JEREMÍAS 23 - Quichua Imbabura Bible

Huaquin puchushca israelcunaca tigrangami

1Mandaj Diosca, cashnami nin: “Ñuca llamacunata, caita chaita cachashpa chingachij michijcunalla, ¡aij imachari tucunga!” ninmi.

2Shinamandami israelcunata Mandaj Taita Diosca, ñuca llactapura gentecunata michijcunataca, cashna nin: “Ñuca llamacunata cuidangapaj randica, manllachishpami caita chaita cacharcanguichi. Uyaichi, canguna nalita rurashcamandami llaquichigrini. Mandaj Dios ñucami, chashna nini.

3Shuj llactacunaman ñucallata cachashca llamacunamanda huaquin puchushcacunataca, ñucallatami cutin tandachisha. Shina tandachishpami, paicuna causanajushca pushtumanllata tigrachimusha. Chaipimi, ashtacacuna mirashpa ninandapacha jundanajunga.

4Paicunata michinajuchunga, michijcunatami churasha. Shina churajpica, na ashtahuan manllanajungachu. Na ninanda chujchunajungachu, na yangapi churai tucungachu” ninmi Mandaj Diosca.

5Mandaj Diosca, cashnatapashmi nin: “Ricuichi, shamui punllacunapica, Davidpaj mirai puramandami, imatapash cashcatapacha ruraj mandajta churasha. Paica, Jatun Mandanshnallatami mandajunga. Paica cushijushpami, cai pachapica imatapash aliguta ricushpa, imatapash cashcatapacha rurashpa mandajunga.

6Pai mandajui punllacunapimi, Judá llactapi causajcunaca, quishpichi tucunga. Israelcunapash, imatapash na manllashpami Diosta yariashpa causanajunga. Paipaj shutica, caimi canga. Chai shutipimi paitaca: ‘Ñucanchiman imatapash cashcatapacha ruraj Mandaj Diosmi’ ninajunga” ninmi.

7Mandaj Diosca, cashnatapashmi nin: “Ricuichi, cangunaca: ‘Israelcunata Egipto llactamanda vichai pushamuj Mandaj Diosca causajumbachami’ ninatami yachanguichi. Shina cajpipash, na ashtahuan chashna parlana punllacunami chayamugrin.

8Ashtahuangarin: ‘Israelcunapaj miraicunataca, jahua lado llactamanda llujchishpa cachai tucushca tucui llactacunamanda tigrachimuj Mandaj Diosca, causajumbachami’ ninajungami. Shina tigrachimujpimi, paicunapaj llactapillata causanajunga” ninmi.

Llulla villajcunata rimashcatami villajun

9Llulla villajcunamandaca, shungu faquirishpami ninanda llaquirishpa, tucui ñuca tullucunacaman chujchujuni. Jucha illaj Mandaj Diospaj shimicunata uyashpaca, paipaj ñaupajpica yuyaipash chingajta shuj runa vinohuan machashcashnami tucuni.

10Cai llactapica, cazarashca jahuapash shujcunahuan causajcunalla jundami. Chashna cajpimi Dios nalicachijpi, alpapash jichushca pambashna chaquishca, michina pambacunapash tucuilla chaquishca. Paicunaca, imatapash nalitalla rurangapajmi calpanajurca. Shujcunata llaquichingapajllami, shinllicuna carca.

11Mandaj Diosca, cashnatapashmi nin: “Ñucamanda villaj runapash, curapashmi ñucata na manllajcuna. Paicunatacarin ñuca huasipillatami, nalita rurajta ricurcani.

12Chaimandami paicunaca, lluchashpa urmanalla ñanda yana tutapi purinajunshna canga. Chaipica t'angashpa shitajpishnami, llaquipi urmanajunga. Ñucallatami, ninan llaqui huatata paicunaman apamusha” ninmi Mandaj Diosca.

13“Samaria llactapi villaj runacunataca, maitapash villanajujtami ricurcani. Paicunaca, Baal shuti diospaj shutipi villashpami, ñuca agllashca israelcunataca pandachinajurca.

