, imapash na canllu yanguichu? Chai jahuapash ñucanchitaca, ninanda mandashpalla charingapajmi munangui.

14Canga, lechepash, balun mishquipash ashtacapacha tiaj llactamangarin nara chayachishcanguichu. Alpacunatapash, uvas chagracunatapash ñucanchipaj cachun nara cushcanguichu. ¿Cai runacunataca, ñavita surcunshnachu charigringui? Ñucanchica, napacha vichai rishunllu— ninajurcami.

15Shina nijpimi, Moisesca ninanda fiñarishpa, Mandaj Diostaca cashna nirca:

—Paicuna canman imatapash carashcataca, ama ricupaichu. Paicunapajtaca, shuj burrotallapash na japircanichu. Paicunataca, maijandallapash na llaquichircanichu— nircami.

16Shina nishca jipami Moisesca, Coré shuti runataca cashna nirca:

—Cambash, canda tucui catijcunapash, cayapaca Mandaj Diospaj ñaupajman shayaringuichi. Aaronbash chaipimi canga.

17Cangunaca, tucuicuna incensariota japishpa, chaipi inciensota churaichi. Shina churashpaca, ishcai patsaj picha chunga incensariota apashpami, Mandaj Diospaj ñaupajman tucuicuna incensariocunahuan quimirina canguichi. Cambash, Aaronbashmi incensariocunahuan quimirina canguichi— nijurcami.

18Shina nijpimi, tucuicuna paicunapaj incensariocunata japishpa apamunajurca. Chaicunapi ninata, inciensota churashpami Moisesndi, Aarondi, Dioshuan tuparina jatun carpa punguman shayarinajurca.

19Coré shuti runaca, Moisestapash, Aarondapash fiñachunmi, tandanajushca tucuilla israelcunataca, Dioshuan tuparina jatun carpa punguman tandachishca carca. Chashna tucuilla tandanajushca cajpimi, Mandaj Diospaj punchapambaguca ricurirca.

20Chaipimi Mandaj Diosca, Moisesmambash, Aaronmambash, cashna nishpa villarca:

21—Cai tandanajushca israelcunamanda anchurichi. Paicunataca ñapashmi tucuchigrini— nircami.

22Shina nijpimi Moisespash, Aaronbash cungurishpa, alpaman chayajta cumurishpa, cashna ninajurca:

—Taita Dioslla, canllamari tucui gentecunaman causaitapash, samaitapash caraj Taita Dios cangui. ¿Nachu shujlla runa juchata rurapashcanga? Shina cajpica, ¿imashpata tandanajushca tucuilla israelcunahuan fiñaripangui?— ninajurcami.

23Shinamandami Mandaj Diosca, Moisesta cashna nirca:

24—Tandanajushca israelcunaman cashna nishpa villangui: ‘Coré, Datán, Abiram shuti runacuna causanajuj carpa muyundi ladomandaca anchurichi’ ningui— nircami.

25Shina nijpimi Moisés jatarishpaca Datán shuti, Abiram shuti runacunapajman rirca. Chaiman rijujpimi, israelcunata mandaj rucucunapash Moisesta catishpa rirca.

26Moisés chaiman chayashpami, chaipi tandanajushca israelcunaman cashna nishpa villarca:

—Cunanga, Diosta na manllaj, cai runacunapaj carpacunamanda anchurichi. Paicunapaj juchacunamanda ama paicunahuan huañungapaca, paicuna ima charishcatapash, napacha tacarinachu canguichi— nircami.

27Shina nijpimi, Coré, Datán, Abiram shuti runacunapaj carpa muyundimandaca anchurinajurca. Datán, Abiram shuti runacunallami, paicunapaj huarmicunandi, huahuacunandi, uchilla huahuacunandi llujshishpa, paicunapaj carpa pungupi shayarinajurca.

28Chaipimi Moisesca, cashna nirca:

—Caita ricushpami, cai tucuita rurachun ñucata, Mandaj Dios cachamushcata yachanguichi. Caicunataca, na ñuca munailla rurajushcatapashmi yachanguichi.

29Tucui runacuna huañunshnallata, cai runacunapash huañujpi, na cashpaca paicunata Dios ricungapaj shamujpipash, caishuj runacunashnallata huañujpica, Mandaj Diosca ñucata na cachamushcatami yachanguichi.

30Ashtahuangarin Mandaj Diosca, imata cashpapash mushujtami ruranga. Cai alpa pascarishpami, cai runacunataca paicuna tucui ima charishcacunandi langanga. Shinallata Seolmambash, causajcunami huashajunga. Chaita ricushpami cai runacunaca, Mandaj Diosta ninanda fiñachishcata yachanguichi— nijurcami.

