ROMANOS 8 - Quichua Imbabura Bible

Diospaj Espíritu munashcashnami causana

1Cunanga, Cristo Jesushuan shujlla tucushcacunataca, Diosca ninan llaquiman na cachangachu. Paicunaca, Diospaj Espíritu yachachijujta catishpami, paicunapaj munaitaca na ruranajun.

2Cristo Jesushuan shujlla tucushcamanda, causaita causagrinata caraj Diospaj Espiritumi, juchata rurashcamanda huañushpa chingagrichun ñucata mandajujmandaca cacharichihuarca.

3Juchayu causanajujpimi, mandashca shimicunaca juchataca napacha anchuchi usharca. Shinamandami, Taita Diosca paipaj Churitapacha, juchayu gentepaj aichashnalla aichayu tucuchun, cachamurca. Shina cachamushpami, ñucanchipaj juchataca, chai aichapillata tucuchirca.

4Shinamandami, mandashca shimicunapi imatapash cashcatapacha ruranata nijujtapash rurashpa pactachinajunchi. Shina cashpami, Diospaj Espíritu ñucanchita yachachijujta catishpa, ashtahuangarin na ñucanchipaj munaita rurashpa causanchi.

5Ashtahuangarin quiquin munaitalla rurashpa causajcunaca, quiquin munaitalla rurashpa causanatallami yariashpa causanajun. Ashtahuangarin Diospaj Espíritu yachachijujta catijcunaca, imatapash Diospaj Espíritu munashcatami rurangapaj yariajlla causanajun.

6Quiquin munaitalla rurashpa causanaca, huañushpa chingagringapajllami. Ashtahuangarin Diospaj Espíritu munashcatalla rurashpa causanaca, causaigutapash, casilla ali causaitapash charinami.

7Quiquin munaitalla yarishpa causanaca, Taita Diosta fiñachishpa causanami. Chashna causashpaca, Taita Dios mandashca shimitaca napacha cazui ushanllu. Cazungapaj munashpapash, na ushanajunllu.

8Paicunapaj munaitalla rurashpa causajcunaca, na Taita Diosta cushichi ushanllu.

9Ashtahuangarin cangunaca, na cangunapaj munaita rurashpa causanajunguichica. Ashtahuangarin Taita Diospaj Espíritu cangunapaj shungupi causajujpica, Diospaj Espíritu munashcatami rurashpa causanguichi. Cristopaj Espirituta na pipash charishpaca, napacha paipajchu.

10Shina cajpipash Cristo cangunapaj shungupi causajujpica, cangunapaj espirituca imatapash cashcatapacha rurashcamandami causai ushan. Ashtahuangarin cangunapaj cuerpoca, juchata rurashcamandaca huañushcami.

11Ashtahuangarin huañushcacunapaj chaupimanda Jesusta causachij Diospaj Espiritumi, cangunapaj shungupi causajun. Jesucristota causachij Diosca, paipaj Espirituhuan cangunapaj shungupi causajushpami, huañunalla cangunapaj cuerpocunatapash causachinga.

12Shinamandami huauquicuna, panicuna, ruranata charinchi. Na ñucanchi munaipajtalla rurashpa causanatami charinchi.

13Cangunapaj munaitalla rurashpa causashpaca, huañunguichimi. Ashtahuangarin nali munaicunata rurashcataca, Diospaj Espirituhuan huañuchinshna tucuchishpaca causanguichimi.

14Taita Diospaj Espíritu pushajpi tucui causajcunami, Taita Diospaj huahuacuna.

15Gañanshna cutin manllaihuan causanata yachachij espiritutaca, na chasquishcachu canguichi. Ashtahuangarin Diospaj huahuacuna tucushpa causanata yachachij, paipaj Espiritutami chasquircanguichi. Paimandami Taita Diostaca: “¡Ñuca Taitalla!” nishpa, caparishpa mañanajunchi.

16Diospaj Espiritullatami, ñucanchi shungupica: “Cangunaca, Taita Diospaj huahuacunami canguichi” nishpa yarichijun.

17Diospaj huahuacuna cashpami, pai carasha nishcatapash japigrishun. Taita Dios carasha nishcatami japigrishun. Cristo japishcashnami, ñucanchipash japishun. Cristo llaquita apashcashna apashpaca, paihuanmi punchapamba llactapi causagrishun.

18Cai causajui punllacunapi llaquicunaca, shamui punllacunapi punchapambagupi causagrinahuan chimbapurashpa ricujpica, na imapash cajtami aligutapacha yachani. Chai punchapambaguca, ñucanchipimi ricuringa.

19Taita Diosca, paipaj huahuacunatami juyaillaguman tigrachishpa ricuchinga. Chaitaca, pai rurashca ima tiajcunapash, ninanda ricunayachishpami chapanajun.

