COLOSENSES 2 - Quichua Imbabura Bible

1Ashtahuangarin caitami canguna yachachun munani: Cangunamanda, Laodicea shuti pueblopi causajcunamandapash, ñucata ima horallapash nara ricushca tucui crijcunamandapashmi, ñucaca ninanda macanajunshna imatapash rurajuni.

2Paicunapaj shungupica tucuicunallata cushijushpa, shujlla cashcata yarishpa juyarishpa alipacha yachajungacamanmi, cashna rurajuni. Shina juyarishpa, imata cashpapash aligutapacha yachajushpami, Taita Dioshuan, Cristohuan imata pacalla charijushcatapash tucuita yachajunga.

3Imatapash juyailla yarinata, alipacha yachajunataca, Cristollatami pacashca charijun.

4Caitaca, pipash juyailla rimaj tucushpa, cangunata ama umachinajuchunmi, cashna nijuni.

5Ñucapacha cangunahuan na chaipi cashpapash, ñuca espirituca cangunahuanmi. Shina cashpami, Cristota shinllitapacha crishpa canguna catinajujta, tucui mandashcata aliguta pactachinajujta, ñuca ricujunshna cushijujuni.

6Shinamandami, Apunchi Jesucristota imashna chasquishcashnallata paihuanlla causana canguichi.

7Alipacha sapiyashca shinllipacha shayachishcashnami Jesucristotaca, aliguta crishpa catina canguichi. Cangunaman yachachishcataca na cungashpami, Diostaca pashi nishpa mañariana canguichi.

Mushuj causaitaca, Cristomi caran

8Ricuichi, pipash cangunata pactarallapash aliguta yachajunami nij tucushpara, yanga parlocunatalla parlashpa pandachinman. Paicunaca, Cristomandaca na yachachishpami, runacuna yachachishpa saquishcata, cai pachapajtalla cutin cutin yachashcata yachachinajun.

9Taita Diosca, pai imashna cashcapash Cristopaj cuerpopimi junda tiajun.

10Shinallatami cangunapash, Cristohuan shujlla tucushcamandaca, Dioshuambacha causanajunguichi. Cristomi, mandajcunatapash, ushaita charijcunatapash, tucuita umashna mandajun.

11Cristohuan shujlla tucushpami, circuncisión nishcataca na maquihuan rurai tucushcanguichi. Ashtahuangarin juchacunata rurachun yarichijuj nali munaicunata anchuchishpami, Cristoca cangunata circuncisionda rurashca.

12Canguna bautizarishpaca, Cristohuanmi pambai tucurcanguichi. Huañushcacunapaj chaupimanda Cristota Taita Dios paipaj ninan ushaihuan causachishcata crishcamandami, cangunapash Cristohuan causarishcanguichi.

13Juchacunata rurashcamanda, cuerpopi circuncisionda na rurashcamandapash, huañushcashnami carcanguichi. Ashtahuangarin Diosmi cangunapaj juchacunata tucuilla cungashpa, Cristohuan mushuj causaita carashca.

14Imata rurachun mandashpa escribishcatapash na pactachi ushajpimi, ñucanchita juchachijurca. Chaitaca, Cristota cruzpi chacatajpimi, Diosca tucuilla anchuchirca.

15Cristoca, cruzpi chacatai tucushpa huañushpami, mandajcunatapash, ushaita charijcunatapash, tucuita misharca. Paicunataca, tucuicunapaj ñaupajpi prezu apanshna ricuchishpami, urai cumuchirca.

16Cangunataca, imata micunatapash, imata ufianatapash pipash ama jarcachun ninimi. Fiesta punllacunapi, luna llullu punllacunapi, samana punllacunapipash cashnami, chashnami rurana nishpaca, ama pipash mandachun ninimi.

17Chai tucui mandashcacunaca, jipalla shamunata llandushna ricuchijcunallami. Ashtahuangarin cuerpoca Cristopajmi.

18Angelcunata yarinchimi nishpa, na jariyaj tucushpa, jahua shungulla yachachijcuna canguna juyaillaguta japigrinatara saquinguichinman. Napash ricushpatami satirishpa, paicunapaj shungu yarichijpilla, ninanda punguinshna jariyashpa purinajun.

19Paicunaca, umashna mandajuj Cristotami na catinajun. Paimi, paita crishpa paipaj tucushcacunaman carashpa shinlliyachijun. Shina shinlliyachijpimi, cuerpopi mucucuna, angucuna huatarishcashna tucuicuna aliguta causanajun. Chaimandami Taita Dios viñachijpi, pai munashcashna miranajun.

20Cai pachapajtalla cutin cutin yachachishcata catinamandaca, Cristohuan huañushcashnami canguichi. Shina cashpaca, ¿imashpata cai pachapajtalla rurashpa causanajunshnallata, mandashcacunatara cazushpa cunambash catinguichi?

21Chai mandashca shimipica: “Ama caita tacaringuichu, ama chaitaca micunguichu, ama chaitaca tacarillatapash tacaringuichu” nijunmi.

22Chaicunaca, micujhuan yangata tucurinallami. (Chai mandashcacunaca, runacuna yarishpa yachachishcallami).

23Chai mandashcacunata yachajushpa catinaca, alishnallapachami ricurin. Chaicunaca, Diosta ashatalla yarishpa, na jariyashpa causanata, cuerpota llaquichinatallami yachachijun. Ashtahuangarin nali munaicunata jarcaitaca, napacha ushanllu.