Psalms 17 - Quichua Imbabura Bible

Ninanda llaquichinajujpi mitsachun, Diosta mañashcamiDavid mañashca shimicunami.

1Mandaj Dioslla, imatapash cashcatapacha

mañajujtaca, aligutapacha uyahuai.

Ñuca caparijuctaca uyariajupanguimi.

Pitapash na umachij shimihuan mañajujtaca uyahuayari.

2Ñucata mitsanaca, cambaj ladomanda shamupachun.

Aliguta rurashcataca, cambaj ñavihuan ricupairi.

3Canmi, ñuca shungu imashna cajtaca ricushcangui.

Tutami, ricuj shamupashcangui.

Imashna cajta ricungapaj saquishpapash,

nalita rurashcataca, na tarircanguichu.

Ñuca shimihuanga, ama ashtahuan na

cazushpa rimajunatami yarircani.

4Nalicunashna imata ruranamandapash,

cambaj shimihuan mandashcata cazushpami,

paicunapaj ñanda catinataca jarcarircani.

5Ñuca chaqui ama lluchachunga,

cambaj ñangunapi pushahuayari.

6Taita Dioslla, ñucata can uyana

cajpimi, candalla mañajuparcani.

Ñuca mañashca shimicunataca, rinrita

mañachishpa aliguta uyahuayari.

7Cambaj ali ladopi pacajujcunataca,

canmi quishpichingui.

Paicunata fiñashpa llaquichingapaj

jatarijcunamambash, cambaj juyailla

juyaiguta ricuchipairi.

8Cambaj ricujuj ñavigutashna cuidahuayari.

Llandujuj cambaj alas ucupi pacahuayari.

9Ñucata llaquichij nalicunapaj ñavimandapash,

ñucata huañuchingapaj mascajcunamandapash pacahuayari.

10Paicunaca, ninanda virayashcacunami.

Paicunapaj shimihuanga, ninanda

jariyashpami rimanajun.

11Cunanga, ñucanchi purina ñandapash

jarcashcami tianajun.

Paicunaca, ñucanchita alpapi

urmachingapajmi ricurianajun.

12León micunata japingapaj munashpa

chapajunshnami ricurianajun.

Maltun león paipaj utujumanda

pacalla chapajunshnami ricurianajun.

13Mandaj Dioslla, shayaripairi.

Paicunata tuparishpa cungurichipairi.

Ñuca almataca, nalita rurajcunapaj

maquimanda, cambaj espadahuan cacharichihuayari.

14Mandaj Dioslla, chai runacunapaj

maquimandaca, cambaj maquihuan cacharichihuayari.

Cai pachapajtalla munaj runacunamandapash

cacharichihuayari.

Paicuna japinataca, ñami cai causaipillata charin.

Paicunaca, can ashtaca juyaillacunata

cushcatami, vijsapishna jundachinajun.

Paicunapaj churicunamambash, na munajtami caranajun.

Uchilla huahuacunapajpash puchunrami.

15Ashtahuangarin ñucaca, imatapash cashcatapacha

ruraj cashcamandami, cambaj ñavitaca ricusha.

Ñuca rijcharishpaca, canman rijchaj

cashpami ninanda cushijusha.