1Mandaj Dioslla, ñuca imashna cajta
ricushpami, tucuita rijsihuashcangui.
2Ñuca tiarijtapash, jatarijtapashmi ricuhuashcangui.
Ñuca imatalla yarijujtacarin,
carumandallatami yachashcangui.
3Ñuca maipi purijujpipash, samajujpipash
aligutapachami ricuhuashcangui.
Ñuca imashna causajujtapash, tucuitami rijsihuashcangui.
4Ricui Mandaj Dioslla, canga ñuca jalluhuan imatapash
nara rimajpillatami, ñapash tucuita yachangui.
5Huashatapash, ñaupajtapashmi muyuhuarcangui.
Cambaj maquitapash, ñuca jahuapimi churahuarcangui.
6Chashnapacha cambaj yachaica,
ñucapaca ninanda manllarinami.
Ninan jatumbacha cajpimi, na yachai ushapani.
7Cambaj Espiritumandaca, ¿maimanshi risha?
Cambaj ñaupajmandaca, ¿maipita pacajugrisha?
8Jahua pachaman vichai rijpipash,
canga chaipimi cangui.
Ñuca samanata Seolpi churajpipash,
canga chaipimi cangui.
9Tutamandata alascunahuan calpanshna rishpa,
mama cucha tucuri manñapi causagrijpipash,
10chaipipashmi cambaj maquihuan pushahuangui.
Cambaj ali lado maquihuanmi charihuangui.
11“Yana yana tutaca pacahuangapachami” nijujpipash,
chai tutapashmi ñuca muyundipica punchayachinga.
12Cambaj ñavimandaca, yana yana
tutapash na pacai ushanllu.
Tutapash punllashnallatami punchayachijun.
Yana yanapash, punchapambapash, cambaj
ñavipica chashnallatami.
13Canmi, ñuca vijsa ucupi tucui
tiajcunataca rurarcangui.
Ñuca mamapaj vijsapipash, canmi viñachishcangui.
14Ninanda manllarina, juyaillagucunata
rurashcamandami, candaca alicachisha.
Ñucaca, ninandapacha manllarishcami cani.
Chaitaca, ñuca almapash alipachami yachan.
15Ari, pacallapi ñuca viñajushpapash,
cambaj ñaupajpica na pacalla cai usharcanichu.
Alpa ucu ucupi ahuarinshna viñajushpapash,
na pacajui usharcanichu.
16Muyushna chaira viñai callarijujpipash,
canga ricujushcanguimi.
Tucui chaicunataca, cambaj libropimi escribishca carca.
Chai jipaca chaicunataca, shujllatapash
na illajtami viñachishcangui.
17¡Taita Dioslla, cambaj jatun yuyaica,
ñucapaca juyaillagupachamari!
¡Na yachai ushanalla jatun yuyaicunatamari charingui!
18Chaicunata ñuca cuentangapaj munajpica,
t'iyu alpashnami ashtahuan miran.
Puñujushpa rijcharishpapash, canhuanllatami cani.
19Taita Dioslla, canda na manllaj
runataca, causaita quichunguipachami.
Huañuchij runacuna, ñuca ladomanda anchurichi.
20Paicunaca, nali shimicunahuanmi candaca rimanajun.
Canda fiñajcunaca, cambaj shutitaca
yangatami rimanajun.
21Mandaj Dioslla, canda millanayachij
runacunataca, ¿nachu na ricunayachini?
Canda fiñajcunataca, ¿nachu ninandapacha fiñani?
22Paicunataca ricuitapachami na ricunayan.
Paicunataca, ñucata fiñajcunami yashpami ricuni.
23Taita Dioslla, ñuca shungutaca
imashna cajta ricushpa rijsihuayari.
Ñuca yuyaicunatapash, imashna cajta ricushpa rijsihuayari.
24Ñuca causaipica, jatun nalita
rurarcanipashchari, ricuhuayari.
Causaita causana ñangupi pushahuayari.
Who We AreWhat We EelieveWhat We Do
2025 by iamachristian.org,Inc All rights reserved.
