EZEQUIEL 11 - Quichua Imbabura Bible

Nali mandajcunatami shinllita rimashca

1Diospaj Espiritumi jahuata jatarichishpa, Mandaj Diospaj huasipi, indi llujshimuj ladoman tiajuj punguta apahuarca. Chai punguca, indi llujshimuj ladoman chimba purami carca. Chai pungu yaicuna ladopica, ishcai chunga picha runacuna shayajujtami ñapash ricurcani. Pai purapica, Azur shuti runapaj churi Jaazanías shuti runatapash, Benaía shuti runapaj churi Pelatías shuti runatapashmi ricurcani. Paicunaca, israelcunata mandajcunami carca.

2Chaipica, cashnami nihuarca: “Huañuna aichayu runa. Cai runacunami nalicunatalla yarishpa, chai nali yuyaicunata cushpa, cai pueblopi causajcunataca, jatun nalita ruranata yachachinajun.

3Paicunaca, cashnami ninajun: ‘Huasicunata rurashunchilla. Llaquicunaca na ñapash chayamungachu. Caica mangashnami canga, ñucanchica chai mangapi aichashnami cashun’ ninajunmi.

4Shina cashcamanda, paicunata llaquichinataca villailla. Huañuna aichayu runa, chaitaca villailla” nihuarcami.

5Mandaj Diospaj Espirituca, ñucapajman shamushpami, cashna nihuarca: “Cashna nishpa villai: Mandaj Diosca, cashnami nin: ‘Israelcunalla, cangunaca cashnami rimarcanguichi, canguna imata yarijujtapash yachanimi.

6Cai pueblopica, cangunapaj huañushcacunataca ninandami mirachircanguichi. Ñangunapipash, huañushcacunatami jundachircanguichi.

7Chaimandami Mandaj Jatun Dios ñucaca, cashna nini: Cai pueblo chaupipi churashca cangunapaj huañushcacunami aichashna, cai pueblomi mangashna canga. Ashtahuangarin ñucami cangunataca, cai pueblo chaupimanda llujchisha.

8Cangunaca, espadatami manllarcanguichi, espadatallatami cangunata llaquichingapaj apamusha. Mandaj Jatun Dios ñucallatami, chashna nini.

9Cangunataca, cai pueblomanda llujchishpami, na rijsishca runacunapaj maquipi churasha. Chashnami canguna purapica llaquichisha.

10Cangunaca espadapimi huañunguichi, cangunataca Israel llacta linderocunapimi llaquichisha. Shina rurajpimi ñucataca, Dios cajta yachanguichi.

11Cai puebloca, na mangashna cangachu. Cangunapash cai pueblopica, na aichashnachu canguichi. Cangunataca, Israel llacta linderocunapimi llaquichisha.

12Shina rurajpimi ñucataca, Mandaj Dios cajta yachanguichi. Cangunaca, pactachinajuchun ñuca cushca shimicunataca na pactachishpa causashpami, imata rurachun ñuca mandashcacunatapash na cazurcanguichi. Ashtahuangarin cangunapaj muyundi llactacunapi causajcuna, imatalla ruran cashcashnallatami rurarcanguichi’ nishpa villai” nihuarcami.

13Shina tucunata ñuca villajujpillatami, cashna tucurca: Benaía shuti runapaj churi Pelatías shuti runami huañurca. Chaimandami ñucaca, alpaman chayajta urai cumurishpaca: “¡Aij, Mandaj Jatun Dioslla! Huaquinlla puchushca israelcunataca, ¿tucuillachu chingachigripangui?” nishpa ninanda caparircani.

Taita Diosca, cutin mushujyachishami nishcami

14Mandaj Diosca cai shimicunatami, cashna nishpa villahuarca:

15“Huañuna aichayu runa. Cambaj huauquicuna, cambaj huauquicunaca, cambaj huasi ucu purallatami. Tucui paicunaca Israel purallatami. Tucui paicunatami, Jerusalenbi causajcunaca: ‘Mandaj Diosmanda caruyaichi, ñucanchipaj cachunmi cai llactataca cararca’ nishpa rimanajurca.

16Shina cashcamanda, cashna nishpa villai: Mandaj Jatun Diosca, cashnami nin: ‘Paicunataca, caru llactacunapi causagrichun cachashca cashpapash, shuj llactacunaman caita chaita cachashca cashpapash, chai llactacunaman chayajpica, ñucallatami paicunapaca, ñucata yarina uchilla huasishna casha’ nishpa villai.

17Cashnatapash villangui: Mandaj Jatun Diosca cashnami nin: ‘Cangunataca, shuj llacta runacunapajman caita chaita cachai tucushca causanajujpipash, ñucami tandachimusha. Shina tandachimushpami, Israel llactataca carasha.

18Chaiman tigrashpaca, paicunapaj tucui yanga dioscunatapash, tucui imalla millanayaicunatapash anchuchinajungami.

19Paicunapica, mushuj shunguta, mushuj espiritutami churasha. Paicunapaj rumi shunguta anchuchishpami, aicha shunguta carasha.

20Ñuca mandashcacunata cazushpa causachun, imata rurachun ñuca mandashcacunata uyashpa pactachinajuchunmi, chashna rurasha. Paicunaca, ñuca agllashcacunami canga, ñucapash paicunapaj Taita Diosmi casha.

21Ashtahuangarin paicunapaj shungupica, paicunapaj yanga dioscunata mañanata yariajlla, millanayaicunata ruranata yariajllami causanajun. Chaimandami, paicuna imashna causashcashnallata llaquichisha’ ninmi Mandaj Jatun Diosca ningui” nihuarcami.

22Chai jipaca, querubín nishcacuna paicunapaj alasta alsajpimi, ruedacunapash paicunata catishpa rinajurca. Israelcunapaj Taita Diospaj punchapambaguca, paicunapaj jahuapimi ricurirca.

23Mandaj Diospaj punchapambaguca, chai pueblo chaupimanda vichai jatarishpami, indi llujshimuj ladoman tiajuj urcu jahuapi tiarigrirca.

24Chai jipami Diospaj Espirituca, vichai jatarichishpa apahuarca. Chaipica, Taita Diospaj Espiritumi, caldeocuna causanajuj llactapi tiaj prezu apai tucushcacunapajman, muscuipishna cutin apahuarca. Chai jipaca, muscuipishna ricujushcapash chingarcallami.

25Chaipica, Mandaj Dios tucui imatalla ricuchishcatami, chai prezucunaman villarcani.