JOB 24 - Quichua Imbabura Bible

Job runaguca, nalicunataca na llaquichinllu nishpami Diosta juchachishca

1Tucui Ushaita Charij Diospaca, huatacunapash na pacallachu. ¿Imashpata paita rijsijcunaca, paipaj punllacunataca na ricun?

2Huaquingunaca, alpa mujungunatami suchuchin. Huagracunatapash, shuhuashcatami michinajun.

3Taita mama illaj huahuacunapaj burrotapash apanllami. Sapalla mamagupaj huagratapash, prenda japishpami apan.

4Imagupash illajcunatapashmi, ñanmanda calpachin. Llactapi causanajuj imagutapash na charijcunaca, paicunata manllashpami pacajunajun.

5Ricuichi, jichushca pambacunapi causanajuj sacha burrocunashnami, narapash punllayajpillata shuhuangapaj rinajun. Paicunapaj huahuacunapash, jichushca pambacunapi imapash tiajcunatallami micunajun.

6Paicunaca, pambacunapimi imapash micunacunata tandachinajun. Diosta na manllajcunaca, shujcunapaj uvas chagrapimi pallajunajun.

7Churajuna illajtapash, lluchulla puñuchun saquinllami. Chirimanda maipi pacajunatapash, na charinllu.

8Shinamandami, urcu paramupash mutiyachin. Chirimanda quilparina illajpimi, jatun rumicunata ugllarinajun.

9Taita illaj huahuacunatapash, paicuna chuchunatami quichunajun. Imagutapash na charijcuna cajpitami, prendata quichunajun.

10Churajuna illajtaca, lluchullatami purichun saquinajun. Yarjaichishpa causajcunapaj gavillashca granotapashmi quichunajun.

11Paicunaca, paicunapaj pata ucucunapillami, aceiteta capinajun. Uvasta sarujcunapash, yacunaimandami huañunajun.

12Yarjaimanda huañunajuj gentecuna cai pueblomandapachami, caparishpa huacanajun. Chugrihuan huañunallacunatapash, tucui shungumi caparinajun. Ashtahuangarin Taita Diosca, paicuna mañanajujtaca na uyanllu.

13Paicunaca, michatapash na ricunayachijcuna cashpami, chai ñandaca, ima horapash na rijsinajurca. Diospaj ñandaca, ashatallapash na catinajurcachu.

14Huañuchij runaca, punchapamba punllapimi, imagutapash munashpa causaj, imatapash na charij runaguta huañuchingapaj jatarin. Tutapica shuhuashnami purin.

15Cazarashca jahua shujcunahuan causaj runaca, tutayajtami ricuriajun. Paica: ‘Pipash ñucataca, na ricuhuangachu’ yashpami, ñavita quilparishpa llujshin.

16Shuhuaca, punlla ricushpa saquishcataca, yana yana tutapimi shuhuan. Paica, michataca na rijsinllu.

17Tucui paicunapaca, punllayashpa pacarinaca, huañui japinalla llandushnami. Paicunata pipash rijsijpica, huañui japinalla llandushnami, nina manllai japin.

18Ninanda jatarij yacushnami ucha calpashpa pacajunajun. Paicuna charishca alpacunapash, chai llactapica ninanda nalicachi tucushcami. Paicunapaj uvas chagra chaupitaca, na purinajungachu.

19Tamia pascarijpi ninanda rupashpami, rasutaca yacuyachin. Juchayu ruranacunataca, Seolpash chashnallatami tucuchinga.

20Paicunataca, unguj mamapash cungangami. Jurucunallami, paicunataca mishqui mishquita micunga. Paicunataca, ima horallapash na yarinajungachu. Diosta na manllajcunaca, quiruta urmachijpishnami tucuchi tucunajunga.

21Huahuata ungunata na yachaj, na vijsayu tucuj huarmitami llaquichijurca. Sapalla mamagumambash, ima horallapash ima alitapash na rurarcachu.

22Ashtahuangarin ninan shinllicunataca, paipaj ushaihuanmi pushajurca. Dios shayarijpica, pipash napacha causai ushanllu.

23Diosca, imatapash na manllashpa, paita yariajlla causana yuyaitami cun. Paipaj ñavica, paicuna imashna purijtami ricuriajun.

24Ashatallami alicachi tucunajurca, ashtahuangarin chingarcallami. Tucui shujcunashnallatami, ñavita urai cumuchi tucunajun. Paicunaca, vichai tucushpami, cebada umashna fiti tucunajunga.

25Na chashna cana cajpica, ¿pita cunanga, ñucataca llullami ningayari? Na cashpaca ¿pita ñuca shimicunataca, yangallami ningayari?” nijurcami.