20Dios rurashca ima tiajcunaca, na paicunapaj munailla yangacunapacha tucushcachu. Ashtahuangarin shuyashpa chapachun ruraj Diosllata churajpimi, chashna tucushca.

21Dios rurashca ima tiajcunatapash, yanga yanga ismushpa tucurinamandaca, paillata cacharichingami. Paipaj huahuacuna punchapambapi causagrichun, Taita Diosllata cacharijpimi, chaicunapash cachariringa.

22Shuj huarmi ungungapaj ninanda nanachinshnami, Dios rurashcacunaca tucuilla cunangaman aij nishpa llaquita apanajun. Chaitaca alimi yachanchi.

23Na chaicunalla ninan llaquihuan causanajunllu. Ashtahuangarin punda japigrinata ricuchijuj Diospaj Espirituta charishpapash, ñucanchi shungu ucupimi ñucanchipash aij ninajunchi. Ñucanchi cuerpota quishpichishpa, ñuca huahuacunami canguichi nichunmi shuyanajunchi.

24Shuyashpa causangapajmi, ñucanchica quishpirircanchi. Imata shuyanajushpapash ña shamujpica, na ashtahuan shuyanata charinllu. Chai shuyajushcata ña japishpaca, ¿imatata ashtahuan shuyangayari?

25Ashtahuangarin ñucanchi shuyanajushcata nara ricushpapash, na ñapash fiñarishpa shuyanatami charinchi.

26Shinallatami ñucanchi nara shinlli cajpipash, Diospaj Espirituca ñucanchita ayudajun. Diosta ali mañanatapash na yachashcamandaca, imata mañanatapash na ushashcami canchi. Shina cajpipash paipaj Espiritullatami, na rimai ushanalla shimicunahuan ñucanchimandaca, aij nishpa Diosta mañariajun.

27Ashtahuangarin maijan cashpapash paipaj shungupi aligutapacha yarishpa ricushpaca, paipaj Espíritu imata yarichijujtapash yachanmi. Diospaj Espirituca, Taita Dios munashcashnami paipajlla causajcunamandaca mañariajun.

Ashtahuan ali mishajcunami canchi

28Cashnataca alimi yachanchi: Taita Diosta juyajcunataca, tucui imapash ñucanchipaj ali cachunmi, Diosllata ayudajun. Pai imapaj munashcashna agllashcacunami canchi.

29Diosca, paipaj Churishnalla rijchaj cachunmi, pundamandapacha paicunata rijsishcamandaca, paipaj cachun shicanyachirca. Paipaj Churi punda Churi cashcamandaca, ashtaca crijcunata mandaj cachunmi shicanyachirca.

30Chai shicanyachishcacunataca, Diosllatami cayarca. Pai cayashcacunataca, imatapash cashcatapacha rurashcatashnami chasquirca. Imatapash cashcatapacha rurashcatashna chasquishcacunataca, punchapambagutami rurarca.

31Shina cajpica, ¿imatata nina canchi? Taita Dios ñucanchihuan cajpica, ¿pita ñucanchitaca imatapash ningayari?

32Taita Diosca, paipaj Churitapachapash na mitsashpami, ñucanchimandaca tucuicunamanda huañuchun caramurca. Paipaj Churitapash carashca cashpaca, ¿nachu ñucanchimambash tucui imagutapash caramunga?

33Taita Dios agllashcacunataca, ¿pita juchachingayari? Paicunataca Taita Diosmi, imatapash cashcatapacha rurashcatashna chasquin.

34Paicunataca, ¿pita ninan llaquiman cachajca tiangayari? Paicunamandaca, Cristomi ña huañurca. Na chaillachu, ashtahuangarin causarishpa Taita Diospaj ali ladopi tiajushpami ñucanchimandaca, Taita Diosta mañariajun.

35¿Pita Cristo ñucanchita juyajujtaca anchuchi ushanga? ¿Llaquipash, manllaipash, fiñashpa llaquichipash, yarjaipash, churajuna illaipash, huañuchi tucunata manllaipash, espadahuan huañuchi tucunapash anchuchi ushangachu?

36Escribishcapica cashnami nijun:

“Canmandami, punllandi huañuchi tucunajunchi.

Huañuchi tucuna llamacuna cuentai tucushcashnami canchi” nijunmi.

37Ashtahuangarin cai tucui llaquicuna japijpipash, ñucanchita juyajuj Cristomandami, tucuita ashtahuan mishai ushajcuna canchi.

38Shina cajpimi, caitaca aligutapacha yachani: Huañuipash, causaipash, angelcunapash, ninan ushaita charishpa mandajcunapash, cunan punllacunapash, shamui punllacunapash,

39jahua pachapi, ucu pachapi ima tiajcunapash, Dios rurashca imacunapash, ñucanchi Apunchi Cristo Jesusmanda Taita Dios juyajujtaca, ñucanchimandaca napacha anchuchi ushangachu.