1 CORINTIOS 2 - Quichua Imbabura Bible

Cristota chacatashpa huañuchishcata villashcami

1Huauquicuna, panicuna, cangunaman Taita Diospaj Shimita villangapaj shamushpaca, na jatun juyailla shimicunahuan, alipacha yachajushcashna villangapaj shamurcanichu.

2Cangunahuan cashpaca, imapash shujmanda yachajungapaca na munarcanichu. Ashtahuangarin Jesucristotami yariajurcani. Paita chacatashpa huañuchishcatallami, yariashpa causarcani.

3Cangunahuan cashpaca ushai illanshna, ninanda manllashpa chujchushpami causarcani.

4Ñuca parlashpa, ñuca villajushpapash, runacuna yachachijpi alipacha yachajushca shimicunataca na villarcanichu. Ashtahuangarin Diospaj Espíritu ushaita charijtami ricuchishpa villajurcani.

5Canguna crishcapash, Taita Dios ushaita carajpi crichunmi, shina villajurcani. Alipacha yachajushca runacuna yachachijpi crichunga, na munarcanichu.

Taita Diosmandaca, paipaj Espiritullami yachachin

6Shinamandami, ashtahuan alipacha crij puracunaca, Taita Diosmanda ali yachachij shimicunata villanajunchi. Cai shimicunaca, na cai pachamandachu. Cai pachata mandajcunamandapash na canllu. Chai mandajcunaca chinganllami.

7Ashtahuangarin Taita Dios caramushca pipash na yachai ushashca, pacalla ali yachai tiashcatami villanajunchi. Chai pacalla alipacha yachashcahuanmi Taita Diosca, cai pachata nara rurashpallata ñucanchitaca, punchapamba llactapi causagrichun ña churashca.

8Chaitaca, cai pachata maijan mandajpash na yacharcachu. Chaita yachashpaca, punchapamba Apunchi Jesustaca napacha cruzpi chacatashpa huañuchinmanllu carca.

9Ashtahuangarin escribishcapica, cashnami nijun:

“Ricuitapash na ricushca, uyaitapash na uyashca,

pipaj shungupipash na yarijushcatami, Taita Diosca paita

ninanda juyajcunamanlla alichishca” nijunmi.

10Ashtahuangarin Taita Diosca, ñucanchimanmi pipash na yachai ushashcataca, paipaj Espirituhuan yachachimushca. Diospaj Espirituca, tucui imatapash aligutapachami yachan. Taita Dios imata yarijujtapash yachanmi.

11¿Maijan runata shuj runa imatapash yarijujtaca, yachai ushan? ¿Nachu paipaj espiritulla yachan? Shinallatami, Taita Dios imata yarijujtaca, pipash na yachai ushan. Taita Diospaj Espiritullami, chaitaca yachan.

12Ñucanchica, na cai pachapi tiaj espiritutaca chasquishcachu canchi. Ashtahuangarin Taita Dios imaguta ñucanchiman carashcata yachangapaca, paipaj Espiritutami chasquircanchi.

13Shina cashpami ñucanchica, alipacha yachajushca runacuna yachachishca shimicunataca na villanajunchi. Ashtahuangarin Diospaj Espíritu yachachijuj shimicunatami Diospaj Espiritumandaca, Diospaj Espirituta charijcunamanllata aligutapacha yachachinchi.

14Ashtahuangarin Diospaj Espirituta na charij runaca, pai imata carashcatapash na yachai ushanllu. Paipaca, juizu illaj runa parlarijunshna uyarijpimi, na yachajungapaj munan. Diospaj Espíritu yarichijpillami, alita nalitapash yachajui ushan.

15Ashtahuangarin Diospaj Espirituta charijca, tucuitami aliguta ricushpa yachai ushan. Shina cajpimi paitaca, pipash na imatapash ni ushanajun.

16“Jatun Dios imata yarijujtaca, ¿pipash yachai usharcachu? Paitaca, ¿pipash yachachi ushangachu?” nijunmi. Ashtahuangarin ñucanchica, Cristopaj yuyaitami charinchi.