1Imatalla ruranataca, gentecunami shungupi yarinajun.
Shina cajpipash, Mandaj Diosmi
imata rimachumbash mandajun.
2Runaca, paipaj tucui causaipi imata rurashpapash,
aligutallami rurajuni yajunmi.
Ashtahuangarin Mandaj Diosmi
yuyaicunataca, pezanshna ricujun.
3Can imatalla ruranatapash,
Mandaj Diospaj maquipi mingangui.
Chashnami, can imata yarijushcapash ali llujshinga.
4Mandaj Diosca, tucuitami paipajllata cachun rurashca.
Diosta na manllaj runatapashmi,
llaqui punllapaj charijun.
5Mandaj Diosca, jariyashca shunguta
charijcunataca, tucuicunatami millanayachin.
Paicunataca llaquichingapachami.
6Juchata rurajtaca llaquishpa,
na llullashpami jarcashpa rimana.
Runacunaca, Mandaj Diosta manllashpami,
nalita ruranamanda anchurin.
7Mandaj Diosta cushichishpa causaj
runataca, paita fiñajcunamambashmi, paihuan
casilla ali causaita charina yuyaita cun.
8Ashtahuangarin imatapash cashcatapacha na rurashpata,
imatapash ashtacata charingapaj randica,
imatapash cashcatapacha rurashpa
ashagutalla japinami ashtahuan ali.
9Imatalla ruranataca, gentecunami shungupi yarinajun.
Shina cajpipash Mandaj Diosmi,
paicunapaj ñandaca alichijun.
10Jatun mandajca, Dios yarichishcatami riman.
Fiñanajuita alichinapipash, yachashpata
na cazuj runashnaca na rimajungachu.
11Pezanapash, balanzapash, na umashpa
pezanaca, Mandaj Diospajmi.
Muchilapi alichina pezana rumicunatapash,
paillatami rurashca.
12Jatun mandajcuna, jatun nalita ruranaca millanayaimi.
Ashtahuangarin imatapash cashcatapacha rurashpami
mandangapaj tiarinapica, shinllitapacha tianajunga.
13Imatapash cashcatapacha rimashca shimicunaca,
jatun mandajcunapaca cushijuimi.
Paicunami, aligutapacha rimajtaca juyan.
14Jatun mandaj ninanda fiñarishcapash,
huañuchinatami villajun.
Ashtahuangarin aliguta yachajushca runaca,
huañuchinata jarcangami.
15Jatun mandaj cushilla ñavihuan cajpica, causaimi tian.
Pai ali cashcapash, jipa tamia fuyushnami.
16Ali yachaita japinaca, ashtahuan ali orotapash yalimi.
Ali yuyaita japinaca, culquitapash yali ashtahuan alimi.
17Aligutalla rurajcunaca, nalimanda anchurinmi.
Nalita ruranamanda jarcarijcunami,
quiquin causaita alichinajun.
18Nara llaqui japijpillami, jariyashpa causanajun.
Nara urmashpallami, yuyaipi jariyashpa causanajun.
19Macanajushpa quichushcacunata jariyashcacunahuan
chaupirinajunapaj randica, na jariyashcacunahuan
tandanajushpa, na jariyashca shunguta
charinami ashtahuan ali.
20Yachachishca shimicunata ali
yachajushca runami, alita taringa.
Mandaj Diosta yariashpa causaj runaca,
ninandami cushijun.
21Paipaj shungupi aliguta yachajushca runataca,
aligutapacha yarishpami purin ninajunmi.
Mishqui shimicunata rimashcacunaca,
ali yachaitami ashtahuan mirachin.
22Ali yuyaita japij runapaca, causaita
cuj yacu llujshijunshnami.
Ashtahuangarin shinlli shungu runacuna
yachajushpaca, shinlli shungu canatallami yachajun.
23Aliguta yachajushca runapaj shunguca,
aligutapacha yarichishpami rimachin.
Ashtahuan ali shimicunatallami rimachin.
24Juyailla rimashcacunaca, balun mishquishnami.
Almatapash cushichinmi, tullucunapajpash jambimi.
25Runapaj causaipica, ali ñanshnallami ricurin.
Ashtahuangarin tucurimuipica, huañuiman apaj ñanmi.
26Imatalla rurangapaj ninanda munaj runaca,
paipajllatami ruran.
Pai micungapaj munashpallatami, imatallapash ruran.
27Jatun nalita ruraj runaca,
nalita ruranataca allanshnami mascan.
Paipaj shimipipash, nina rupajunshnami tian.
28Jatun nalita ruraj runaca, fiñanajuitami callarichin.
Imatapash parlajlla runaca, ali
cumbacunatapash shicanyachinllami.
29Nalita ruraj runaca, paipaj
cumbamanllatami uyanayaita llullashpa parlan.
Shina llullashpami, nali ñambi churan.
30Ñavita vichashpami, jatun nalita ruranataca yarijun.
Shimihuan rimashpallata, nalita ruranllami.
31Imatapash cashcatapacha rurashpa causajcunaca,
rucu cashpapash ali cajta ricuchijuj
coronata churajushcashnami.
32Ninan shinlli runapaj randica, na ñapash
fiñarij runami ashtahuan ali.
Paipaj munaita jarcarij runaca,
shuj pueblota japij runatapash ashtahuan yali alimi.
33Migllapimi suertetaca ruranajun.
Ashtahuangarin Mandaj Diosmi,
imata ruranataca ricuchijun.
Who We AreWhat We EelieveWhat We Do
2025 by iamachristian.org,Inc All rights reserved.