14Shinallata Jerusalenbi villajcunatapash, na ricunayaicunata ruranajujtami ricurcani. Paicunaca, cazarashca jahuapash shujcunahuan causashpami, imatapash llullashpalla purinajurca. Chaimandami, ñucapajman pipash ama tigrarichun, nali causanatara ashtahuan shinllichinajurca. Tucui paicunapash, Jerusalenbi causajcunapash ñuca ñaupajpica, Sodoma shuti, Gomorra shuti pueblocunapi causajcunashnami” ninmi.

15Shinamandami tucuita Mandaj Diosca, chai villajcunata fiñashpa, cashna nin: “Ricuichi, paicunamanmi jayaj ajenjota micuchishpa, jayaj yacuta ufiachigrini. Jerusalenbi villaj runacunamandami, mishqui shimi jayaj shungu canaca, tucui llactaman llujshishca” ninmi.

16Tucuita Mandaj Diosca, cashnatapashmi nin: “Chai villajcuna villashca shimicunataca, na uyanachu canguichi. Canguna yanga shuyachunllami, micuchinshna villanajun. Paicunapaj shungu yarishcatallami, muscuipi ricushcatashna villanajun. Mandaj Dios villashcataca, na villanajunllu.

17Paicunaca jariyashpallami, ñucata fiñajcunataca cashna ninajun: Mandaj Diosca, cashnami nin: ‘Cangunapaca, casilla ali causaimi tianga ninmi’ ninajunmi. Shinallata paicunapaj shungu munashcata rurashpa purij runacunamambashmi: ‘Cangunapaca, ima llaquipash na shamungachu’ ninmi ninajun.

18Shina ningapaca, ¿pita Mandaj Dios imatalla rurangapaj munajujtaca yacharca? ¿Pita paipaj Shimitapash uyarca? ¿Pita pai ima nijtapash ali uyariajurca?

19Ricuichi, Mandaj Dios cachamushca ninan huairahuan tamiashna llaquica, ninandapacha fiñarishpami llujshimunga. Pai alichishpa charijuj ninan huairahuan tamiashna llaquica, nalicunapaj jahuapimi urmamunga.

20Mandaj Dios ñuca ninandapacha fiñarishpa llaquichinataca, paipaj shungupi imashna yarijushcata rurashpa pactachingacaman napacha ali tucungachu. Jipa punllacunami, chaicunataca alipacha yachanguichi.

21Chai villajcunataca, na ñuca cacharcanichu. Paicunallatami calpanajurca. Paicunamanga, imatallapash na nircanichu. Ashtahuangarin llullashpallami villanajurca.

22Ñuca imata rurangapaj munajushcata yachashca cashpaca, ñuca villashca shimicunatami, ñuca agllashcacunaman villanman carca. Shina villashpaca nali causajcunatapash, nalita rurajcunatapash, aliman tigrachinmanmi carca.

23Ñucaca, ¿ladollapi cashpalla ricuj Taita Dioschu cani? ¿Nachu caru carupi cashpapash, tucuita ricuj Taita Dios cani?” ninmi Mandaj Diosca.

24Mandaj Diosca, cashnatapashmi nin: “¿Pipash ñuca na ricunallapi pacajui ushangachu? ¿Nachu ñucaca, tucui jahua pachapipash, cai pachapipash junda cani? Mandaj Dios ñucami, chashna nini.

25Ñucaca, chai villajcunataca: ‘Muscurcanimari, muscurcanimari’ nishpa, llullashpalla ñuca shutipi villanajujtami uyarcani.

26Chai villajcunaca, ¿ima horascamanshi paicunapaj shungu yarishcatalla llullashpa villanajunga? Chai villajcunaca, paicunapaj shungu yarishcatallami umachishpa villanajun.