31Chai tucui shimicunata Moisés rimashpa tucuchijhuanmi, cashna tucurca: Chai runacuna maipi shayanajuj alpaca, ñapashmi pascarirca.

32Chai alpa psacarishpami, chai runacunatapash, paicunapaj huasi ucu puracunatapash, Coré shuti runata tucui catijcunatapash, paicuna tucui imatalla charishcacunandi langarca.

33Chai runacunaca, paicuna tucui imatalla charishcacunandimi, Seolman causaj huashajunajurca. Paicunaca alpa quilpajpimi, tandanajushca israelcunapaj chaupimanda chingarca.

34Paicuna ninanda caparishpa huashajunajujta ricushpami, chai muyundipi shayanajuj tucuilla israelcunaca: “Ñucanchitapash alpara langanman” nishpa calpanajurca.

35Shinallata Mandaj Diospaj ñaupajmandaca, nina llujshishpami inciensota cushnichinajuj, ishcai patsaj picha chunga runacunata rupachishpa tucuchirca.

36Chai jipami Mandaj Diosca, Moisesta cashna nijurca:

37“Aaronbaj churi Eleazar curata, cashna ningui: ‘Rupashca chaupimanda, incensariocunata japimugri. Chai incensariocunapi tiaj ninataca, carullaman rishpa taligri. Chaicunaca ñucapajlla shicanyachishcami.

38Chai incensariocunaca, paicunallata juchata rurashpa huañushca runacunapajmi. Chaicunata yacuyachishpa, altarta quilpana planchacunata ruranguichi. Paicunaca, ñucapajlla shicanyachishca chai incensariocunapimi, Mandaj Dios ñuca ñaupajpi cushnichinajurca. Chaimandami chashna rurana canguichi. Chashna rurashcami, israelcuna na cazujpi llaquichinata ricuchij canga’ ningui” nijurcami.

39Shina nijpica, Eleazar curami, inciensota Diosman cushpa cushnichinajuj runacuna rupashpa huañushcacunapaj chaupimanda, bronce incensariocunata apamurca. Chaicunata yacuyachishpami, altarta quilpana planchata ruranajurca.

40Mandaj Diosman inciensota rupachingapaca, na Aaronbaj mirai, na rijsishca maijan runapash, na chayanachu carca. Chaitami, chai planchacunaca, israelcunaman yarichijun. Coré shuti runapash, paita catijcunapash huañushcashna ama huañuchunmi, Mandaj Dios mandashpa, Moiseshuan villachicashnallata rurarca.

41Chai cayandi punllami, tucuilla tandanajushca israelcunaca Moisestapash, Aarondapash fiñashpa nalicachishpa, cashna ninajurca:

—Cangunaca, Mandaj Dios agllashca gentecunatami huañuchircanguichi— ninajurcami.

42Tandanajushca israelcuna Moisestapash, Aarondapash fiñashpa rimangapaj shamushca shayanajujpimi, cashna tucurca: Paicunaca, Dioshuan tuparina jatun carpata ricushpami chai carpataca, fuyu quilpashcata ñapash ricunajurca. Chaipica, Mandaj Diospaj punchapambagumi ricurirca.

43Shina ricurijpimi Moisespash, Aaronbash, Dioshuan tuparina jatun carpa ñaupajman shamunajurca.

44Chaipimi Mandaj Diosca, Moisesta cashna nirca:

45—Cai tandanajushca israelcunapaj chaupimanda anchurichi. Paicunataca, ñapashmi tucuchigrini— nircami.

Shina nijpimi Moisespash, Aaronbash cungurishpa, alpaman chayajta cumurinajurca.

46Chai jipami Moisesca, Aarondaca cashna nirca:

—Incensariota japishpa, altar jahuamanda ninata churai. Chai jahuapillata inciensotapash churashpa, tandanajushca israelcunapajman ucha rishpa, paicunapaj juchamanda Diosman cugri. Mandaj Dios ñapash fiñarishcapash, paipaj ñaupajmandami llujshimushca. Huañuica ñami callarishca— nircami.

47Shina nijpimi Aaronga, Moisés mandashcashnallata, incensariota japishpa, tandanajushca israelcunapaj chaupiman calparca. Pai chayajpica, chai gentecunataca ñami huañui japi callarishca carca. Aarón chayashpami, inciensota churashpa, israelcunapaj juchamanda Diosman cujurca.

48Huañushcacunapaj, nara huañushcacunapaj chaupipi Aarón curami, chai jatun huañuica anchurirca.

49Coré shuti runahuan Diosta na cazunajushcamanda huañushcacunata na cuentajpipash, chai jatun huañuipica, chunga chuscu huaranga canchis patsaj gentecunami huañushca carca.

50Dios cachamushca jatun huañui ña anchurijpimi Aaronga, Mandaj Dioshuan tuparina jatun carpa punguman, Moisespajman tigrarca.