27Paicuna muscushcataca tucuicunami, paicunapaj cumbacunamanllata parlashpa purinajun. Ñuca agllashcacuna ñuca shutita cungachun, chashna parlanajushcataca na yarinajunllu. Paicunapaj ñaupa taitacuna ñuca shutita cungashpa, Baal shuti diostara catishcashnami cunganajun.

28Villaj runapash muscushpaca, chai muscushcatalla parlachun. Ñuca shimicunata chasquishpa villaj runapash, ñuca Shimi cashcatapacha na llullashpa villachun. Jupahuan trigohuanga, na chashnallatachu” ninmi Mandaj Diosca.

29Mandaj Diosca, cashnatapashmi nin: “Ñuca villashca shimicunaca, ¿nachu ninashna? Shinallata ¿nachu rumita faquij martilloshna?

30Shina cashcamandaca ricuichi, caishuj chaishuj shuhuashpa, ñuca shimita villanajunshna llulla villajcunataca, ñucami llaquichigrini” ninmi Mandaj Diosca.

31Mandaj Diosca, cashnatapashmi nin: “Ricuichi: ‘Diosmi villachun cachamuhuan’ nishpa, paicunapaj jallumanda llujchishpalla mishquilla villajcunataca, ñucami fiñashpa llaquichigrini” ninmi.

32Mandaj Diosca, cashnatapashmi nin: “Ricuichi, llulla muscuicunatalla villashpa parlajcunahuanmi fiñarishca cani. Paicunaca, yanga llullacunata, uyanayai llulla shimicunata parlashpami, ñuca agllashcacunataca pandachinajurca. Ñucaca, na paicunata villachun cacharcanichu. Shinamandami cai gentecunapaca, ima alitapash na ruranajurca” ninmi Mandaj Diosca.

33“Candaca, maijambash caipi causaj gentecunamanda cashpa, na cashpaca shuj villaj, na cashpaca shuj cura cashpapash: ‘¿Mandaj Diosca, imatata villan?’ nishpa tapujpica, cashna ningui: Mandaj Diosca, caitami villachun cachamuhuan: ‘Ñucaca, cangunataca jichugrinimi’ ninmi ningui.

34Shinallata maijan villajpash, maijan curapash, na cashpaca caipi causaj gentecunamanda maijan cashpapash: ‘Mandaj Diosmi, cashna villan’ nijpica, paimambash, paipaj huasi ucu puramambashmi, ninan llaquita cachamusha.

35Cangunaca, cangunapaj cumbata cashpa, cangunapaj huauquita cashpapash, cashna ninguichi: ‘¿Mandaj Diosca imatata tigrachirca, Mandaj Diosca imatata nirca?’ ninguichi.

36Cunanga, ima horallapash: ‘Mandaj Dios villashcami’ ningapaca, na yarinachu canguichi. Tucuicuna villashca shimillatami, Dios villashcashna tucunga. Causaj Taita Diospaj, tucuita Mandaj, ñucanchi Taita Diospaj Shimita naliman tigrachishcamandami, chashna tucunga.

37Chai villajtaca: ‘Mandaj Diosca, ¿imatata tigrachirca? Mandaj Diosca, ¿imatata nirca?’ nishpa tapungui.

38Ashtahuangarin: ‘Mandaj Dios villashcami’ nijpimi, Mandaj Diosca cashna nin: Cai shimicunaca: ‘Mandaj Dios villashcami’ nircanguichimi. ‘Mandaj Dios villashcami’ nishpaca, na villanachu canguichi nichun cachashca jahuami, chashna nircanguichi.

39‘Chaimandami, cangunataca cungashpa saquisha. Ricuichi. Shinamandami, cangunatapash ñuca ñaupajmanda anchuchisha. Shinallata cangunaman, cangunapaj ñaupa taitacunaman carashca pueblotapashmi, tucuillata urmachisha.

40Shina rurashpami, cangunata umashpa pingaichijpi, causaita causaicaman pingai tucushpa causachun saquisha. Ima horapash na cunganalla, jatun pingaipimi causaita causaicaman saquisha’ nishpa villangui” nijurcami.